येँया ओमबहालं ४० दँ न्ह्य खुया यकूगु भगवान बुद्धया मूर्ति अमेरिकाया छगु गैरसकारी कला–संस्कृतिसम्बन्धी संग्रहय् लुगु दु।

येँ ओमबहालया न्हूःछेँबहां सन् १९८० या दशकय् खुया यकूगु बुद्ध अक्षोभ्यया मूर्ति तिब्बत ग्यालरीइ पहिचान जुगु खः। ६ सय दँ पुलागु (१३–१५ औँ शताब्दीया) भगवान बुद्धया ल्ह्वंया मूर्ति अमेरिकाया न्यूयोर्कय् तिब्बत हाउस संग्रहय् लुगु खः।

नेपाल तःगु वाः खुया यकूगु पुरातात्विक महत्वया सम्पदा पहिचानय् सक्रिय जुया वयाच्वंगु ‘लस्ट आर्टस् अफ नेपाल’ न मंगलबाः जारी याउगु सूचं येँया ओमबहालय् सन् १९८० या दशकय् खुया यकूगु बुद्ध अक्षोभ्यया मूर्ति तिब्बत खः धका पहिचान जुगु खः।

तिब्बती धर्मगुरु दलाई लामाया इनापय् तिब्बतया प्राचीन कला–संस्कृति व सम्पदाया संरक्षण नाप प्रदर्शनया लागि तिब्बत हाउस स्थापना याउगु खः। उगु बुद्ध मूर्तिया तस्बिर कला अनुसन्धानकर्ता उलरिक भोन स्क्रोडरं खिचे याउगु खः।

उगु तस्बिर नेपाली ल्ह्वंया मूर्तिसम्बन्धी वं नकतिनि हे प्रकाशित न्हापागु संस्करण निगु भाग सफुतिइ दुथ्याकुगु खः। उगु सफूति बुद्धया मूर्ति तस्बिर व आः तिब्बत हाउस युएसया संग्रहय् दुगु मूर्ति खः धका उल्लेख याउगु खः।

येँया आरआर कलेजय् न स्नातकोत्तर तहलय् नेपालभाषाया अध्यापन न्ह्याःगु दु ।

थ्वनाप स्नातकोत्तर तहलय् नेपालभाषा ब्वंकीगु थाय् निगू जूगु दु । प्रर्दशनी मार्गस्थित आरआर कलेजय् आइतवाःनिसें नेपालभाषाया विषय ब्वंकूगु धागु दु । वंगु शुक्रवाः ओरेन्टेसन ज्याझ्वःयानाः नेपालभाषाया विषय ब्वंकेगु घोषणा याःगु खः ।

थ्वसिवे न्ह्यः कलेजं नेपालभाषा ब्वनीपिं विद्यार्थी मदुगुलिसे बजेट न मदुगु धकाः थ्व विषय चिइकाब्यूगु खः । तर नेवाः विद्यार्थी युनियनं पहल यानाः कलेजय् आखः ब्वनीपिं विद्यार्थी मुंकाः बजेट तकं हयाःब्यूगु खः ।

थुकिइ येँ महानगरपालिकां कार्यपालिकास्तरिय निर्णय यानाः कलेजया नितिं न्यादँतकया नितिं बजेट तयाब्यूगु दु । कलेजनाप महानगरपालिकां आःया न्यादँतकया नितिं सम्झौता यायेधुंकूगु दु ।

येँ महानगरपालिकां आर.आर. कलेजया नितिं १५गू लख तका बजेट बीगु सम्झौता याःगु दु । आरआर कलेजय् नेपालभाषा पुनस्र्थापित याकेगु ज्याय् रिदेन महर्जन, रितेश मल्ल, इन्द्रमान महर्जन, महेश्वर श्रेष्ठ, राजेश श्रेष्ठ, सुरोज तण्डुकारनापंयापिन्सं भूमिका म्हितूगु दु ।

अयोध्याया राजकुमार राम व मिथिलाया जुगु जनकया म्ह्याय् सीता (जानकी) या ब्याहाया लुमन्ती थौं  विवाह पञ्चमी महोत्सव हःगु दु।

विवाह पञ्चमी धइगु थौंया दिं राम व सीताया पूजा आराधनायाना प्रतीकात्मक रुपं ब्याहा यायेगु चलन दु । थुगु दिं जनकपुरय् विशेष ज्याझ्वः दु।

जनकपुरय् साप्ताहिक रुपं ब्याहा पञ्चमी हनिइ। अथेहे राष्ट्रपति विद्यादेवी भण्डारीं विवाह पञ्चमीया लसताय् भिंतुना देछानादीगु दु।

सभापतिया साझा उम्मेदवार यायेगु निति नेपाली कांग्रेसया वरिष्ठ नेता रामचन्द्र पौडेल समूहया बैठक च्वंगु दु।

म्हिगः मंगलबाः न्हिछिंयक सभापतिया आकांक्षीपि केन्द्रीय सदस्यपिनिगु बैठकं सभापति क्वछिइ मफुगुलि थौं बुधबाः हाकन नेतापि छलफल याना च्वंगु खः।

नेता पौडेलया कथं थौं बत्तिसपुतलीस्थित अनुपम फुडल्याण्डय थःनिकटया जिल्ला सभापति, पूर्वजिल्ला सभापति, न्ह्यगू हे प्रदेशया अध्यक्ष उम्मेदवार जूपि व क्षेत्रीय सभापतिपि नाप सभापतिया उम्मेदवारबारे सुझाव कायेगु ज्याझ्व तःगु दु।

‘उमिगु गज्याउगु सुझाव वइ, उगु कथंं हे जिमिसं सभापतिया उम्मेदवार तय याये,’ धका नेता पौडेलं धाउगु दु। पौडेल समूह सभापतिया लागि पौडेल नाप पूर्वमहामन्त्री प्रकाशमान सिंह व केन्द्रीय सदस्य डा. शेखर कोइरालाया दाबी दु।

महामन्त्री डा. शशांक कोइरालां सहमतिया लागि थः सभापतिया दौडपाखे पिहावनागु घोषणा याये धुकुगु दु। कांग्रेस महाधिवेशन मंसिर २४–२७ तक येँजुइत्यंगु दु।

नेपाली कांग्रेस सभापति नाप प्रधानमन्त्री शेरबहादुर देउवां पदाधिकारीनाप उम्मेदवार ल्ययेगु निति थःनिकटया नेतापिनिगु बैठक सःतूगु दु।

थौं बैठक बुधबाः सुथय देउवाया निजी निवास बुढानीलकण्ठय् सःतूगु खः। महाधिवेशन सुरु जुइगु निन्हु जक ल्यःदुगु इलय् आःतक उम्मेदवार जुइपि टुंगे याउगु मदुनि।

सभापतिइ देउवा हे उम्मेदवार जुइगु निश्चित दु सा पदाधिकारी व केन्द्रीय सदस्यया उम्मेदवार टुंगे याउगु मदुनि। संस्थापन समूहय् निम्ह उपसभापतिया लागि विजयकुमार गच्छदार व पूर्णबहादुर खड्काया चर्चा दु।

अथेहे निम्ह महामन्त्री पदय् बागु दर्जन आकांक्षीपि दु।महामन्त्रीया लागि ज्ञानेन्द्रबहादुर कार्की, बालकृष्ण खाँण, डा. प्रकाशशरण महत, एनपी साउद, विश्वप्रकाश शर्मा व रमेश लेखकपिनिगु दावी दु।

देउवायात महामन्त्री ल्ययेगु तसकं थाकुइ खने दु।