लुँ तोलां थौं प्यस कुहावंगु दु।

लुँ तोलां थौं प्यसः कुहावया १ लाख ५ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाउगु दु।

थौं वहः धासा स्थिर जुगु दु। म्हिगः हे थे वहः तोलां १ हजार ३ सय ६० रुपैयाँ न कारोबार जुगु दु।

छु दिं न्ह्यनिसे लगातार क्वहा वयाच्वंगु  शेयर बजाः थौं आइतवाः थहावंगु दु।

शेयर बजाः परिसूचक नेप्से थौं ९५ दशमलव ४६ अङ्कं थहावना २ हजार ४ सय २० दशमलव ९१ विन्दुइ थ्यःगु दु। दक्को समूहया शेयर थहावगु दिं बीमा, जलविद्युत्, फाइनान्स, विकास बैंक व माइक्रो फाइनान्स समूहया शेयर थहावंगु दु।

थौं कारोबार रकम धासा सुधार जुगु दु। २ सय ३८ गु कम्पनीया ६६ लाख ३९ हजार कित्ता शेयर २ अर्ब ५३ करोड १२ लाख रुपैयाँ कारोबार जुगु दु।

दकलय् अप्पो सानिमा बैंक प्रमोटर शेयर २२ करोड रुपैयाँया किनबेच जुगु दु। बेस्ट फाइनान्स, नेशनल हाइड्रोपावर लगायतया १२ गु कम्पनीया शेयर १० प्रतिशतं थहावना सकारात्मक सर्किट लगे जुगु खः।

थौं जम्मा प्यंगु कम्पनीया शेयर घटे जुगु दु।

यल महानगरपालिकाय् ८१ दँ दुुम्ह नरसिंह व्यञ्जनकारं हाकन वडाध्यक्षय् उम्मेद्वारी दर्ता याउगु दु।

यल महानगरपालिका वडा नं. १० या वडाध्यक्षय् स्वतन्त्र कथं उम्मेद्वारी दर्ता याउगु खः। थ्व स्वया न्ह्यः वयकलं झीं वडाध्यक्ष त्याये धुकुगु खः।

वयकलः २०२९ सालय् न्हापागु पटक वडाध्यक्ष त्याउगु खः।

येँ महानगरपालिकाय् नेकपा एमालेपाखे उपमेयर पदया उम्मेद्वार जुयादीम्ह सुनिता डंगोलं थःगु उम्मेद्वारीं ल्याय्म्ह व मिसापिनिगु भावनाया प्रतिनिधित्व याइ धका धाउगु दु।

मेयर पदय् स्वतन्त्र उम्मेद्वारी बिइगु घोषणायाम्ह डंगोलयात एमाले न उपमेयरया उम्मेद्वार दयकेगु निर्णय याउगु खः। एमालेया निर्णयलिपा डंगोलं राजनीति ख्यलय् थःगु न्हापागु पलाः खः धका धाउगु खः।

बक्तव्य जारी यासे उपमेयर पदय् थःगु उम्मेद्वारीं ल्याय्म्ह, मिसा व सामाजिक–सांस्कृतिक अभियान्ता लगायत येँ च्वपिनिगु भावना सम्बोधन जुगु उल्लेख याउगु दु।

‘‘दकलय् तधःगु पार्टी न जितः विश्वास याना उपमेयरया जिम्मेवारी बिउगु धइगु जितः जक मखु, ल्याय्म्ह, मिसा, सामाजिक–सांस्कृतिक अभियान्ता लगायत सकल येँ च्वपिनिगु भावना प्रतिनिधित्व जुइगु कथं ल्याय्म्हपिन्त उपहारय लल्हागु ह्वताः वःगु कथं कयागु’, डंगोलं च्वंगु दु।

हलि नेवाः दबू, नेपाः मूकवःया न्हापागु दँज्याय् नेवाः न्ह्यलूवा डा. महेशमान श्रेष्ठयात हंगु दु।

म्हिगः जुगु छगु ज्यााझ्वः दथुइ ज्याझ्वःया मूपाहाँ संघीय मामिला तथा सामान्य प्रशासनमन्त्री राजेन्द्र श्रेष्ठं नेवाः न्ह्यलुवाः डा.श्रेष्ठया दोसल्ला न्ययेका हनापौं लल्हानादीगु खः।