नेकपा एमालेया अध्यक्ष केपी शर्मा ओलीं वइगु प्रतिनिधिसभा चुनावय् स्वगु सिट त्याका क्यनेत माधवकुमार नेपालयात चुनौती बिउगु दु।

पार्टी एकीकरणया इलय् थःम्हेसिया बियाउगु सिटयात प्रचण्ड व माधवकुमार नेपालं दुरुपयोग याना थःम्हेसित हे प्रहार याउगु द्धपः बिउगु दु।

शुक्रबाः येँ जुगु पार्टी निकट राष्ट्रिय स्वास्थ्यकःमि संघ, नेपालया प्यंक्वःगु राष्ट्रिय महाधिवेशनय् ओलीं अथे धयादीगु खः।

१५ महिनानिसे १५ दँदुपिन्त थौं टाइफाइड विरुद्धया खोप बिइगु राष्ट्रिय अभियान जुइगु दु।

वइगु वैशाख १८ गतेतक जुइगु अभियानय् १५ महिनानिसे १५ दँ दुपिन्त ७४ लाख मस्तयेत टाइफाइडविरुद्ध खोप बिइगु सरकारया लक्ष्य दु।

टाइफाइड विरुद्धया खोप सुरु याउगु नेपाल दक्षिण एसियाय् न्हापागु राष्ट्र जुगु दु । थौंनिसे देयन्यक ५० हजार केन्द्रपाखे खोप बिइगु तयारी दु।

म्हिगः प्रधानमन्त्री शेरबहादुर देउवां स्वास्थ्यकःमिपिन्त खोप हस्तान्तरण याना अभियानया उलेज्या जुगु खः।

वइगु बैशाख ३० गते जुइगु स्थानीय तह निर्वाचनया आचार संहिता थौं चान्ह्यःनिसे लागु जुइगु दु।

आचार संहिता पालना यायेगु प्रतिबद्धता पत्रय् राजनीतिक दलपिन्स ल्हाःचिं तये धुका निर्वाचन आयोगं थौं चान्ह्यः निसे मतदानया दिंतक कार्यान्वयन यायेत्यःगु खः।

आचारसंहिता लागु जुइ धुका छु न दल वा उम्मेदवारया पक्षय् तधःक प्रचार प्रसार याये दइ मखु। स्थानीय प्रशासनया अनुमति मकासे सार्वजनिक स्थानय् सभा, जुलुस, बैठक, भेला लगायतया ज्या याये दइमखु। छु न ज्याझ्वः यायेत ७२ घण्टा न्ह्यः हे प्रशासन व प्रहरीयात जानकारी बिइमाः।

अथेहे योजनाया शिलान्यास, उदघाटन, सर्वेक्षण लगायतया ज्या याये दइ मखु। अथेतु कर्मचारी नियुक्ति, सरुवा, पदस्थापन लगायतया ज्या याये दइमखु, यायेमाःसा निर्वाचन आयोगया अनुमति कायेमाः। दलया निर्वाचन चिं, ध्वाँय् दुगु लोगो, स्टिकर, कपडा, टपूली, भेस्ट, टिसर्ट, ज्याकेट, कमिज, गम्छा, ब्याच, मास्क, लकेट, झोला लगायत न ज्वने दइ मखु।

तर उम्मेदवारं ‘ए–फोर’ आकारया भ्वँतय् थःगु व्यक्तिगत विवरण खुले जुगु इने दइ। निर्वाचन प्रचारप्रसारया ज्या सुथय् ८ बजेनिसे बहनि ७ बजे तक याये दइ।

प्रचार प्रसारया लागि हेलिकप्टर प्रयोग याये दइ निगु दलया मुख्य प्रचारकपि जक हेलिकप्टरय् वने दइ। तर साइकल, रिक्सा, ठेलागाडा,बयलगाडा, टाँगा  लगायतया सवारी साधन चुनाव प्रचारय् प्रयोग याये दइमखुगु धका निर्वाचन आचार संहिताय् उल्लेख दु।

आचारसंहिता सरकार, निजी क्षेत्र, संवैधानिक निकाय, राजनीतिक दल, सार्वजनिक पद धारणयापि मनू, सञ्चार माध्यम, गैरसरकारी संस्था, विद्यालय, विश्वविद्यालय, शिक्षक, कर्मचारी नाप मतदातापिन्त तक लागु जुइ धका निर्वाचन आयोगं धाउगु दु।

येँ महानगरपालिकां १ करोड ८० लाख मूल्य बराबरया ह्वील स्ट्रेचरसहितया झीन्यागः शववाहन थीथी अस्पताल व नगरपालिकायात छगु ज्याझ्वः दथुइ लल्हागु दु।

येँ महानगरपालिकाया मेयर विद्यासुन्दर शाक्यं उगु शववहानया ताःचाः लःल्हागु दु। ताःचाः लःल्हाय् धुका थःगु खँ तयेगु झ्वलय् मेयर शाक्यं थ्व स्वया न्हापा न सामूदायिक, सरकारी व नीजि अस्पतालयात ग्वाहालि याये धुकागु दु खँ लुमकादीगु दु।

‘येँ महानगरपालिका थःम्हेसिया हे शववहान सञ्चालन यायेमाः धाःपि न दु तर येँ महानगरया नां स्वया न ज्या माःगु दु,’ मेयर शाक्यं धयादीगु दु, ‘जिमिसं सहकार्यया ल्हाः न्ह्याका थथे शववहान लःल्हाना जिमिगु दायित्व पूरा यानागु दु । थुकियात प्रयोग यानादीसँ।’ वयकलं धयादीगु दु कोभिडया इलय् न महानगरपालिकां थीथी अस्पताल नाप सहकार्य याना भेण्टिलेटर लगायतया उपकरण ग्वाहालि यानागु धका धयादीगु दु।

‘कोभिड महामारी सकसिगु मंकाः समस्याया कथं खनेदुगु खः,’ वयकलं धयादीगु दु, ‘उगु मंकाः समस्यानाप ल्वायेत येँ महानगरपालिकां थःगु थासं फुगु कथं ग्वाहालि याना खः धका धयादीगु खः।

उपप्रमुख हरिप्रभा खड्गी श्रेष्ठं न थथे ग्वाहालि याये दुगुलि थःपि तसकं लय्ता धका धयादीगु खः।

येँ महानगरपालिकां क्षत्रपाटी निशुल्क चिकित्सालय, नेपाल एपीएफ अस्पताल, वीर अस्पताल, त्रिवि शिक्षण अस्पताल, मनमोहन मेमोरियल अस्पताल, गणेशमान सिंह मेमोरियल अस्पताल, सूर्य विनायक नगरपालिका, गोदावरी नगरपालिका, भक्तपुर क्यान्सर अस्पताल, भद्रपुर नगरपालिका लगायतयात शववहान हस्तान्तरण याउगु खः। महानगरपालिकां बिउगु जानकारी कथं छगः शववहानया भाः करिब १२ लाख ४ हजार तुगु धका धाउगु दु।

सम्झौता कथ्ं उगु शववहानं स्वनिगः दुने निशुल्क सेवा प्रवाह यायेमाःगु दु।  येँ महानगरपालिकां बिगु १५ शववहान मध्ये नेपाल एपीएफ व त्रिवि शिक्षण अस्पतालयात निगः निगः हस्तान्तरण याउगु खः।

नेकपा एमाले न निर्वाचन आयोगं जारी याउगु स्थानीय तह निर्वाचन आचारसंहिताय् खुगु विषय असहमति तःगु दु।

अय्न आयोगं जारी याउगु आचारसंहिता व संविधान व कानुननाप ल्वागु बाहेकया संहिता पालना यायेगु प्रतिवद्धता याउगु दु।

आइतबाः एमाले महासचिव शंकर पोखरेल, उपमहासचिव विष्णु रिमालपिनिगु टोली न निर्वाचन आयोगय् वना प्रमुख निर्वाचन आयुक्त दिनेश थपलियायात आचारसंहिताबारे गःपिनिगु  ध्यानाकर्षणपौं लल्हागु दु।

एमाले न उम्मेदवार मनोनयन याये न्ह्यः अघि जनप्रतिनिधिपिन्स राजीनामा बिइगु व्यवस्था,  सामाजिक सञ्जालपाखे प्रचार प्रसार यायेगु व्यवस्था, छु न तहया कार्यपालिका सदस्य, मन्त्री, प्रधानमन्त्रीपिन्स थःगु निर्वाचन क्षेत्रबाहेक मेमे थाय् चुनाव प्रचारय् रोक लगे यायेगु आचार संहिताय् व्यवस्था असहमति क्यंगु खः।

अथेहे सामाजिक सञ्जालपाखे मत फ्वनेगु व्यवस्था गुवलय् निसे लागू जुइगु स्पष्ट यायेत एमाले न इनाप याउगु दु।