किपू नगरपालिकाया कार्यालय म्हिगः बिहीबाः निसे नेपालभाषाया राष्ट्रिय म्ये हालेगु सुरु याउगु दु। वंगु मंसिर ७ गते मंगलबाःनिसे नियमित रुप सुथय् “सयौ थुंगा फूलका हामी” राष्ट्रिय म्ये शुरु याउगु खः।

म्हिगः बिहीबाः निसे किपू नगरपालिकाया कर्मचारीपिन्स नेपालभाषाया राष्ट्रिय म्ये “धुन दने धुन सन्ह्यलं झी” न नियमित रुप हाला ज्या सुरु याइगु खः। म्ये हाले धुका कर्मचारीपिन्त नीति नियम व न्हिथं माःगु निर्देशन बिइगु याइ।

नेपालभाषाया राष्ट्रिय म्ये हालिइगु मध्ये किपू नगरपालिका न्हापागु पालिका जुगु दु। छु ई न्ह्यः जक वागमती प्रदेश सरकारयात भाषा आयोगं खस नेपाली भाषा नाप तामाङ्ग भाषा र नेपालभाषायात सरकारी कामकाजया भाषाय् छ्यले फइगु धका सिफारिस याउगु खः।

प्रधानमन्त्री शेरबहादुर देउवां आन्दोलन यानाच्वपि कानून व्यवसायीपिन्त छलफलय् सःतूगु दु।

प्रधानन्यायाधीश चोलेन्द्रशम्शेर जबराया राजीनामा फ्वसे नेपाल बार एशोसिएसनया अगुवाइ आन्दोलन जुयाच्वंगु लच्छि लिपा प्रधानमन्त्री देउवां कानुन व्यवसायीपिन्त भेटघाटया लागि शुक्रबाः सुथय् १० बजे सःतूगु दु।

नेपाल बार एशोसिएसनया अध्यक्ष चण्डेश्वर श्रेष्ठं थःपिन्स प्रधानमन्त्री देउवायात नापलायेगु ई कयागुलि कन्ह्य १० बजे सःतूगु धका धाउगु खः।

छलफलय् बार पदाधिकारीपि नाप वरिष्ठ अधिवक्तापि दमननाथ ढुंगाना, बद्रीबहादुर कार्की, शम्भु थापा, हरिहर दाहाल, रमण श्रेष्ठ, प्रेमबहादुर खड्कापि न सामेल जुइगु दु।

अथेहे नेपाल बार एशोसिएसन व सर्वोच्च अदालत बार एशोसिएसनया अध्यक्ष नाप पदाधिकारीपि न वनिइगु जुगु दु।

वंगु कात्तिक २५ गतेनिसे सुरु जुगु राष्ट्रिय जनगणना थौं बिहीवाःनिसे औपचारिक रूपं क्वचाःगु दु।

थौं तकया गणनाय् विशेष कारणं सहभागी जुइ मखसा कन्ह्य शुक्रवाः न गणना याइ धका तथ्याङ्क विभागया उपमहानिर्देशक हेमराज रेग्मीं जानकारी बिउगु दु।

तर कन्ह्य गणना जूसा थौंया तथ्याङ्कयात हे आधार माने याइ धका धाउगु दु। विशेष कारणवश गणनाय् सहभागी जुइ मखसा ११७८ नम्बरय् फोन याना तथ्याङ्क च्वकेफइ धका धाउगु दु।

शेयर बजाःया कारोबार जुइगु थौं लिपागु दिं सामान्य घटे जुगु दु।

शेयर बजाः परिसूचक नेप्से थौं दशमलव २२ अङ्कं घटे जुया २ हजार ७ सय ३१ दशमलव ७८ विन्दुइ कुहावंगु दु।

थौं बैंकिङ, होटल व मेमेगु बाहेक दक्को समूहया शेयर घटे जुगु दु। विकास बैंक, बीमा, व्यापार व बीमा समूहया शेयर तसकं कुहावंगु दु। २३३ कम्पनीया ७४ लाख ८६ हजार कित्ता शेयर ३ अर्ब ७८ करोड ९७ लाख रुपैयाँया शेयर कारोबार जुगु दु।

दकलय् अप्वो नेपाल टेलिकमया २६ करोड ५७ लाख रुपैयाँ शेयर किनबेच जुगु दु। थौं मानुषी लघुवित्त कम्पनीया शेयर दकलय् अप्वो ७ प्रतिशतं घटे जुगु दु।

समग्र बजाः घटे जूसा समृद्धि फाइनान्सया शेयर नौ प्रतिशतं थहा वंगु दु।

वंगु २४ घण्टाया दुने देयन्यक थप ३०८ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ७ हजार १०४ म्हेसिगु पीसीआर परीक्षण याउगुलि २८१ म्ह व १८०५ म्हेसिगु एन्टिजेन परीक्षणय् २७ म्ह याना २९८ म्हेसित कोरोना भाइरस संक्रमण पुष्टि जुगु दु।

अथेहे २४ घण्टाय् कोरोना संक्रमणमुक्त जुपि २९८ म्ह थ्यंगु दु सा स्वम्ह सीउगु दु। आःतक देयन्यक कोरोना भाइरसया सक्रिय संक्रमितपि ७ हजार ३४९ म्ह थ्यंगु दु।

स्वास्थ्य मन्त्रालयया कथं थौं दकलय् अप्वो येँ ७८, यलय् ७८, मोरङय् १९, चितवनय् १७, ख्वपय् १६, झापाय् ११ व रुपन्देहीइ झीम्हेसित कोरोना संक्रमण पुष्टि जुगु दु।