Display Style:
Column Style
थौंनिसें १८ दं च्वय्पिन्त कोरोना खोप बीगु
ञलागा षष्ठी ११४१, असोज ११ सोमबाः
येँ जिल्लाय् थौंनिसें १८ दं च्वय्या दक्वं नागरिकयात कोभिड–१९ विरुद्धया खोप बीगु जूगु दु ।
स्वास्थ्य ज्याकू येँया प्रमुख बद्रीबहादुर खड्काया कथं स्वन्हुतक्क न्ह्याइगु खोप ज्याझ्वलय् १८ दं च्वय्या दक्वं नागरिकयात भेरोसेल खोपया न्हापांगु डोज बी । खोप बीत येँया ११ गुलिं पालिका व ७ अस्पतालय् केन्द्र क्वःछ्यूगु दु ।
खोप काइपिन्सं अनिवार्य अनलाइन फारम जायेकेमाःगु स्वास्थ्य ज्याकु यें न्ह्यथंगु दु । येँया विर अस्पताल, शिक्षण अस्पताल, निजामती कर्मचारी अस्पताल, परोपकार प्रसुती गृह, विरेन्द्र सैनिक अस्पताल छाउनी, नेपाल प्रहरी अस्पताल पानीपोखरी व सशस्त्र प्रहरी अस्पताल बलम्बुइ खोप केन्द्र क्वःछ्यूगु दु ।
मोहनि नखःया लागिं अग्रिम टिकट बुकिङ थौंनिसें चाल
ञलागा षष्ठी ११४१, असोज ११ सोमबाः
नेपाःमितय् तःधंगु नखः मोहनिया लागिं अग्रिम टिकट बुकिङ थौंनिसें चाःगु दु ।
मोहनिइ स्वनिगः तवःताः थःथःगु थासय् लिहांवनीपिन्त टिकट बुकिङ चायेकूगु खः । यातायात व्यवस्था विभागं अग्रिम टिकट अनलाइन वा मोबाइल बैकिङं काटे यायेत इनाप याःगु दु ।
मोबाइलं कनेक्ट आईपीएस, खल्ती, ईसेवा थुज्वःगु डिजिटल विधिं टिकट न्यायेबलय् कोरोना संक्रमणया संभावना नं म्ह्वः जुइगु विभागया महानिर्देशक नमराज घिमिरें धयादिल ।
मोहनिया इलय् बिचौलियातय्सं ठगे याइगु संभावना दुगुलिं सम्बन्धित टिकट काउन्टरया वसः फिनातःपिं व म्हसीका पौ दुपिं मनूतय्के जक टिकट कायेत नं विभागं सर्वसाधत्रारणयात इनाप याःगु दु ।
विभागया कथं कोरोना महामारी व स्वास्थ्य मापदण्डयात बिचाः यानाः स्वनिगःया थीथी थासं बस वनी । पश्चिमय् न्ह्याइगु सवारीया टिकट न्हू बसपार्कं कायेफइ ।
पूर्वपाखेया सवारीया लागिं कोटेश्वर, चाबहिलं टिकट कायेफइ ।
रीनाया कुचुकुचु पिदन
लहनान्युज | ञंलागा षष्ठी ११४१, असोज ११ सोमवाः
गायिका रीना शाक्यया न्हूगु म्ये कुचुकुचु पिदंगु दु। येँय् छगू ज्याझ्वः यासें म्ये सार्वजनिक याःगु खः।
ज्याझ्वलय् नेवाः फिल्म सोसाइटीया नायः लिसें संचारकर्मी बिराजकाजी राजोपाध्यायं म्ये सार्वजनिक यानादिल। थःगु नुगः खँ तय्गु झ्वलय् सोसाइटीया नायः राजोपाध्यायं म्यूजिक भिडियो दय्केगु ज्या धइगु तसकं हाथ्यालं जाःगु चीहाः संकिपा खःगु धासें निर्देशकं म्यूजिक भिडियो निर्माणय् निर्देशकं कन्सेप्टय् मिहिनेत याय्माःगु सुझावः तयादिल।
सार्वजनिक जूगु म्यूजिक भिडियो कुचुकुचुया निर्देशक प्रहिल कार्कीया ज्यायात च्वछासें राजोपाध्यायं कलाय् छुं नं जात वा भूगोल मदइगु व कलां सकसितं छमाः दय्कीगु धापू तयादिल।ज्याझ्वलय् म्येच्वमि शैलेन्द्र श्रेष्ठ, म्यूजिक भिडियोया मोडलद्वय रुपेन्द्र श्रेष्ठ, बिनु शाक्य, नेवाः संकिपा ख्यःया नांजाःम्ह कोरीयोग्राफरलिसें निर्देशक राजन शाही, समाजसेवी रमेश जोशीलिसें नं म्येयात कयाः थःथःगु नुगःखँ तयादीगु खः। ज्याझ्वलय् सोसाइटीया नायः राजोपाध्यायं म्येया सकल टिमयात मतिनाया चिं लःल्हानादीगु खः।
सार्वजनिक जूगु म्येय् सः रानी शाक्ययागु दुसा लय् भुपेन्द्र बज्राचार्य व म्येग्वः शैलेन्द्र श्रेष्ठयागु दु। अथे हे, म्यूजिक भिडियोयात प्रहिल कार्कीं निर्देशन यानादीगु दुसा छायाङ्कन आभेस बज्राचार्य व दृश्य सम्पादन माधव बेलवासें यानादीगु खः। कोरीयोग्राफी रश्मी क्लारायागु खः। म्येहालामि रानी शाक्यया हे युट्युब च्यानलपाखें म्ये सार्वजनिक जूगु दु।
येँ थप २३२ म्हेसित कोरोना सक्रमण पुष्टि
रसिया श्रेष्ठ | ञंलागा पंचमी ११४१, असोज १० आईतवाः
स्वास्थ्य तथा जनसंख्या मन्त्रालयया कथं थौं दकलय् अप्वो येँ जक २३२ म्हेसित कोरोना सक्रमण जुगु दु।
अथेहे, कास्कीइ ८४, झापाय् ७८, मोरङय् ७९ म्हेसित कोरोना संक्रमण पुष्टि जूगु दु।
अथेतु, रुपन्देहीइ ३१, सुनसरी व यलय् २४÷म्ह, ख्वपय् २३, चितवनय् २२, कैलालीइ १४ व इलामय् १० म्हेसित कोरोना संक्रमण खनेदुगु दु धका मन्त्रालयं धाउगु दु।
देयन्यक ८३४ म्ह कोरोना संक्रमण पुष्टि
रसिया श्रेष्ठ | ञंलागा पंचमी ११४१, असोज १० आईतवाः
वंगु २४ घण्टाया दुने देयन्यक ८३४ म्हेसित कोरोना भाइरस संक्रमण पुष्टि जूगु दु।
८ हजार ५ सय ८९ म्हेसिगु पीसीआर परीक्षण यागुलि ७३० म्ह व ५ हजार १४७ म्हेसिगु एन्टिजेन परीक्षण यागुलि १ सय ४ म्ह याना ८३४ म्हेसित कोरोना भाइरसया संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु। अथेहे वंगु २४ घण्टाया दुने कोरोना संक्रमणं गुम्ह सीउगु दु सा १ हजार २७९ म्ह कोरोनामुक्त जुगु दु।
आइतबाः थपे जुगु नाप आःतक नेपालय् कोरोना संक्रमितपि ७ लाख ९१ हजार ३९२ म्ह थ्यंगु दु। अथेहे ११ हजार ९६ म्ह सी धुकुगु दु सा ७ लाख ६१ हजार १५४ म्ह संक्रमणमुक्त जुइ धुकुगु दु।
