Display Style:
Column Style
राजनीतिक दलसम्बन्धी अध्यादेशविरुद्धया रिटय् सर्वोच्चं अन्तरिम आदेश मबिल
लहनान्यूज | ञलागा चर्तुर्थी ११४१, असोज ९ शनिबाः
सर्वोच्च अदालतं दल ब्वःथलेत अःपुइकथं हःगु अध्यादेशविरूद्ध लाःगु रिटय् अन्तरिम आदेश जुइमखुत ।
अधिवक्ता प्रवेश केसीलिसे ६म्हेसिनं ब्यूगु विस्कं विस्कं रिटय् न्हापांखुसि सुनुवाइ यानाः संवैधानिक इजलासं कारण देखाउ आदेश जारी याःगु दु । अथेहे अन्तरिम आदेश न मबीगु धागु दु ।
म्हिगः प्रधानन्यायाधीश चोलेन्द्रशमसेर जबरा, दीपककुमार कार्की, मीरा खड्का, हरिकृष्ण कार्की व ईश्वर खतिवडाया इजलासं अध्यादेशविरूद्धया रिटय् अन्तरिम आदेश मबीगु धागु खः ।
भदौ १ गते राजनीतिक दलसम्बन्धी ऐन २०७३ य् दल तछ्यायेगु सम्बन्धय् तःगु कठोर व्यवस्थायात संशोधन यानाः अध्यादेश जारी याःगु खः । दल तछ्यायेत अःपुइगु कथं सरकारं हःगु अध्यादेशविरूद्ध सर्वोच्च अदालतय् ६गू रिट लाःगु दु ।
थ्वसिवे न्ह्यः दल तछ्यायेत संसदीय दल अले केन्द्रीय समिति निगुलिइ ४०गू प्रतिशत थ्यंकेमाःगु प्रावधान दुगु खः । अनलिं उकियात संशोधन यानाः संसदीय दल वा केन्द्रीय समितिइ २०गू प्रतिशत ल्या दुसां दल तछ्याये फइगु प्रावधान तयाः अध्यादेश जारी यानाब्यूगु खः ।
अध्यादेश जारी जुइवं नेकपा (एमाले) व जनता समाजवादी पार्टी तज्याःगु खः । अनलिं माधवकुमार नेपालया नायःसुइ नेकपा (एकीकृत समाजवादी) व महन्थ ठाकुरया नायःसुइ लोकतान्त्रिक समाजवादी पार्टी दर्ता जूगु खः ।
ट्राफिकया नखः ब्यवस्थापन योजना सार्वजनिक यात
ञंलागा तृतीया ११४१, असोज ८ शुक्रवाः
लिक्कसं वयाच्वंगु मोहनि स्वन्तियात लक्षित याना ट्राफिक प्रहरीं सुरक्षा योजना सार्वजनिक याःगु दु । उगु अन्तर्गत स्वास्थ्य सुरक्षा, टिकटय् कालोबजारी नियन्त्रण व चेकजाँच याना यात्रुयात सकुशल गन्तव्य थ्यंकेगु लिसेंया विषय दु । सुरक्षित यात्राया नितिं येँय् न्हिं ४३गू ट्राफिक युनिट व १४गू यात्रु सहायता कक्ष सक्रिय जुइ । प्रहरीया कथं युनिटं न्हिं ४क्वः व नाकाय् २४ घौ हे चेकजाँच याइ ।
बसपार्क, टिकट काउण्टर, यात्रु प्रतिक्षालय थेंज्यागु भिडभाड जुइगु थाय्यात प्रहरीं विशेष निगरानीइ तइगु जूगु दु । यात्राया झ्वलय् कोभिड संक्रमणया जोखिम म्हो यायेत सुरक्षा मापदण्ड प्रभावकारी दयेकेगुलिइ प्रहरी न्ह्यागु दु । ताहाकःगु दूरीया सवारी ज्वलंनय् अनिवार्य निम्ह चालक दयेमाःगु व्यवस्था यायेगु , मादक पदार्थ सेवन विरुद्ध कडाई यायेगु उमिगु योजना दु । उगु बाहेक अप्वः भाडा काइगु, नाइटभिजन लेजर राडारं गाडीया गति नियन्त्रण याइगु जूगु दु ।
खुल्लामञ्चया बसपार्क बन्द जुइधुंका स्वनिगःलय् भाडाया सवारी ज्वलंया व्यवस्थापन ट्राफिक प्रहरीया नितिं थप थाकुया च्वंगु दु । थुगु अवस्थाय् ताहाकःगु दुरीया सवारी ज्वलंया व्यवस्थापन प्रहरीया नितिं थप छ्यँ स्याइगु विषय जूगु दु ।
अयेसां ई धलः दयेका अपुकेगु प्रहरीया धापू दु । भीडभाड जुइगु थायेया ह्वता छ्यला ध्यबा।, तिसा चोरीया घटना अप्वइगुलिइ उखेपाखे सचेत जुइत प्रहरीं सर्वसाधारणयात अपिल याःगु दु । दँय्दसं प्रहरीं हइगु थुकथंया सुरक्षा योजना कर्मकाण्डी जुइगु याःगु टिप्पणी तक्वः न्यने दइगु याः ।
योजना हइगु प्रहरी हे प्रलोभनय् लाना सुरक्षा योजना आलोचित जुइगु नं याःगु दु । अथेजूगुलिं सचेत यात्रु , कर्तव्यपरायण व्यवसायी व राजहाँस प्रहरी जूसा जक थुकथंया योजनाया औचित्य पूवनिइ । थुखेपाखे विचाः यायेगु नं मजिमगाः ।
थौं नानिचा याः
लहनान्युज | ञंलागा तृतीया ११४१, असोज ८ शुक्रवाः
येँयाः या लिपागु दिं थौं हनुमानध्वाखाय् यःसिं क्वथला औपचारिक रुपं क्वचाइ।
थौं बहनि १० बजे जुया ३६ मिनेटया साइतय् मानन्धर समुदायया नेतृत्वय् यःसिइ क्वथइ। वंगु २ गते यःसिं थना न्ह्यागु इन्द्रजात्रा थौं क्वचाइगु खः।
इन्द्रजात्राया लिपागु दिं कुमारीया रथ मिसापिन्स सालिइगु याइ। अथेहे राष्ट्रप्रमुखं कुमारीया ल्हातं सिन्हं टिइगु परम्परा दु।
पोखरा वनाच्वंगु कार त्रिशुली कुतुवना स्वम्ह बेपत्ता
लहनान्युज | ञंलागा तृतीया ११४१, असोज ८ शुक्रवाः
येँ न पोखरा वनाच्वंगु कार चितवनया इच्छाकामना गाउँपालिका वडा नं. ५ या नाग्दी खुसिइखोलापाखे त्रिशूली खुसिइ कुतुवना स्वम्ह बेपत्ता जूगु दु।
ग.२ च ४९१८ नम्बरया कार वंगु चान्ह्यसिया १२ः३० बजे अनियन्त्रित जुया सतकं करिब ३५ मिटर क्वय् त्रिशूली खुसिइ कुतुवना चालक नाप स्वम्ह बेपत्ता जूगु दु धका जिल्ला प्रहरी कार्यालय चितवनं धाउगु दु।
बेपत्ता जूपि कार चालक पोखरा महानगरपालिका वडा नं. १७ या ५५ दँया प्रेम बहादुर भुजेल, ५५ दँ दुम्ह लेख बहादुर भुजेल व वया जहान ३६ वदँ दुम्ह ईश्वरी भुजेल खः। बेपत्ता जूपिनिगु मालेगु ज्या जुयाच्वंगु दु धका प्रहरीं धाउगु दु।
अपराधिक ज्याय् निरुत्साहित यायेत अन्तरक्रिया
लहनान्युज | ञंलागा तृतीया ११४१, असोज ८ शुक्रवाः
सामुदायिक प्रहरी साझेदारी कार्यक्रम अन्र्तगत मोहनी स्वन्ति न्ह्यने वयाच्वंगुलि समाजय् दुने सम्भावित अपराधिक क्रियाकलापयात रोकथाम तथा नियन्त्रण व अपराधिक ज्याय् निरुत्साहित यायेगु कथं छगु अन्तरक्रिया नाप दैलो कार्यक्रम याउगु खः।
महानगरीय प्रहरी बृत्त लैनचौर कार्यालयया प्रमुख प्रनाउ श्री दुर्गा प्रसाद दाहाल, कामपा १७ या वडा अध्यक्ष नवीन मानन्धर, सामुदायिक प्रहरीया सदस्यपि, छत्रपाटी बिकास उपभोक्ता समिति, थीथी टोल सुधार समिति नाप स्थानिय समाजसेवीपिनिगु सहभागिताय् कामपा १७ या क्षेत्रपाटी, थँहिति, ढल्को व खुशिबँुइ घर दैलो कार्यक्रम याउगु खः।
