राष्ट्रिय सभाया बैठक थ्व हे वइगु माघ १७ गते सोमवाः न्हिनसिया १ बजे च्वनिइगु जुगु दु। सङ्घीय संसदया महासचिव डा. भरतराज गौतमं प्रकाशन याउगु छगु सूचनाय् राष्ट्रिय सभाया बैठक माघ १७ गते च्वनिइगु धका उल्लेख याउगु दु।

उगु बैठक वंगु माघ २ गते आइतवाः सूचनापाखे मेगु सूचं मवःतलेया लागि स्थगित याउगु खः। ‘राष्ट्रिय सभा नियमावली २०७५ या नियम ६ या उपनियम (१) बमोजिम सम्माननीय अध्यक्षजुं २०७८ साल माघ १७ गते सोमवाः न्हिनय् १ः०० बजे बैठक च्वनिइगु कथं निर्धारण यानादीगु व्यहोरा माननीय सदस्यपिन्त जानकारीया लागि थुगु सूचं प्रकाशन यानागु दु’, धका सूचं पिकाउगु खः।

वंगु २४ घण्टाया दुने देयन्यक ८ हजार १७ म्हेसित कोरोना भाइरस (कोभिड–१९) या संक्रमण पुष्टि जूगु दु।

अथेहे १५ म्हेसिगु ज्यान वंगु दु। स्वास्थ्य मन्त्रालयया कथं १५ हजार ७३६ म्हेसिगु पीसीआर परीक्षण याउगुलि ५ हजार ८१६ म्हेसित व ६ हजार ७२ म्हेसिगु एन्टीजेन परीक्षण याउगुलि २ हजार २०१ म्हेसित याना ८ हजार १७ म्हेसित कोरोना भाइरस (कोभिड–१९) या संक्रमण पुष्टि जुगु दु।

वंगु २४ घण्टाय् ५ हजार २९२ म्ह कोरोना संक्रमण मुक्त जुगु दु। आःतक देयन्यक ९० हजार ५७६ म्ह सक्रिय संक्रमितपि दु।

लगातार घटे जुया वनाच्वंगु शेयर बजाः कारोबार वाःया लिपागु दिं थौं सामान्य थहावंगु दु।

शेयर बजाः परिसूचक नेप्से थौं बिहीवाः ३ दशमलव २९ अङ्कं थहावना २ हजार ७ सय ७९ दशमलव ९३ विन्दुइ थहावंगु दु।

थौं निर्जीवन बीमा समूहया शेयर दकलय् अप्पो १ सय ३२ अङ्कं थहावंगु दु। फाइनान्स, जलविद्युत्, उत्पादन, मेमेगु समूहया शेयर सामान्य थहावंगु दु।

फाइनान्स समूहया शेयर १४, जलविद्युतय् ५, उत्पादनय् २५ व मेमेगु समूहया शेयर १७ अङ्क थहावंगु दु। थौं ६६ लाख ७५ हजार कित्ता शेयर ३ अर्ब ३४ करोड रुपैयाँया कारोबार जुगु खः।

दकलय् अप्पो नेशनल लाइफ इन्स्योरेन्सया २० करोड रुपैयाँया शेयर किनबेच जुगु खः। विन नेपाल लघुवित्त व बुद्धभूमि हाइड्रोया शेयर थौं न १० प्रतिशतं थहावंगु दु।

सप्तकोसी विकास बैंकया शेयर धासा ४ प्रतिशतं घटे जुगु खः।

लुँ तोलां थौं गुसः घटे जुगु दु । थौं तोला गुसः घटे जुया ९३ हजार ५०० रुपैयाँ तोके याउगु दु धका नेपाल सुनचाँदी व्यवसायी महासंघ धाउगु दु।

अथेहे तेजाबी लुँ तोलाया ९३ हजार रुपैयाँ तोके याउगु दु।

अथेतु, थौं वहः न तोेलां झीतका घटे जुगु दु। वहः तोलां झीतका घटे जुया थौं १ हजार २९० रुपैयाँ कायम जुगु दु धका महासंघं धाउगु दु।

धरानय् थप निम्ह कोरोना संक्रमितपि मन्त।

सुनसरीे धरान नगरपालिका–११ या ४५ दँ दुम्ह व धरान नगरपालिका–१५ या ७२ दँ दुपि निम्ह मिजंपि सीउगु खः।

बीपी कोइराला स्वास्थ्य विज्ञान प्रतिष्ठानया कथं ४५ दँ दुम्ह मिजंम्ह बुधबाः चान्ह्यः ८ः४० बजे व ७२ दँ दुम्ह मिजंम्ह बिहीबाः सुथय् ७ः४० बजे सीउगु दु धका धाउगु दु।

प्रतिष्ठानया कथं ४५ दँ दुम्ह मिजंम्ह माघ ६ गते व ७२ दँ दुम्ह मिजंम्ह माघ ९ गते कोरोना पुष्टि जुगु खः।