सिके राउत नेतृत्वया जनमत पार्टीया कार्यकर्तापिन्स सर्लाही हरिवन नगरपालिकाया मेयर च्वनावंगु  गाडी जनकपुरय् तोडफोड याना बिउगु दु।

उगु झ्वलय् मेयर गणेश प्रसाईं घाःपाः जुगु दु। गाडीइ मेयर गणेश प्रसाईं व उपमेयर रेनुका पौडेल च्वना वंगु खः। उपि राष्ट्रिय सभा निर्वाचनय् मत कुर्केत जनकपुरधाम वनाच्वंगु खः।

सिके राउतया कार्यकर्तापिन्स जनकपुर–४ य् गाडीया न्ह्याय्कं तछ्याना बिउगु खः।

डा. सीके राउत नेतृत्वया जनमत पार्टीया नेता–कार्यकर्तापिन्स थौं सुथंनिसे जनकपुरधामय् प्रदर्शन याउगु दु।

थौं १० बजे राष्ट्रियसभा सदस्य निर्वाचनया मतदान केन्द्र वनिइपि प्रवेश यायेत स्वंगुलि प्रहरी व प्रदर्शनकारीपि दथुइ झडप जुगु दु।

प्रहरीं स्थिति नियन्त्रण कायेगु निति १८ सेल अश्रुग्यास प्रहार याउगु दु धका धनुषाया प्रमुख जिल्ला अधिकारी सुरेन्द्र पौडेलं जानकारी बिउगु दु।

आः स्थिति सामान्य जूसा मेगु थासय् हाकनं प्रदर्शन जारी जुयाच्वंगु दु।

नेपालया जनगणना २ करोड ९१ लाख ९२ हजार ४८० थ्यःगु दु धका केन्द्रीय तथ्यांक विभागं धाउगु दु।

मिसापि १ करोड ४९ लाख १ हजार १६९ व मिजंपि १ करोड ४२ लाख ९१ हजार ३११ म्ह दु धका धाउगु दु। वंगु जनगणनाय् नेपाःया जनसंख्या २ करोड ६४ लाख थ्य.गु दु धका धाउगु दु।

वंगु स्वया न्ह्यः जनसंख्या वृद्धिदर घटे जुगु दु धका विभागं धाउगु दु। विभागया कथं थुगु पटक ०.९३ प्रतिशत वृद्धिदर जुगु दु। जनघनत्व १९८ प्रतिवर्ग किलोमिटर दु ।

विभागया कथं विदेशय् च्वनाच्वपि नेपाःमि २१ लाख ६९ हजार ४७८ दु।

राष्ट्रिय सभा निर्वाचनय् सहभागी जुइगु निति दाङको घोराही वयाच्वंगु गाडी दुर्घटना जुया लुम्बिनी प्रदेश सभाया सदस्य घाइते जुगु दु।

प्रदेश सभा सदस्य तुलसी चौधरी घाइते जुगु खः। वयाउगु ल्हातय् सामान्य घाःपाः जुगु धका जिल्ला प्रहरी कार्यालय दाङया प्रवक्ता मुकुन्दप्रसाद रिजालं जानकारी बिउगु दु।

चौधरी गयावंगु बा २ झ ३४४४ स्कारपिओ गाडी गढवा गाउँपालिकाया कालाकाटे नाप ट्रकय् न्याउगु खः।

किपू नगरयात सांस्कृतिक संरक्षित क्षेत्र कार्यान्वयनया लागि दयेकूगु ऐन अन्तर्गत उपपरिषद् नीस्वनेत छगू कार्यदल दयेका ज्या न्ह्याकाच्वंगु दु । वंगु पुस २८ गते किपू नगरपालिकाया प्रमुख रमेश महर्जनया अध्यक्षता च्वंगु छगू मुँज्यां उगु कार्यदल दयेका ज्या न्ह्याकूगु खः।

थ्वहे झ्वलय् वंगु माघ ७ गते नगर प्रमुख महर्जनया हे अध्यक्षता च्वंगु उगु कार्यदलया मुँज्यां छवाःदुने सम्बन्धित क्षेत्रय् क्रियाशील प्रथाजन्य संस्था, खलःतय्गु नां धलः दयेकेगु क्वःछ्यूगु दु । अथेहे कार्यदलय् दुपिंसं हे सम्बन्धित वडाअध्यक्षलिसें समन्वययाना उगु धलः दयेकेगु जिम्मा ब्यूगु दु।

जिम्मा बिउगु कथं वडा नं. १ य् श्रीकृष्ण महर्जन, वडा नं. २ य् बुद्धिलाल ज्यापु, वडा नं. ३ य् सुविन्द्र नारायण महर्जन, वडा नं. ४ य् अर्जुन नेपाःमि, वडा नं. ५ य् रामभोला महर्जन, वडा नं. ६ य् उज्ज्वल महर्जन, वडा नं. ७ य् किपू नगरपालिकां हे समन्वय यायेगु खँ क्वःछ्यूगु दु।

अथेहे वडा नं. ८ य् जीवन महर्जन, वडा नं. ९ य् प्रयागमान प्रधान व वडा नं. १० य् डा. वज्रमुनी वज्राचार्ययात माःगु समन्वय यानाः प्रथाजन्य संस्था, खलःया नां धलः दयेकेगु जिम्मा ब्यूगु क्वःछ्यूगु दु।