थौं बिहीवाः शेयर बजाःया परिसूचक नेप्से घटे जुगु दु।

नेप्से थौं ३२ दशमलव ३९ अङ्कं घटे जुया २ हजार ७ सय ६९ दशमलव १३ विन्दुइ कुहावंगु दु। दक्को समूहया शेयर घटे जूसा विकास बैंक, जलविद्युत्, बीमा व उत्पादन समूहया शेयर यक्को कुहावंगु दु।

२ सय २४ कम्पनीया ९८ लाख ६२ हजार कित्ता शेयर ६ अर्ब २७ करोड रुपैयाँ कारोबार जुगु दु। दकलय् अप्वो नेपाल टेलिकमया ६० करोड रुपैयाँया शेयर किनबेच जुगु दु।

मैलुङ खोला जलविद्युत् कम्पनीयो शेयर दकलय् कम ५ प्रतिशतं घटे जुगु दु। समग्र बजार घटे जूसा मानुषी लघुवित्त व तेह्रथुम पावर कम्पनीया शेयर धासा १० प्रतिशतं थहावंगु दु।

लुँया भाः थौं तोलां निसः थहावंगु दु।

थौं तोलां निसः थहावना ९४ हजार ५ सय रुपैयाँ थ्यंगु दु धका नेपाल सुन चाँदी व्यवसायी महासङ्घं धाउगु दु।

अथेहे वहः धासा स्थिर जुगु दु। वहः म्हिगः थे तोलाया १२ सय ८० रुपैयाँ कारोबार जुगु दु धका महासङ्घं धाउगु दु।

यलया कात्ती प्याखंया लिपागु दिं नृसिंह अवतार क्यनाः क्वचागु दु।

वंगु कात्तिक २४ गतेनिसे क्यंगु थुगु कात्ती प्याखं न्ह्यागु खः। म्हिगः चान्ह्यः नृसिंह अवतार क्यनाः क्वचायकूगु खः।

वि.सं. १६९७ य् यलया जुजु सिद्धिनरसिंह मल्लं देय् व जनताया कल्याणा जुइगु कथं थुगु प्याखं न्ह्याकूगु खः।

न्हापा न्हापा थुगु कात्ती प्याखं कात्तिक महिना ज्वःछि न्ह्याकेगु याइ।

वंगु २४ घण्टाया दुने देयन्यक २९९ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ७ हजार ८६३ म्हेसिगु पीसीआर परीक्षण याउगुलि २७२ म्ह व ३ हजार २८८ म्हेसिगु एन्टिजेन परीक्षण याउगुलि २७ म्ह याना २९९ म्हेसित संक्रमण पुष्टि जुगु दु।

अथेहे २४ घण्टाय् कोरोना संक्रमणमुक्त जूपि २६० म्ह दु सा संक्रमणया कारण खुम्ह सीउगु दु।

स्वास्थ्य तथा जनसंख्या मन्त्रालयया कथं थौं दकलय् अप्वो येँ ९०, यलय् २५, झापाय् २१, मोरङय् १५, रुपन्देहीइ १३, चितवनय् १२ व कास्कीइ झीम्हेसित संक्रमण पुष्टि जुगु दु।

सर्वोच्च अदालत बार एशोसिएसनया अध्यक्ष पूर्णमान शाक्यं गोला प्रथा वा छु नामय् प्रधानन्यायाधीश चोलेन्द्र शम्शेर जबरायात वैधता बिइगु कुतः जूसा माने जुइफइ मखु धका धाउगुु दु।

बिहीबाः नेपाल बार परिसरय् ग्वसाः ग्वंगु ज्याझ्वलय् शाक्यं प्रधानन्यायाधीश जबरा बिनावंगु निभाः धका धका धासे जबरायात साथ बिइपिन सिधइ धका दावी याउगु दु।

सर्वोच्च अदालतय् गोला प्रथापाखे पेशी तोक े याना मुद्दाया सुनुवाइ यायेगु विषय न्यायाधीशपि दथुइ छलफल जुगु इलय् अन्दोलन यानाच्वंपि कानुन व्यवसायीया पाखे अध्यक्ष शाक्यं प्रधानन्यायाधीशयात तिबः जुइगु कथं छुु न पलाः ल्ह्वन धासा स्वीकार्य जुइ मखु धका धाउगु दु।