राष्ट्रिय जनगणना २०७८ या प्रारम्भिक विवरण थौं सार्वजनिक यायेत्यंगु दु। केन्द्रीय तथ्याँक विभागं थौं सुथय् १० बजे लिपा विवरण सार्वजनिक यायेत्यंगु दु।

प्रारम्भिक नतिजाय् मिसा व मिजं नाप जम्मा जनसंख्या, विदेशय् नेपालीया जनसंख्या व नेपालय् जम्मा परिवार संख्या सार्वजनिक यायेत्यनागु धका विभागया उपनिर्देशक हेमराज रेग्मीं जानकारी बिउगु दु।

आः प्रारम्भिक जक वइगु व खुलालिपा विस्तृत नतिजा सार्वजनिक जुइ धका वयकलंं धयादीगु दु। विभागं भदौ ३० गतेनिसे असोज १८ तक छेँ व नाप छेँ परिवारया सूचीकरण याउगु खःसा कात्तिक २५ निसे मंसिर ९ गते तक मुख्य जनगणनाया याउगु खः। 

राष्ट्रिय सभाय् १९ सदस्यपिनिगु लागि थौं न्ह्यगू हे प्रदेशय् निर्वाचन जुइत्यंगु दु।

थौं सुथय् ९ बजे निसे न्हिनय् ३ बजेतक मतदानया व्यवस्था यानागु दु धका निर्वाचन आयोगं धाउगु दु। वइगु फागुन २० गते नेकपा एमालेया च्याम्ह, नेकपा एकीकृत समाजवादीया प्यम्ह, नेकपा माओवादी केन्द्रया प्यम्ह व नेपाली कांग्रेसया स्वम्ह राष्ट्रियसभा सदस्यपिनिगु पदावधि क्वचायत्यंगुलि निर्वाचन जुइत्यंगु खः।

अथेहे प्रदेश १ स्वम्ह, मधेस प्रदेशय् निम्ह, बागमतीइ निम्ह, गण्डकीइ स्वम्ह, लुम्बिनीइ स्वम्ह, कर्णालीइ स्वम्ह व सुदूरपश्चिम प्रदेशय् स्वम्हयाना १९ गु पदया लागि निर्वाचन जुइत्यंगु खः।

नेपालभाषा साहित्य क्षेत्रया न्हापांम्ह गजलकार मोहनकाजी ७८ दँय् मन्त। ७८ दँ दुम्ह वयकः थः च्वनाच्वंगु ज्ञानेश्वरया छेँय् हे मदुगु खः।

वयकःयात ताः ई न्ह्यःनिसें दम व पिसाब सम्वन्धि ल्वचं कयाच्वंगु दुगु खः। थीथी इलय् वयकःयात शहिद गंगालाल राष्ट्रिय हृदय रोग केन्द्र, सुमेरु अस्पताललिसें थीथी थासय् वासः नं याःगु दुगु खः। वयकःया अन्त्येष्टिं पशुपतिइ विद्युतीय शवदाह गृहलय् क्वचाःगु दु।

मदुम्ह मोहनकाजीयात वयकःया किजा हरिओम पति (आर.के. निर्मल) राजोपााध्यायं मि तयादीगु खः। साहित्य ख्यलय् मोहनकाजी कथं म्हस्यूम्ह वयकःया धात्थेंया नां लम्बोदर पति राजोपाध्याय खः।

वयकलं २०४२ सालय् भचा भचा नामं थःगु याकः च्वसाय् गजल एल्बम पिथनादीगु खः। नेपालभाषाया संगीत ख्यलय् थ्व हे न्हापांगु गजल म्येचाः खः । वयां लिपा याउँक च्वने, भयब्यूगु यौवन लिसें थीथी म्येचालय् वयकलं च्वयादीगु म्येत पिदंगु दु। नकतिनि सार्वजनिक जूगु राजेन्द्र श्रेष्ठं हालादीगु म्ये ‘मूसःगु अयलाः’ नं वयकलं हे च्वयादीगु खः।

किपू नगरपालिकाय् राष्ट्रिय परिचयपत्रया लागि दर्ता यायेगु ज्या थौंनिसे न्ह्याःगु दु।

थौं छगु ज्याझ्वः दथुइ राष्ट्रिय परिचयपत्र तथा पञ्जीकरण विभागं किपू नगरपालिकाय् राष्ट्रिय परिचयपत्रया लागि दर्ता यायेगु ज्या न्ह्याकूगु खः। किपू नगरपालिकाया मेयर रमेश महर्जनं टोकन सिस्टमय् न्हियां न्हिथं ४० म्हसिगु नां दर्ता यायेगु धका धयादिगु खः।

वय्कलं अत्यावश्यक जूपिं नागरिकयात राष्ट्रिय परिचयपत्र दर्ताया लागि विशेष प्राथमिकता बिइगु नं धयादिल। किपू नगरपालिकां नगरबासीतय्त राष्ट्रिय परिचयपत्र दर्ताया लागि नेपाली नागरिकताया सक्कल प्रमाणपत्र ज्वनाः वयेत इनाप याःगु दु।

स्वनिगलय् थप ६ हजार १७२ म्हेसित कोरोना संक्रमण पुष्टि जुगु दु।

स्वास्थ्य मन्त्रालयया कथंथौं येँ थप ४,८७५ म्हेसित कोरोना सक्रमित जुगु दु। अथेहे, यलय् ७८२ म्ह व ख्वपय् ५१५ म्हेसित कोरोना संक्रमण पुष्टि जुगु दु।

अथेतु, स्वनिगः पिने मोरङय् ४४२, कास्कीइ ३११, सुनसरीइ २९१ व रुपन्देहीइ २२३ म्हेसित कोरोना संक्रमण पुष्टि जुगु दु। काभ्रेय् २१२, कैलाली व झापाय् १६७÷१६७, चितवनय् १५०, बाँकेय् १२१ व मकवानपुरय् १०६ म्हेसित कोरोना संक्रमण जूगु दु।

अथेतु, दाङय् ६७, कञ्चनपुर ५९, सुर्खेतय् ४८ नवलपरासी पूर्वय् ४६, सिराहाय् ४२, धनुषाय् ४४, पाल्पाय् ४०, स्याङजाय् ३७, नवलपरासी पश्चिमय् ३२, बर्दियाय् ३०, गोरखाय् २६, धादिङय् २५, सर्लाहीइ २३ व अर्घाखाँचीइ २२ म्हेसित कोरोना संक्रमित जूगु दु धका स्वास्थ्य मन्त्रालयं धाउगु दु।