Display Style:
Column Style
सम्पदा लागायात पर्यटनलिसे स्वायेमा : मेयर शाक्य
लहनान्यूज | ञंलाथ्व नवमी ११४१, भाद्र ३० बुधवाः
सम्पदा लागायात पर्यटनलिसे मस्वाय्गु जुसा सम्पदायात म्वाकातयेत थाकुइगु महानगर प्रमुख विद्यासुन्दर शाक्या धापू दु।
वडा १२या पुखसी महाद्यः मन्दिरया उलेज्या यासें वय्कलं मूर्त सम्पदायात जीवन्त तयातयेत अमूर्त सम्पदालिसें थुकिया प्रवद्र्धनया लागि पर्यटनलिसे स्वाय्माःगुलि बः बियादिल। सांस्कृति पर्यटनपाखें सम्पदा क्षेत्र म्वाकातयेत माःगु ध्येबा चुलाइगु स्थानीयपिनिगु आय आर्जनय् तकं वृद्धि जुइगुलिं नं सम्पदायात पर्यटनलिसे स्वाय्माःगु मेयर शाक्यं ज्यावलय् धयादिल।
वय्कलं न्हापा बैंक त्यासा मबिइगु थासय् आः वया त्यासा बिइगु जूगु धासें चीचीधंगु प्रयासपाखें याइगु ह्यूपालं समृद्धि हयेत ताः लाइगु धयादिल। उगु वलय् वडा १२ या अध्यक्ष विकास डंगोलं पुखुसी महाद्यःया चर्चा अप्वःयावंगु धयादिल।अथेहे वडा २१ या अध्यक्ष उदय चुडामणि बज्राचार्यं विकासया विरोध याइपिन्त म्हसिकेमाःगु अवस्था वःगु धयादिल।
उपाकु, पचली भैरवया जात्रा, गथु प्याखँ थेँ जाःगु जात्रा व सांस्कृतिक उत्सवय् थुगु महाद्यःया मन्दिर चाहिलेगु चलन दयाच्वंगु दु। थुगु मन्दिर गुलि पुलाँगु धैगु आःतकं सीदूगु मदुनि। स्थानीय निरोज खड्गीया कथं ०३९ साल न्ह्यः सतकया लिकसं शिवलिङ्ग दूगु खः तर सतक विस्तार जुयावसेंलि थ्व द्यः सतक दथुई लाःगु वय्कलं धयादिल। वयांलिपाः मन्दिर दयेकल व नन्दीया स्थापना न जूगु खः।आः पुखुसी टोल सुधार समितिं थुकिया संरक्षण यानाच्वंगु दु।
येँ थप २९४ म्ह कोरोना सक्रमित पुष्टि
रसिया श्रेष्ठ | ञंलाथ्व नवमी ११४१, भाद्र ३० बुधवाः
स्वास्थ्य तथा जनसंख्या मन्त्रालयया कथं थौं येँ जक २९४ म्हेसित कोरोना सक्रमित जूगु दु।
अथेहे झापाय् १२७, मोरङय् १११, कास्कीइ ७६ व सुनसरीइ ६६ म्हेसित कोरोना संक्रमण पुष्टि जूगु दु।
यलय् ६२, रुपन्देहीइ ५४, ख्वपय् ४८, चितवनय् २८, काभ्रेपलाञ्चोकय् २६, जुम्ला व कैलालीइ २०÷२० म्ह, नवलपरासी पुर्वय् १५, मकवानपुर व दाङय् १४÷१४ म्ह, नुवाकोटय् १३, गोरखाय् १२ व बर्दियाय् ११ म्हेसित कोरोना संक्रमण खनेदुगु दु धका मन्त्रालयं धाउगु दु।
देयन्यक थप १,७६० म्ह कोरोना संक्रमण पुष्टि
रसिया श्रेष्ठ | ञंलाथ्व नवमी ११४१, भाद्र ३० बुधवाः
वंगु २४ घण्टाया दुने देयन्यक थप १,७६० म्हेसित कोरोना भाइरस संक्रमण पुष्टि जूगु दु।
स्वास्थ्य तथा जनसंख्या मन्त्रालयया कथं १२ हजार ५२४ म्हेसित पीसीआर परीक्षण यागुलि १,३३२ म्ह व ४,३२० म्हेसित एन्टिजेन परीक्षणय् ४२८ म्ह याना १,७६० म्हेसित संक्रमण जूग्ु दु धका धाउगु दु।
थौं बुधबाः थपे जूपि नाप नेपालय् कोरोना संक्रमित जूपि ७ लाख ८० हजार ८२४ म्ह थ्यंगु दु।
अथेहे नेपालय् सीपि १० हजार ९९१ म्ह थ्यंगु दु सा ७ लाख ४३ हजार ५२६ म्ह संक्रमणमुक्त जुइ धुकुगु दु।
गण्डकी प्रदेशय् तुयुम्ह लापाचाया हुनिं विरामी अप्वःल
ञंलाथ्व नवमी ११४१, भाद्र ३० बुधवाः
गण्डकी प्रदेशय् तुयुम्ह लापाचाया हुनिं मिखाय् संक्रमण जुया अस्पताल थ्यनिपिं विरामी अप्वःगु दु ।
सिजनल हाइपर एक्युट पनु भिआइटिस व सापु धाइगु थुगु समस्या गण्डकी प्रदेशय् भदौ निगूगु वालंनिसें खनेदूगु खः । तुयुम्ह लापाचाया धु मिखाय् लाःगु हुनिं ४म्हसिया मिखाया ज्योति तकं तंगु दु ।
१५न्हूया ई दुने पोखरास्थित हिमालय आँखा अस्पतालय् जक ३०म्ह थुकथंया विरामी वःगु अस्पतालं न्ह्यथंगु दु । विशेष याना मनसुन अन्तिमपाखे खनेदइगु थुगु लापाचाया म्हय् हाकुगु धर्सो दइगु याः ।
उगु तुयुम्ह लापाचाया धु मिखाय् लाःसा ख्वबि गंकाबिइगु चिकित्सकं न्ह्यथंगु दु । सुरुइ मिखा मस्याइगु, मिखा ह्याँवुइगु व बुलुहुँ पिप जमे जुयावनेधुंका दृष्टि तनिगु याः ।
२०३२ सालय् न्हापांखुसिइ पोखरा क्षेत्रय् खनेदूगु थुगु ल्वचं मस्त अप्वः लिच्वः लाःगु खनेदु ।
थौंनिसें जगणना न्ह्याइगु
ञंलाथ्व नवमी ११४१, भाद्र ३० बुधवाः
थौंनिसें १२क्वःगु राष्ट्रिय जनगणना न्ह्यायेत्यंगु दु ।
वंगु बैशाख निसें न्ह्याकेगु तयारी याःगु जनगणना कोभिडया हुनिं लिछ्यागु खः । जनगणनया न्हापांगु चरण अन्तर्गत थौं छेँ व छेँजःया सुचिकरण यायेत्यंगु दु ।
गुकिया नितिं केन्द्रिय तथ्यांक बिभागं ८द्वः व ५सःम्ह सुपरिवेक्षक खटे याःगु दु । सुचीकरणय् छेँजःया दुजःपिनि धलः मुनिगु जुइ । ७७गू हे जिल्लाय् छक्वःलं व छेँ लिसें छेजःया सुचिकरण यायेत्यंगु दु । धलःखय् छेँजःया बैंक खाता, ऋणय् पहुँच, ब्याबसायिक तालिम लिसेंया विषय नं दुथ्याकिगु जूगु दु ।
ब्यक्तिगत छेँया प्रकार, छेँया ल्याः , जा व छेँया प्रयोजन नं ध्वाथुइकिगु जूगु दुसा पशु पंक्षीया धलः नं मुनिगु जूगु दु । अथेहे सरकारी अनुदानय् दयेकुगु छेँ , सामुदायिक भवन, उकिया प्रयोजन, सरकारी ज्याकु भवन, ब्याबसायिक तथा प्राविधिक शिक्षा तालिम, द्यगः, बित्तीय संस्था, उद्योग, कलकारखानाया तकं धलः मुनिगु जूगु दु ।
सुचीकरण असोज १८ गते दुने क्वचाइगु विभागं न्ह्यथंगु दु । क्वजिनातःगु धलः कथं मूल जनगणना धाःसा कात्तिक २७ निसें मंसिर ९ तक्क न्ह्याइगु जूगु दु । थुगु इलय् ३९ द्वःम्ह गणकं प्रत्येक छेँजःलय् मू न्ह्यः न्यनिगु व सुपरिवेक्षकं प्रत्येक वडा ज्याकुथिइ वना सामुदायिक न्ह्यसः न्यनिगु जूगु दु ।
