वंगु २४ घण्टाया दुने देयन्यक थप ३७७ म्हेसित कोरोना भाइरस संक्रमण पुष्टि जुगु दु।

६ हजार ५ सय ५ म्हेसिगु पीसीआर परीक्षण याउगुलि ३३९ म्ह व २ हजार ६ सय ४४ म्हेसिगु एन्टिजेन परीक्षण याउगुलि ३८ म्ह याना ३७७ म्हेसित कोरोना भाइरस संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टा कोरोना संक्रमणं प्यम्ह सीउगु दु सा १७० म्ह कोरोनामुक्त जुगु दु।

सेयर बजाःया परिसूचक नेप्से झण्डै ७० अंकं थहावंगु दु।

लगातार निन्हुयक दोहोरो अंकं थहावना नेप्से थौं मंगलबाः ६९.२२ अंक थहावना २७८४.५८ बिन्दुइ थ्यंगु दु।

कारोबार जुगु खुगु कम्पनीया शेयर भाः सकारात्मक सर्किटय् वना न्ह्यगू कम्पनीया शेयर भाः ९ प्रतिशत स्वया अप्वो थहावंगु दु। थौं दोस्रोे बजारय् दुगु २२७ गु कम्पनीया १ करोड ९३ हजार २२१ कित्ता शेयर खरिद बिक्री जुगुलि कारोबार रकम ५ अर्ब ५२ करोड १६ लाख रुपैयाँ थ्यंगु दु।

उकि मध्ये १७१ गु कम्पनीया शेयर भाः थहावना १५ गु कम्पनीया जक शेयर भाः कुहावंगु दु। छगु जक कम्पनीया शेयर भाः ह्यूपाः वंगु मदु। महालक्ष्मी विकास बैंक, नेशनल हाइड्रोपावर कम्पनी व अपि पावर कम्पनीया शेयर लगानीकर्तापिन्त आकर्षण खंगु दु।

महालक्ष्मीया ३७ करोड २६ लाख, नेशनलया ३० करोड ४२ लाख व अपिको २३ करोड ३६ लाख रुपैयाँ स्वया अप्वो शेयर दोस्रो बजारय् खरिद बिक्री जूगु दु।

वरिष्ठ समाजसेवी शान्तलाल मुल्मीया मभित्रको म सफू बिमोचन जुगु दु।

नेपाःया गैरसरकारी क्षेत्रया अभियन्ता नाप समाजसेवाया न्ह्यलूवाः मुल्मीया आत्मवृत्तान्त पूर्व प्रधानन्यायधिस कल्याण श्रेष्ठ, भाषासेवी मल्ल के सुन्दर, मानवअधिकारकर्मी प्रा.कपिल श्रेष्ठ, साहित्यकार सुलोचना मानन्धर, समालोचक केशव दाहालपिन्स मंकाः कथं बिमोचन यानादीगु खः।

चालु आर्थिक दँया न्हापागु स्वलाय् नेपाल टेलिकमं खुद नाफा झण्डै ४९ प्रतिशत थहावंगु दु।

वंगु दँया न्हापागु स्वलाय् १ अर्ब ५१ करोड ७७ लाख रुपैयाँ खुद नाफा यागुलि थुगु दँया स्वलाय् ४८ दशमलव ९० प्रतिशत थहावना २ अर्ब २५ करोड ९९ लाख रुपैयाँ थ्यःगु दु धका टेलिकमं धाउगु दु।

साउन, भदौ व असोज न्हापागु दँ स्वया थुगु दँय् ७४ करोड २१ लाख रुपैयाँ अप्वो नाफा जुगु दु धका टेलिकमया रिपोर्टय् उल्लेख याउगु दु। अथेहे, वंगु दँया न्हापागु स्वलाय् १० अर्ब १० करोड ४४ लाख रुपैयाँ जुगु खःसा थुगु दँया न्हापागु स्वलाय् ८४ करोड ७८ लाख रुपैयाँ थहावना १० अर्ब ९५ करोड रुपैयाँ थ्यंगु दु।

अथेहे, वंगु आर्थिक दँया न्हापागु त्रैमासिक अवधिइ स्वया थुगु दँया त्रैमासिक सञ्चालन आय १ अर्ब १३ करोड रुपैयाँ थहावना ९ अर्ब ७७ करोड ५२ लाख रुपैयाँ थ्यंगु दु धका नेपाल टेलिकमं धाउगु दु।

फोर जी आयोजना विस्तार जुया ग्राहक अप्वोया, मोबाइल डाटा, भ्वाइस, एसएमएस सेवा तसकं थहावंगु दु।

लुँया भा म्हिगः छु भचा कुहावंसा थौं हाकन थहा वंगु दु।

थौं लुँ तोलां न्यासः थहा वंगु दु। लुँ तोलां न्यासः थहावना थौ ९४ हजार ८ सय रुपैयाँ थ्यंगु दु।

अथेहे वहः तोला झीतका थहावंगु दु। तोलां झीतक थहवना १२ सय ९० रुपैयाँ किनबेच जुगु दु।