स्वास्थ्य उपचार याना प्यला लिपा स्वदेश लिहावम्ह नेकपा माओवादी केन्द्रया नेता वर्षमान पुन ‘अनन्त’ नं थौं सुथय् पार्टी अध्यक्ष प्रचण्डनाप भेटघाट याउगु दु।

चीनं म्हिगः सोमबाः बहनि येँ थ्यक वम्ह पुन प्रचण्डयात थौं सुथय् खुमलटारय् निवासय् वना नापलाउगु खः। अथेहे नेता पुनं थःगु उपचारया लागि ग्वाहालि याउगुलि प्रचण्डयात सुभाय् न बिउगु खः।

अध्यक्ष प्रचण्डया कुतलं व परराष्ट्र मन्त्रालयया ग्वाहालि पूर्वमन्त्री पुन उपचारया लागि सुरुइ बैंकक व वयालिपा चीनय् वंगु खः।

राष्ट्रिय सभापाखे फागुन २० गतेनिसें खाली जुइगु १९गू पदया नितिं कन्हय् निर्वाचन जुइत्यंगु दु । इपिं पदय् ४३म्हेसिनं उम्मेदवारी ब्यूगु दु ।

राष्ट्रिय सभा निर्वाचनय् सत्ता गठबन्धनय् दुगु न्यागू दल गठबन्धन हे दयेकाः चुनावी मैदानय् दु । इमिसं निर्वाचनया नितिं पद इनेज्या यायेधुंकूगु दु । नेकपा एमालें धाःसा न्ह्येगुलिं प्रदेशय् थः उम्मेदवार न्ह्यज्याकूगु दु ।

फागुन २० गतेनिसें राष्ट्रिय सभाय् खाली जुइगु १९गू पदमध्ये ८गू पद एमालेपाखें खाली जुइ । निर्वाचन आयोगं ७म्ह मिसा, ३म्ह दलित, २म्ह अपांगता जूपिं व अल्पसंख्यक अले ७म्ह मेमेगु थीथी पुचः यानाः १९गू सिटया नितिं निर्वाचन याकेत्यंगु दु ।

निर्वाचनया नितिं न्ह्येगुलिं प्रदेशय् यानाः ४३म्ह उम्मेदवारपिन्सं उम्मेदवारी ब्यूगु आयोगं धागु दु । उकिमध्ये नेकपा एमालेपाखें १९म्ह, नेपाली कांग्रेसं ६म्ह, नेकपा माओवादी केन्द्रपाखें ५म्ह, नेकपा एकीकृत समाजवादीं ५म्ह, जनता समाजवादी पार्टी, नेपालं २म्ह, राष्ट्रिय प्रजातन्त्र पार्टीं २म्ह, नेपाल मजदुर किसान पार्टीपाखें २म्ह, लोकतान्त्रिक समाजवादी पार्टीपाखें १म्ह अले राष्ट्रिय जनमोर्चां १म्हेसिया उम्मेदवारी लाःगु दु ।

गठबन्धनय् दुपिं दलदथुइ जूगु सहमतिकथं एमालें त्याकूगु ८गू सिटय् कांग्रेसयात ३गू, जसपायात २गू, माओवादी केन्द्र, एकीकृत समाजवादी व जनमोर्चायात १÷१गू सिट चूलाइगु यानाः भाग इनेज्या याःगु दु । १९गू सिट खाली जुइबलय् भागबन्डाय् कांग्रेसया भागय् ६गू सिट, माओवादी केन्द्र व नेकपा एसयात ५÷५गू सिट अले जसपायात २गू व जनमोर्चायात छगू सिट चूलाइ ।

५९म्ह दुजःया राष्ट्रिय सभाय् आः नायःनाप एमालेया २४म्ह, न्वकूनाप माओवादीया १४म्ह, कांग्रेसया ७म्ह, एकीकृत समाजवादीया ७म्ह, जसपाया निम्ह, लोकतान्त्रिक समाजवादीपाखें छम्ह, स्वतन्त्र छम्ह अले मनोनित स्वम्ह दुजः दु ।

निर्वाचनय् स्थानीय तहया द्वछि ४सः व ९३म्ह अले प्रदेश सभाया ५सः व ३२म्ह यानाः जम्मा २द्व व २५म्ह मतदाता दु । निर्वाचनय् प्रदेश सभा दुजःया मतभार ४८क्व गाउँपालिका व नगरपालिका प्रमुख व उपप्रमुखया मतभार १८क्व जुइ ।

 

इपिडिमियोलोजी लिसें रोग नियन्त्रण महाशाखां हलियंक न्यनाच्वंगु कोभिड–१९ भाइरसया ओमिक्रोन भेरियन्टलिसें न्हूगु भेरियन्ट खनेदइगु जोखिम अप्वंगुलिं सावधानी नालाकाय्त इनाप याःगु दु ।

इपिडिमियोलोजी लिसें रोग नियन्त्रण महाशाखाया प्रमुख कृष्णप्रसाद पौडेलं ओमिक्रोन भाइरस थें अप्वः न्यनावन धाःसा अझ न्हूगु भेरियन्टया जोखिम अप्वइगु ख्याच्वः बिउगु दु ।

ओमिक्रोनं उत्परिवर्तन जुया वइगु न्हूगु भेरियन्ट ओमिक्रोन सिबें ग्यानापुइगु अवस्था नं जुइफइगु जुगुलिं निरन्तर सावधानी नालाकाय्त इनाप याःगु खः ।

थौंकन्हे न्हि २सःया हाराहारीइ संक्रमितयात सघन उपचार कक्षय् वासः यायेमाःगु व उकिमध्ये ३०म्हलिसें ४०म्हेसित भेन्टीलेटरया आवश्यक जूगु नं महाशाखां न्ह्यथंगु दु ।

नेकपा माओवादी केन्द्रया नेता वर्षमान पुन चीनय् उपचार याना थौं स्वदेश लिहावंगु दु।

थौं त्रिभुवन अन्तर्राष्ट्रिय विमानस्थलय् नारायणकाजी श्रेष्ठ लगायतया नेतापिन्स लसकुस याउगु खः।

स्वनिगलय् थप ४ हजार ६७६ म्हेसित कोरोना संक्रमण पुष्टि जुगु दु। स्वास्थ्य मन्त्रालयया कथं थौं येँ थप ३,६३४ म्हेसित कोरोेना सक्रमित पुष्टि जुगु दुु।

अथेहे यलय् ५८७ म्ह व ख्वपय् ४५५ म्हेसित कोरोना संक्रमण पुष्टि जुगु दु। अथेहे मेमेगु जिल्ला चितवनय् ७९०, कास्कीइ ३४३, झापाय् २०५ व सुनसरीइ १९७ म्हेसित कोरोना संक्रमण पुष्टि जुगु दु।

अथेहे रुपन्देहीइ १७१, मोरङय् १४६, नवलपरासी पूर्वय् १३७, मकवानपुरय् १२१ व काभ्रेपलाञ्चोकय् १०२ म्हेसित कोरोना संक्रमण पुष्टि जुगु दु।

अथेहे तनहुँइ ८७, बागलुङ व दाङय् ७३÷७३ म्ह, नुवाकोटय् ७०, कञ्चनपुरय् ५५, धनुषाय् ५४, बाँकेय् ४६, सिरहाय् ३८, पर्साय् ३७, बाराय् ३६, गोरखाय् ३५, बैतडीइ ३२, सिन्धुलीइ २९, सिन्धुपाल्चोकय् २८, पाल्पाय् २७, धादिङइ २५, लमजुङय् २४, दोलखाय् २३, महोत्तरी, सर्लाही व डडेल्धुराय् २२÷२२ म्ह व सप्तरीइ २० म्हेसित कोरोना संक्रमितपि थपे जुगु दु धका स्वास्थ्य मन्त्रालयं धाउगु दु।