वंगु २४ घण्टाया दुने देयन्यक थप ३०६ म्हेसित कोरोना भाइरस संक्रमण पुष्टि जुगु दु।

८ हजार ८ म्हेसिगु पीसीआर परीक्षण याउगुलि २९१ म्ह व १ हजार ५ सय ९८ म्हेसिगु एन्टिजेन परीक्षण याउगुलि १५ म्ह याना ३०६ म्हेसित कोरोना संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं खुम्ह सीउगु दु सा ३४८ म्ह कोरोनामुक्त जुगु दु। वंगु २४ घण्टाया दुने स्वनिगलय् थप १८७ म्हेसित कोरना संक्रमित जुगु दु।

थौं येँ १२६, ख्वपय् १८ व यलय् ४३ म्ह संक्रमितपि थपे जुगु खः।

फ्रान्सय तइगु वाङ्मय शताब्दीपुरुष सत्यमोहन जोशीया झ्वाता फ्रान्सय् तयेगु बारे फ्रान्सया मेयर व यल महानगरपालिकाया मेयर चिरिबाबु महर्जन दथुइ हस्ताक्षर जुइगु जूगु दु।

फ्रान्सय् देय्न्यंकंया मेयरतय् सम्मेलनय् मूपाहां कथं मेयर महर्जन उखे झाःगु खःसा थुकिया दथुइ शताब्दी पुरुष जोशीया झ्वाता अन तयेगु बारे समझादारी जुइत्यंगु धका धाउगु दु। फ्रान्सया छम्ह विशिष्ट व्यक्तिया झ्वाता नं यल महानगरपालिका दुने तयेगु तयारी जुयाच्वंगु खँ धाःगु दु ।

तर सुयागु झ्वाता तयेगु धइगु बारे स्पष्ट मजूनिगु खँ धाःगु दु। मेयर महर्जनं नेपाःया नीन्यागू स्वयां अप्वः स्थानीय तह व फ्रान्सया थीथी स्थानीय तह दथुइ भगिनी सम्बन्ध स्थापना यायेगु ज्याय् समन्वय याना वयाच्वनादीगु खः ।

शेयर बजाः परिसूचक नेप्से थौं थहावंगु दु। नेप्से थौं २६ दशमलव ४४ अङ्क थहावना २ हजार ७ सय १५ दशमलव ३५ विन्दुइ थ्यंगु दु।

दक्का समूहया शेयर थहावंगुलि विकास बैंक, उत्पादन, बीमा व माइक्रोफाइनान्स समूहया शेयर उच्च अङ्क कुहावंगु दु। २ सय २८ कम्पनीया ८६ लाख ३६ हजार कित्ता शेयर ४ अर्ब ७३ करोड रुपैयाँया कारोबार जुगु खः।

दकलय् अप्वो महालक्ष्मी विकास बैंकया ३५ करोड ४६ लाख रुपैयाँया शेयर किनबेच जुगु खः। बोटलर्स नेपाल, मानुषी लघुवित्त व तेह्रथुम पावर कम्पनीया शेयर १० प्रतिशतं थहावंगु दु।

समग्र बजार थहावंसा एभरेस्ट इन्स्योरेन्स कम्पनीया प्रमोटर शेयर व महालक्ष्मी विकास बैंकया शेयर ४ प्रतिशत स्वया अप्वो घटे जुगु दु।

थौं हरिबोधनी एकादशी, हिन्दू धर्मावलम्वीतय् भगवान विष्णुया आराधना व तुलसी विवाह यानाः थुगु दिं हनाच्वंगु दु ।

असार शुक्ल एकादशी अर्थात हरिशयनी एकादशीया दिनय् प्यूगु तुलसीया थौं इहिपा यानाबीगु चलन दु । तुलसीया मठयात छाय्पियाः पवित्र तीर्थस्थलया जलं तुलसीयात म्वःल्हुयाः तु, साः, वंगलसिमा वा पंया यःसिँलिसे तुलसीया इहिपा याकेगु चलन दु ।

तुलसीया इहिपाया कन्हय्कुन्हु द्वादशीया दिनय् तुलसी पूजनलिसें थुकिया विसर्जन याइ । हरिबोधनी एकादशीया दिनय् विशेष यानाः साखः, सकि, कन्दमूल व सिसाबुसा नयेगु चलन दु । तुलसी पुजनया विसर्जन धुंकाः चतुर्मास अपसं नं क्वचाइ । भगवान् विष्णु क्षीर सागरय् द्यनाच्वनीगु विश्वास याइगु थुगु प्यलाया इलय् इहिपा, व्रतबन्ध थुज्वःगु छुं नं भिंगु ज्या याइमखु ।

हरिबोधनी एकादशी धुंकाः धाःसा दक्वं कथंया मंगल अले भिंगु ज्या न्ह्याइ । हरिबोधिनी एकादशीयात दच्छिन्यंकया २४ एकादशीमध्ये दक्कले महत्वपूर्ण एकादशीया रूपं कायेगु याः । बोलीचालीया भाषाय् थुकियात तःधंगु एकादशी नं धाइ । महाभारतय् गबलें द्यांलानाः मच्वनीगु भीमसेन नं थुगु दिनय् अपसं च्वंगु धइगु न्ह्यथनातःगु दु ।

अय्जुयाः मेगु दिनय् व्रत च्वनेमफुपिन्सं नं तःधंगु एकादशीइ अपसं च्वनेमाः धइगु मान्यता दु । हिन्दू धर्मय् एकादशीयात भगवान् विष्णुया उपासना यायेगु दिंया रूपं काय । भविष्य पुराणय् थुगु एकादशीया महिमा न्ह्यथनातःगु दु ।

हरिबोधनी एकादशीया दिनय् नेपालया थीथी धार्मिक थासय् मेला जुइगु याः । येँया भुइजःसि, सुनसरीया बराह क्षेत्र, तनहुँया देवघाट, गुल्मीया रिडी, पर्वतया सेतीवेणीइ विशेष मेला जुइगु याः । स्वनिगःया प्यंगू दिशाय् दुगु चार नारायण देगः चाँगुनारायण, विशंखुनारायण, इचंगुनारायण व शेषनारायणय् नं थौं विशेष मेला जुइ ।

एकादशी अपसं च्वनेबलय् मनूतय्त गबलें नं संकट जुइमखु धइगु विश्वास दु । लिपांगु इलय् चिकित्सकीय मालेज्याय् नं उपवासं उसाँय्यात सन्तुलित याइगु पुष्टि यायेधुंकाः अपसं च्वनीपिं अप्वयावःगु दु ।

मध्यपुर थिमिइ नगरमा शंखधर पार्कया उलेज्या जूगु दु ।

येँ महानगरं नगर–नगर साझेदारी ज्याझ्वः अन्तर्गत उपलब्ध याकूगु आर्थिक ग्वहालिइ थिमिस्थित शंखधर चोकय् दय्कूगु पार्कया उलेज्या येँ महानगरया मेयर विद्यासुन्दर शाक्यं यानादीगु खः । महानगरया मेयर शाक्यं पार्क उलेज्या समारोहस नवासें स्वनिगःया १२ नगरपालिकायात सार्वजनिक जग्गा संरक्षण, हरियाली प्रवद्र्धन व पार्क दय्केत आर्थिक ग्वहालि यानागु जानकारी बियादिसे ‘उगु नगरपालिका क्षेत्र दुने धार्मिक अले पर्यटकीय पार्क लिसें बहुउद्देश्यीय क्यब दय्काच्वंगु दु।

शंखधर पार्क व हे मध्येया छगू खः’ शाक्यं धयादिगु दु, ‘येँ महानगरपालिकां आ. व. ०७७÷०७८ या स्वीकृत नीति तथा कार्यक्रम कथं थुकथं नगर–नगर साझेदारी न्ह्यानाच्वंगु दु।’ संघीय राजधानी जूगुलिं नं येँ महानगरं थः विकास व समृद्धिया लँय् न्ह्याःवनेबलय् मेगु नगरयात नं नापं ब्वनाः वनेमाःगु बिचाः शाक्यं तयादिल । शाक्यं विकास निर्माण व व्यवस्थापनया खँ ल्हासें याकःचा मखु, सहभागिता व सहकार्यं दिगो लक्ष्य ल्हातय् लाकेफइगुलिइ बः बियादिगु खः।

ज्याझ्वःयात सम्वोधन यासें मध्यपुर थिमि नगरपालिका मेयर मदनसुन्दर श्रेष्ठं येँ महानगरपालिकाया २ करोड व मध्यपुर थिमिया ४ करोड यानाः मुक्कं ६ करोड तका खर्च जूगु धका धयादीगु खः। ‘पार्क अझ नं दय्के सिमधःनि, अझं छुं लगानी याय्माली तिनि’, प्रमुख श्रेष्ठं धयादिल, ‘महानगरं थप आर्थिक ग्वहालि बीगु खँय् जिमिगु अपेक्षा कायम दनि ।’

महानगरया उपमेयर हरिप्रभा खड्गी श्रेष्ठं ‘येँ जिगु कर्म छेँ खः, ख्वप थःछेँ। जितः निगुलिं नगरया उत्तिकं हे समृद्धि स्वय् यः’ धका धायदीगु खः।