न्हापागु राष्ट्रिय ज्येष्ठ नागरिक दिवसया लसताय् थीथी ख्यलय् योगदान बिउपि व्यक्तित्वपिन्त अभिनन्दन यायेत थौं आइतबाः छगु ज्याझ्वः जुगु खः।

न्हापागु राष्ट्रिय ज्येष्ठ नागरिक दिवसया लसताय् समाजकल्याण परिषद्, राष्ट्रिय ज्येष्ठ नागरिक कोषं थौं शीतल निवासय् ग्वसाः ग्वंगु उगु समारोहय् राष्ट्रपति विद्यादेवी भण्डारीं वाङ्मय शताब्दी पुरुष सत्यमोहन जोशीनाप थीथी व्यक्तित्वपिन्त अभिनन्दन याउगु खः।

थौं अभिनन्दितजूपि वरिष्ठ पत्रकार भैरव रिसाल, कृष्णा ताम्राकार, अर्थविद् हिमालय शमशेर राणा, शिक्षासेवी नानीमैया श्रेष्ठ, साहित्यकार भद्रकुमारी घले, कलाकार कालु कुमाले व वीरगञ्ज महानगरपालिकाया उपप्रमुख शान्ति कार्कीपि खः।

अथेहे थीथी क्षेत्रपाखे ज्येष्ठ नागरिकया लागि सेवा बिउपि कलाकार मदनदास श्रेष्ठ, पूर्वसचिव कृष्णहरि बाँस्कोटा, पूर्वराष्ट्रसेवक मोहनबहादुर केसी, सामाजिक कार्यकर्ता प्रकाश गौतम, खेमराज उपाध्याय, बालकृष्ण थापामगर व जोगबहादुर महर्जनपिन्त सम्मान याउगु खः।

नेकपा माओवादी केन्द्रया नेता नारायणकाजी श्रेष्ठ प्रकाशं पार्टीया महाधिवेशन औपचारिकता पूरा यायेगु कर्मकाण्ड जक मखु धका धाउगु दु।

आइतबाः शुरु जुगु च्याक्वःगु राष्ट्रिय महाधिवेशनया उलेज्या ज्याझ्वलय् सम्बोधन यासे श्रेष्ठं धाउगु दु, थ्व न्हुगु विचार बहस, रुपान्तरित क्रान्तिकारी पार्टी निर्माणया महत्वपूर्ण अंगया रुपमा सम्पन्न यायेगु जुइ।’ वयकलं वाम लोकतान्त्रिक गठबन्धनया सहकार्य कम्तीइ न वइगु निर्वाचन तक यायेमा धका धाउगु दु।

नेकपा माओवादी केन्द्रया नेता मात्रिका यादवं पार्टीया नेतृत्व त्वत्ये धका धया सुख दइमखु अध्यक्ष पुष्पकमल दाहाल प्रचण्डयात धाउगु दु।

थौं आइतबाः पार्टीय च्याक्वःगु महाधिवेशनको उलेज्या ज्याझ्वलय् यादबं प्रचण्डं क्रान्तियात दथुइ त्वता वने मिले मजुगु धका टिप्पणी याउगु दु। ‘अध्यक्षजुं पत्रकारपिन्स न्यनकि, वयकलं धयादी जि त्वते मास्तिवः, आत्मकथा च्वय् मन दु’ वयकलं धयादी।

क्रान्तियात दथुइ लँ त्वता सू नेता वंगु दु ला? अवसरवादीपि जक वनिइ।’ ल्याम्हपि नेतृत्वय् वयेमाः धाइपि पुँजीवादी शैली खः धका यादवं धाउगु दु।

राष्ट्रियसभा सदस्यया लागि माघ १२ गते जुइगु निर्वाचनय् १२ राजनीतिक दलं भाग काइगु जुगु दु। राष्ट्रियसभा सदस्य निर्वाचनया प्रयोजन लागि १२ राजनीतिक दल दर्ता जुगु दु धका निर्वाचन आयोगया प्रवक्ता शालीग्राम शर्मा न जानकारी बिउगु दु।

आयोगं बिउगु जानकारी कथं, नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, राष्ट्रिय जनमोर्चा, नेपाल लोकतान्त्रिक पार्टी, जनता समाजवादी पार्टी, राष्ट्रिय प्रजातन्त्र पार्टी व नेपाल परिवार दलं दक्को प्रदेशय् भाग काइगु कथं दल दर्ता याउगु दु।

उगु निर्वाचनया लागि पुस २० गते उम्मेदवारपिन्स मनोनयन दर्ता जुइसा पुस २५ गते उम्मेदवारपिन्त निर्वाचन चिं लल्हाइ।

आदिवासी जनजाति पत्रकार महासंघ (फोनिज) यलया न्याक्वःगु जिल्ला अधिवेशन यलय् जूगु दु।

उगु जिल्ला अधिवेशनय् मूपाहाँ कथं महासंघया केन्द्रिय बरिष्ठ उपाध्यक्ष गजुरधन राई न छगु ज्याझ्वः दथुइ उलेज्या यानादीगु खः। बुद्ध योन्जनया सभाध्यक्षय् जुगु उगु ज्याझ्वलय् महासंघया केन्द्रिय दुजः नाप नेवाः पत्रकार राट्रिय दबूया बरिष्ठ उपाध्यक्ष नृपेन्द्रलाल श्रेष्ठ, पत्रकार दबूया अध्यक्ष सुरजबीर बज्रचार्य, महासंघ यलया सल्लाहकार सुनिल महर्जन, तामाङ्ग पत्रकार संघया साहिला तामाङ्गपि पाहाँ कथं झायादीगु खः।

आदिवासी जनजाति पत्रकार महासंघ (फोनिज) यलया न्याक्वःगु जिल्ला अधिवेशनं सन्जय श्रेष्ठयात सर्वसम्मत कथं अध्यक्षय् निर्वाचित जुगु दु। यलय् जूगु उगु न्याक्वःगु अधिवेशनय् श्रेष्ठयात नाप १३ म्ह कार्यसमिति सर्वसम्मत निर्वाचित जूगु खः। कार्यसमितिइ उपाध्यक्षय् प्रकाश थिङ, सचिवढय् सुनिता बटाजु, सह–सचिवय् शुभप्रभात राई व कोषाध्यक्षय् लक्ष्मी श्रेष्ठ निर्वाचित जुगु खः।

अथेहे दुजलय् सुजाता राई सम्झना महर्जन, किरण शाही, सनिराज शाक्य, अनुप शाक्य, राजन महर्जन, बाबुलाल स्याजतान निर्वाचित जुगु खः। अधिवेशनय् फोनिजयात एकताबद्ध, सुदृढ व सक्रिय याना वनेत दक्को फोनिजया सदस्यपिन्त अध्यक्ष श्रेष्ठं इनाप यानादीगु खः।