वंगु २४ घण्टाया दुने देयन्यक थप १८५७ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं ९४०९ म्हेसिगु पीसीआर परीक्षण यागुलि १५१६ म्हेसित व ३७६७ म्हेसिगु एन्टिजेन परीक्षणय् ३४१ म्ह याना १८५७ म्हेसित कोरोना संक्रमण पुष्टि जूगु दु।

अथेहे २४ घण्टाया दुने कोरोना भाइरस संक्रमणमुक्त जूपि २२२२ म्ह दु सा संक्रमणया कारण २७ म्हेसिगु ज्यान वंगु दु।

किपू नगरपालिका वडा नं. १ य् मिसापिन्त लक्षित ज्याझ्वः कथं मिसापिन्त म्हिगः शुक्रबाः निसे झोल सावः व ह्याण्ड वास दयकेगु तालिम शुरु यागु दु।

निन्हु तक जुइगु उगु तालिमय् ४० म्ह मिसापिन्स ब्बति कागु दु धका वडा अध्यक्ष हर्ष महर्जन धागु दु।

वडाया गलेश्वर महादेव स्थित सामुदायिक भवनय् जुगु उगु तालिमय् प्रमिला महर्जन व ज्ञानदेवी महर्जनं प्रशिक्षण बिउगु खः।

प्रधानमन्त्री शेरबहादुर देउवा व नेकपा (माओवादी केन्द्र) या अध्यक्ष पुष्पकमल दाहाल प्रचण्ड दथुइ भेटवार्ता जुगु दु।

थौं शनिबाः सुथय् प्रधानमन्त्री निवास बालुवाटारय् जुगु उगु  भेटवार्ताय् सरकार विस्तारया विषय छलफल जुगु धका माओवादी केन्द्रया अध्यक्ष प्रचण्डया सचिवालयं धागु दु।

सरकारयात गुलिफु उलि याकन पूर्णता बिइगु बारे खँ जुगु अध्यक्ष प्रचण्डया प्रेस सल्लाहकार विष्णु सापकोटं जानकारी बिगु दु। ताःईनिसे मन्त्रिपरिषद् विस्तार मजुया आलोचना जुगुलि सत्ता गठबन्धनया नेतापि सरकार विस्तारया तयारीइ जुयाच्वंगु खः।

येँ महानगरपालिका १६ वडा सोह्रखुट्टे सिद्धि गणेश द्यःया थाय् वनेगु लँय् ल्वं लायेगु व द्धाखाः दयकेगु ज्या क्वचागु दु।

बागमती प्रदेशया सांसद बसन्त मानन्धरया सांसद बिकाशकोषपाखे १८ लाख ३४ हजारया ग्वाहालि उगु ज्याझ्वः जुगु खः। थौं छगु ज्याझ्वः दथुइ सांसद बसन्त मानन्धरं उलेज्या यानादीगु खः।

श्री सिद्धि गणेश प्रबेशद्धार निमार्ण उपभोक्ता समिति गठनयाना उगु ज्या यागु खः।

उपभोक्ता समितिया कजि लक्ष्मण गमालया सभाध्यक्षताय् जुगु थौंया ज्याझवलय् १६ वडाध्यक्ष मुकुन्द्र रिजाल,सोह्रखुट्टे प्रहरी निरिक्षक प्रज्वल थपलिया व रिना थापा मानन्धरपिनिगु न उपस्थिति दुगु खः।

येँ महानगरया मेयर विद्यासुन्दर शाक्यं वडा २८ य् झीगु इच्छुमती पार्क व प्रदेशसभा सदस्य केशव स्थापितं शंकरदेव क्याम्पसपाखे प्रदर्शनी मार्ग स्वाइगु टुकुचा कोरिडोर शुभारम्भ यागु दु।

पार्क महानगरं निर्माण यागु खःसा कोरिडोर प्रदेशसभा सदस्य स्थापितं संसद कोषपाखे निर्माण यागु खः। पार्कया लागत ३७ लाख ७० हजार खःसा कोरिडोर करीब १ करोड ३८ लाख रुपैयाँ खः। कोरिडोर १ सय ४० मिटर लम्बाई दुगु खः।

उगु ज्याझ्वःया उलेज्या याये धुका येँ महानगरपालिकाया मेयर शाक्यं, छगु वडाय् छगु पार्क दयकेगु नीति कथं सार्वजनिक जग्गा संरक्षण याना अन पार्क दयकाच्वनागु खः धका धयादीगु खः। ‘बजेटया समस्या मदु। स्थानीय विवाद मजूसा न्ह्यागू ज्यायास अपू। जिमिसं टुकुचा खुसिइ जवं खवं वनेजिइक दयेका।’ शाक्यं विकास निर्माण व निर्माणय् विरोध यायेगु प्रवृत्तिइ खँ ल्ह्यायेगु तर ज्या मयाकेगु, ज्या जुलकि हाकन जस कायेत हानाथाप यायेगु चरित्र हावी दु धका धयादीगु खः।

वडा व वडानाप स्वागू सिमानाय् विकासया सन्दर्भय् मेयर शाक्यं धयादीगु दु, रानीपोखरीया न्हापागु चरणया ज्या सम्पन्न जुगु दु। दोस्रो चरणय् शान्तिवाटिका विकास यायेत्यनागु दु। वडा १ य् कमलपोखरीया न्हापागु चरणया ज्या क्वचाये धूकूगु दु। थुकिइ दोस्रो चरणया जुयाच्वंगु दु।

अथेहे प्रदेशसभा सदस्य स्थापितं, खुसि सिथय् कोरिडोर दयकेत सू नाप समन्वय यायेम्वा। टुकुचा कोरिडोर निर्माण यायेत समाज कल्याण परिषदया स्वामित्व माग यागुे सन्दभैय् वयकलं धयादीगु दु, ‘महानगरया विकासय् अवरोध यायेगु परिषदनाप समन्वय यायेगु मखु, सम्पत्ति महानगरं कागु विघटनया खँ ल्ह्वनेमाः।’ टुकुचाय् छेँ दयकूपिनिगु छेँ थुनेमाः। टुकुचा गन गन बाः वनाच्वंगु दु। अन अन कोरिडोर दयकेमाः। दरबार दुने न कोरिडोर दयकेमाः।’

पार्क निर्माण यायेत सार्वजनिक जग्गा पहिचान याना वडां १० लाख रुपैयाँ खर्च याना पखाः दयकागु खः।वडा २८ या अध्यक्ष भाइराम खड्गीं, भौतिक पूर्वाधार विकास विभागया डिजाइन व उपभोक्ता समितिया सक्रियतापाखे पार्क निर्माण यानागु धका धागु खः।