वरिष्ठ प्रगतिवादी साहित्यकार नाप प्रगतिशील लेखक संघया पूर्व अध्यक्ष आनन्ददेव भट्ट मन्त।

अल्जाइमर ल्वय् पाखे पीडित जुयाच्वम्ह भट्ट ८५ दँय् थौं सोमबाः सुथय् करिब ३ बजेति मदुगु खः। ताःई तक नेपाली साहित्य, प्राध्यापन व प्रगतिशील चिन्तनय् सक्रिय भट्टया काव्य, खण्डकाव्य, संस्मरण, समालोचना व निबन्धलगायतया विधाय् साढे २ दर्जन स्वया अप्वो कृति प्रकाशित जुइ धुकुगु दु।

वयकःया विशेषयाना ‘साइँलीमैया’, ‘आमा बोलाउँछिन्,’ ‘९७ साल’, ‘अब हिमाल बोल्छ’, ‘जनताको साहित्य’ लगायत कृति लोकप्रिय जु।

वि.सं १९९३ य् जुम्लाय्  जन्मे जुयादीम्ह भट्ट प्रगतिशील लेखक संघ व प्रगतिशील प्राध्यापक संघया पूर्वअध्यक्ष तक जुयादी धुकुम्ह खः।

वयकःयात थौं हे पशुपति आर्यघाटय् अन्त्येष्टि यायेत्यंगु दु।

भट्टया जहान व निम्ह काय्पि दु।

येँ महानगरपालिका लगायत स्वनिगः दुने सतक व चुकय् छु दिं न्ह्यनिसे मुनाच्वंगु फोहोर याकन हे व्यवस्थापन जुइ धका मेयर विद्यासुन्दर शाक्यं धयादीगु दु।

शाक्यं छु ई जथाभावि फोहोर वानमछ्वत नाप यागु दु। बञ्चरेडाँडाय् निर्माणाधिन स्यानिटरी ल्याण्डफिल्ड साइट व सिसडोल ल्याण्डफिल्ड साइटया स्थलगत रिपोर्टिङ याना लिहावये धुका मेयर शाक्यं सञ्चाःकःमिपि खँ ल्हायेगु झ्वलय अथे धयादीगु खः। शाक्यं छु दिं निसे वा वया सिसडोल ल्याण्डफिल साइट तक वनेगु लँ स्यना नियमित रुपं फोहोर व्यवस्थापनय् थाकुगु दु धका धयादीगु दु।

‘सिसडोल तक वनेगु लँ वया स्यनाच्वंगु खः। लँ स्यंगुलि फोहोर ज्वना वनिइगु गाडीयात न डोजरं घ्वाना च्वयथिकं यकेमाःगु अवस्था दु,’ मेयर शाक्यं धयादीगु दु, ‘थ्व हे कारण छु दिं बालाक्क फोहोर उठे याये मफुगु खः।’ मेयर शाक्यं आः याकन हे फोहोर व्यवस्थापन याना सफा यायेगु प्रतिवद्धता व्यक्त यानादीगु दु। सरकार नाप समन्वय याना फोहोर व्यवस्थापनया गुलिफु उलि याकन कुतः यायेगु जुइगु जानकारी बियादीगु दु।

‘मुख्य याना सिसडोलतक वनेगु लँय् अस्थायी सतक निर्माणया लागि जिमिसं विभागयात इनाप यानागु खः। जिमिसं लँ दयकेगु लागि खर्च यायेत न तयार दु। तर, अनयागु डिजाइन तयार यायेत जिमिसं सतक विभागयात इनाप यानागु दु। सहरी विकास मन्त्रालयनाप जिमिसं न्हापानिसे सहकार्य यानाच्वनागु दु।’ सहरी विकास मन्त्रालयं बञ्चरे डाँडाया ल्याण्डफिल्ड साइट याकन हे निर्माण सम्पन्न याना हस्तान्तरण यासां स्थायी रुपं फोहोर व्यवस्थापन याये फइ धका वयकलं धयादीगु दु।

बञ्चरे डाँडाय् स्यानिटरी ल्याण्डफिल्ड साइट निर्माण यायेत २०७६ बैशाख २२ गते दुने दच्छिया दुने ज्या सम्पन्न याना लुम्बिनी–कोशी एण्ड न्यौपाने जेभीनाप ठेक्का सम्झौता यानागु दु।

येँ महानगरपालिका वडा नं. २४ या मखं त्वाःया थीथी थासय् सीसी क्यामरा जडान यायेगु ज्या जूगु दु।

उगु सीसी क्यामरा जडान यायेगु लागि बागमति प्रदेश पूर्वाधार साझेदारी ज्याझ्वः अन्तर्गत बागमति प्रदेश सांसद राजेश शाक्यया बजेत उगु ब्यवस्था यागु खः।

समूहया अध्यक्ष सुजनविलास वज्राचार्यया सभाध्यक्षताय् जूगु उगु ज्याझ्वलय् मूपाहां प्रदेश सांसद शाक्यं जनताया करयात सही थासय् सदुपयोग याये कथं स्थानीयलिसे सहलह यानाः आवश्यकतायात ध्यानय् तयाः माः कथं ग्वाहालि याना वनेगु जुइ धका धयादिगु खः।

समूहया सचिव शैलेन्द्रविलास वज्राचार्यं लसकुस यानादीगु उगु ज्याझ्वलय् २४ वडाअध्यक्ष बालकृष्ण श्रेष्ठया नं उपस्थिति दुगु खःसा मखं बहाःया सचिव सागरमान वज्राचार्य, २४ या वडा सदस्य विनोद तुलाधरं नुगःखँ प्वंकादीगु खः।

मखं त्वाःया थीथी थासय् ताःई न्ह्यवंनिसें आपराधिक गतिविधि जुया वयाच्वंगुलिं सीसी क्यामराया जडानं अज्याःगु गतिविधि नियन्त्रण याये फइगु विश्वास प्वंकूगु दु।

जनता समाजवादी पार्टी (जसपा)या अध्यक्ष उपेन्द्र यादवं थःत मधेशया नेता धाइम्ह महन्थ ठाकुर प्रतिगमनया मतियार जुगु द्धपः बिगु दु।

महन्थ ठाकुर समूह संसद विघटन याम्ह केपी शर्मा ओलीया मतियार जुगु धक द्धपः बिगु खः। जसपां आइतबाः भैरहवाय् जूगु प्रदेशस्तरीय अभिमुखीकरण ज्याझ्वलय् न्ववायेगु झ्वलय् यादवं निकः तक संसद विघटन यागु ओलीं छम्हेसित हे निकः मृत्युदण्डया सजाय बिउगु धका टिप्पणी यागु खः।

‘त्रुटिपूर्ण व विभेदकारी संविधान संशोधन यायेमाः। सात प्रदेशया संरचना हिलेमाः,’ वयकलं धागु दु। राज्य पुनर्संरचना सच्ये यायेगु आवश्यक दु धासे यादवं धागु दु, तराई व पहाडया जिल्लायात मिसे याना प्रदेश दयकूलि हे समस्या जूगु धका धागु दु।

दक्को भाषाया सम्मान यासे विभेद व असमानताया अन्त्य यायेमाःगु आवश्यकता दु धासे वयकलं धागु दु, ‘पहाडया पासापिन्स मधेसया पासापिनिगु भाषण थुइके थाकू, थ्वे राज्य पुनर्संरचना गलत जुया जुगु खः।