वंगु २४ घण्टाया दुने देयन्यक ६ सय ७९ म्हेसित कोरोना भाइरसया सङ्क्रमण पुष्टि जूगु दु।

पीसीआर व एन्टिजेन याना १० हजार ९ सय २० म्हेसिगु नमुना परीक्षण याउगुलि ६ सय ७९ म्हेसित सङ्क्रमण पुष्टि जूगु दु धका स्वास्थ्य तथा जनसङ्ख्या मन्त्रालयं धाउगु दु।

अथेहे वंगु २४ घण्टाय् दुने १४०५ म्ह कोरोना सङ्क्रमणमुक्त जूगु दु। थ्व नाप आःतक ७ लाख ६९ हजार २२४ म्ह थ्यःगु दु। थौं थप न्ह्यम्ह कोरोना सङ्क्रमणया कारण सीउगु दु।

थ्व नाप नेपालय् सीपिनिगु ल्याः ११ हजार १६४ थ्यःगु दु।

नेकपा एमाले न पार्टीया न्हुगु लोगो व एप सार्वजनिक याउगु दु।

यलया गोदावरीइ जुगु विधान महाधिवेशनय् अध्यक्ष केपी शर्मा ओलीं लोगो व एप सार्वजनिक याउगु दु। एमालेया न्हुगु लोगोय्  सूद्यःया दथुइ ईचा व मुगः दु।

थ्व स्वया न्ह्यः सुद्यः दथुइ सीपीएन यूएमएल च्वया तथाय् आः इचा व मुथः तःगु खः। एपं सकल कार्यकर्तापिन्त छगु हे सञ्जालय् स्वायेत ग्वाहालि जुइ धका कार्यालय सचिव शेरबहादुर तामाङ जानकारी बिउगु दु।

वयकःया कथं न्हुगु सदस्यता एपपाखे काये फइ पार्टी न तोके यानातःगु शुल्क पुला नवीकरण याये फइ। वयकःया कथं पार्टीया निर्णय व अपानिपि एपपाखे सकल कार्यकर्तापिन्त छक्वल बिइगु धासे एपय् पार्टीया दक्को कमिटी, जनवर्गीय संगठनया प्रोफाइल दइ।

नेपाली कांग्रेसया येँ महानगरपालिका समितिया नेतृत्व चयनया लागि जुगु निर्वाचनया मतगणना शुरु जूगु दु।

शनिबाः उलेज्या जुगु येँ महानगरया अधिवेशन आइतबाः मतदान जुगु खः। सुथय् ९ बजेनिसे २ बजे तक मतदानया लागि ई क्वछिउगु खः।

निर्वाचनय् १३३९ मत कुहावंगु दु धका निर्वाचन समितिं धाउगु दु। येँ महानगरपालिका कांग्रेस सभापतिया लागि प्रगतिमान रञ्जित व नीलकाजी शाक्यं उम्मेदवारी बिउगु खः।

रञ्जित व शाक्य निगु हे प्यानल दयका चुनावी प्रतिस्पर्धाय् कुहावंगु खः। रञ्जित संस्थापन समूहया उम्मेदवार खःसा शाक्य वरिष्ठ नेता रामचन्द्र पौडेल समूहया समर्थन खः।

सरकारं ११ म्ह प्रमुख जिल्ला अधिकारी (सीडीओ)पि सरुवा याउगु दु। प्रधानमन्त्री शेरबहादुर देउवां जिल्ला डडेल्धुरा नाप सरकारं ११ जिल्लाया सीडीओपि सरुवा याउगु दु धका गृह मन्त्रालयं धाउगु दु।

गृहया कथं आःतक मन्त्रालयय् कार्यरत निम्ह सहसचिव व न्याम्ह उपसचिव याना १६ म्ह कर्मचारीपि ने सरुवा याउगु दु। इलाका प्रशासन कार्यालय टीकापुरय् कार्यरत मोहनराज जोशीयात डडेल्धुराय् छ्वंगु दु सा डडेल्धुराय् कार्यरत हरि प्रसाद घिमिरेयात गृह मन्त्रालय सिंहदरवारय् हःगु दु।

अथेहे मन्त्रालयं गृह मन्त्रालय कार्यरत सह–सचिव कमलराज ढकालयात जिल्ला प्रशासन कार्यालय भोजपुरय् सरुवा याउगु दु सा जयनारायण आचार्ययात जिल्ला प्रशासन कार्यालय कास्कीया सिडीओ दयकूगु दु। अथेहे कास्कीया सीडीओ थानेश्वर गौतमयात गृह मन्त्रालय हःगु दु सा त्रिभुन अन्तराष्ट्रिय विमानस्थलय् कार्यररत प्रमुख अध्यागमन अधिकृत सुशील वैद्ययात लमजुङया सीडीओ दयकूगु दु।

अथेहे डोटीइ शंकरबहादुर विष्ट, मुगुइ रोम बहादुर महत, मनाङय् रविन्द्र प्रसाद आचार्य, म्याग्दीइ चिरञ्जीवी राना, रसुवाय् नवराज जैसी, तेह्रथुमय् अनुज कुमार घिमिरेयात प्रमुख जिल्ला अधिकारी दयकूगु दु। लमजुङया सीडीओ होमप्रसाद लुईँटेल व रसुवाया सीडीओ इश्वरीप्रसाद ढकालयात गृह मन्त्रालयय् हःगु दु।

अथेहे इलाका प्रशासन कार्यालय चन्द्रनिगाहपुरया उपसचिव डोरेन्द्र निरौलायात जगन्नाथदेवल काठमाडौंया जेलर दयकूगु दु धका गृह मन्त्रालय धाउगु दु।

नेकपा एमालें केन्द्रनिसे टोल कमिटी तकया ल्याः निर्धारण याउगु दु। विधान महाधिवेशनपाखे एमाले न केन्द्रनिसे टोल कमिटी निर्माणय् सदस्य ल्याःतक निर्धारण याउगु दु।

२२५ म्ह सदस्यीय केन्द्रीय कमिटीया प्रस्ताव न्ह्यने यकां एमाले न प्रदेश कमिटी, उपत्यका विशेष प्रदेश कमिटी, जिल्ला, पालिका, वडा व टोल कमिटीया सदस्य ल्याः तक निर्धारण याउगु दु। प्रदेश कमिटीइ ५० म्हेसिगु ल्याः आधार माने याना व हरेक प्रतिनिधिसभा निर्वाचन क्षेत्रपाखे न्याम्ह न्याम्ह थपे याइ। उपत्यका विशेष प्रदेश कमिटीइ न ५० म्ह आधार माने याना प्रत्येक शाखापाखे न्याम्ह थपे याइ। जिल्ला कमिटीइ न ५० म्ह आधार माने याना प्रत्येक प्रदेश निर्वाचन क्षेत्रपाखे १५ म्ह थपे याइ।

पालिका तहया कमिटीइ न ५० म्हेसिगु आधार मानेयाना प्रत्येक वडापाखे न्याम्ह थपे याइ। वडा कमिटीया ल्या? न निर्धारण याउगु दु। महानगरं वडाय् १०१, उपमहानगरया वडाय् ८५, नगरपालिका÷गाउँपालिकाय्७५ सदस्यीय कमिटी जुइ। टोल कमिटीइ अप्वो ३१ म्ह सदस्यीय जुइ। दक्को कमिटीं कमिटीया छगु चौथाइ अप्वो मयासे सचिवालय दयकिइगु जुगु दु।

उपमहासचिव विष्णुप्रसाद पौडेलं हलय् प्रस्तुत याउगु प्रस्ताव पारित जुगु दु।