थौं तमु ल्होसार । गुरुङ समुदायं थौं हर्षोल्लासलिसें तमु ल्होसार नखः हनाच्वंगु दु ।

तमु धइगु खँग्वलं गुरुङ समुदाययात म्हसीकीसा ल्होसार धयागु न्हूदँ खः । थ्व निगू खँग्वः ल्वाकज्यानाः तमु ल्होसार जूगुलिं थौं गुरुङ समुदायया न्हूदँ खः ।

चिनियाँ पात्रो कथं दँय् १२ ला दइ । थ्व १२ ला जनावरया नामं तयातःगु दु । गुरुङ समुदायं थौंनिसें सादँयात विदा यानाः धुँदँयात लसकुस याइ । ल्होसारं किसानी जीवनशैली अले मौसम व प्रकृतिया निकटता प्रतिविम्बित याइ ।

ल्होसार नेपालय् जक मखसें तिब्बत, भुटान, भारत, म्यानमार, अमेरिका, अष्ट्रेलिया, बेलायतलिसेंया देशय् न्यनाः च्वनाच्वंपिं तमु समुदायं तःजिक हनेगु याइ ।

थ्व हे दथुइ, सरकारं गुरुङ समुदायया नखः तमु ल्होसारया लसताय् थौं सार्वजनिक विदा ब्यूगु दु । म्हिगः च्वंगु मन्त्रिपरिषद् मुँज्यां विदा बीगु निर्णय याःगु खः ।

थ्वहे लसताय् राष्ट्रपति विद्यादेवी भण्डारीं तमु ल्होसार नखलं सकल नेपाःमि दथुइ थवंथवय् सद्भाव, सहिष्णुता व बन्धुत्वया भावना थकाइगु धयादीगु दु ।

तमु ल्होसारया लसताय् भिंतुना हसना ब्युसें वय्कलं थुगु नखलं सकल नेपाःमि दथुइ न्हूगु उत्साह अले उमङ्ग ह्वलाः सभ्य, सुसंस्कृत व प्रगतिशील समाज दयेकेगु नितिं न्ह्यज्यायेत हःपाः बीमा धकाः मनंतुनादीगु दु ।

देय्या मौलिक सांस्कृतिक सम्पदाया संरक्षण अले संवद्र्धन यायेमाःगुलिइ बः ब्युसें राष्ट्रपति भण्डारीं साँस्कृतिक सम्पदां समृद्ध समाज दयेकेत ग्वहालि जुइगु धयादीगु दु ।

अथे हे, ल्होसारया भिंतुना ब्युसें प्रधानमन्त्री शेरबहादुर देउवां गुरुङ समुदायं हनीगु ल्होसार नखःया थःगु हे विशिष्ट म्हसीका दुगु धयादीगु दु ।

वंगु २४ घण्टाया दुने देयन्यक थप २२० म्हेसित कोरोना भाइरस पुष्टि जूगु दु।

६ हजार ४३३ म्ह पीसीआर परीक्षण याउगुलि २०३ म्ह व १ हजार १ सय ७५ म्ह एन्टीजेन परीक्षण याउगुलि ११ म्ह याना २२० म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् निम्ह सीउगु दु सा २५३ म्ह संक्रमणमुक्त याउगु दु।

शेयर बजाः परिसूचक नेप्से थौं बुधवाः सामान्य थहावंगु दु।

थौं नेप्से ५ दशमलव ५१ अङ्कं थहावना २ हजार ५ सय २४ दशमलव ५० विन्दुइ थ्यंगु दु। थौं व्यापार, विकास बैंक, फाइनान्स, जीवन बीमा व लगानी समूहया शेयर घटे जूसा मेमेगु समूहया शेयर सामान्य थहावंगु दु।

अथेहे २ सय २८ कम्पनीया ५६ लाख ३८ हजार कित्ता शेयर ३ अर्ब ६२ करोड ३४ लाख रुपैयाँ कारोबार जूगु दु। दकलय् हिमालयन डिस्टिलरीया ५२ करोड ५५ लाख रुपैयाँ शेयर कारोबार जूगु दु।

थौं मध्य भोटेकोसी जलविद्युत् कम्पनीया शेयर १० प्रतिशतं व नेपाल बङ्गलादेश बैंक शेयर ९ प्रतिशतं थहावंगु दु। नारायणी विकास बैंक शेयर धासा झन्डै साढे ३ प्रतिशतं घटे जुगु दु।

नेपाली कांग्रेसका नेता अर्जुननरसिंह केसीं पार्टीयात एकतावद्ध यायेत थःम्हेसिया नेतृत्वयात ग्वाहालि यायेत तयार दु धका धाउगु दु।

महाधिवेशनं कांग्रेसय् ध्रुवीकरण हःगु धासे सभापति शेरबहादुर देउवां एकताया लागि पार्टी दुने सकसित व्यवहार यायेमाः धका धाउगु दु।

वयकलं धाउगु दु छु ईलिपा हे स्वंगू हे तहया निर्वाचन जुइत्यंगुलि  पार्टीयात थप ध्रुवीकरण जुइपाखे बचे यायेमाः धका धाउगु दु। केसीं सभपातिया उम्मेदवार डा. शेखर कोइराला समूहयात न्यायोचित व्यवहार यायेमाः धका धाउगु दु।

‘पार्टी दुने प्रतिपक्षी भूमिकाय् जिपि दु । लोकतन्त्रय् मत विभाजन जुइ, तर मन विभाजन जुइ मज्यु,’ धका धासे, ‘राजनीति एजेण्डा जुइमाः, भागबण्डाय् मखु। तर अथे धासे आन्तरिक प्रतिपक्षयात न्यायोचित व्यवहार यायेमाःगु जरुरी दु ।’

स्वनिगः लिसें देय्या अप्वःथे थासय् वंगु चान्हय्निसें वा वयाच्वंगु दु ।

छुं दिं न्ह्यः मौसमय् बदली जुयावःगुलिइ वंगु चान्हय्निसें वा वयेगु न्ह्याःगु खः । थौं देय्न्यंक सामान्यनिसें पूर्ण बदली जूगु व यक्व थासय् हल्कानिसें मध्यम वा वयाच्वंगु जल तथा मौसम विज्ञान विभागं धाःगु दु ।

वा वःगुलिसें उच्चपहाडी अले हिमाली लागाय् प्वं गायेगु न्ह्याःगु दु । स्वनिगः व जःखःया क्षेत्रय् नं थौं सुथंनिसें वा वयाच्वंगु दु । स्वनिगःया तजाःगु गुँच्वकात फूच्व, शिवपुरी व भालचाय् नं प्वँ गायाच्वंगु दु ।

थौं न्हिच्छि व चच्छि नं छुं ई दीगु व हाकनं वा वइगु झ्वः न्ह्यानाच्वनीगु विभागं न्ह्यथंगु दु । वा व प्वं गायाः देय्न्यंकया तापक्रम नं ह्वात्त हे कुहांवंगु दुसा चिकूगु अप्वःबलय् जनजीवन थाकूगु दु ।

वाया हुनिं हवाई यातायात नं प्रभावित जूगु दु । मौसमविद्तय्सं उच्च पहाडी अले हिमाली लागाया जनजीवनय् प्रतिकूल लिच्वः लायेफुगु धासें सतर्कता नालेत धाःगु दु ।

विशेष यानाः पर्वतारोहणय् वंपिं सतर्क जुइमाःगु छ्याता ब्यूगु दु ।