क्रिश्चियन धर्मया संस्थापक येशु ख्रीष्ट जन्म जूगु दिंया लुमन्तिइ थौं थुृगु समुदायया मनूतयेसं हलिंयंक क्रिसमस डे हनाच्वंगु दु ।

थौं सिवें निद्वः व २१दँ न्ह्यः डिसेम्बर २५ तारिखया दिं येशु ख्रीष्टया जन्म इजरायलया वेथलेहेमय् जूगु खः । यशुं मुक्ति, मतिना व शान्ति बिइगु भलसाय् क्रिश्चियन समुदायं थुगु नखः हनेगु याः ।

क्रिसमसय् येशुया शिक्षा लिसें उपदेशया मनन यायेगु लिसें मतिना प्रकट याना भिन्तुना व द्वहःलपा कालबिल यायेगु याः । मनूयात मतिना याना वःगुलिं प्रेम दिवस, शान्ति पलिस्था यायेत शान्ति दिवस व मुक्ति बिइत वःगुलिं मुक्ति दिवसया रुपय् थौंया दिंयात हनेगु याःगु उमिगु धापू दु । 

दिवसया लसताय् विसं २०६३ निसें २०७४ तक्क सार्वजनिक बिदा बिउगु खः । थ्व लसताय्  विसं २०७५ निसें २०७७ तक्क धाःसा  क्रिश्चियन धर्मावलम्बीयात जक विदा बिउगु खः ।

थुगुसिइ धाःसा सकसित सार्वजनिक बिदा बिउगु दु । लिपांगु ई मू शहरया मू थासय् क्रिसमस ट्रि छायेपिइगु याःगु खनेदु ।

निर्वाचन आयोगं स्थानीय तहया निर्वाचन छक्वःलं वइगु वैशाख १४ गते यायेत सरकारयात प्रस्ताव याःगु दु ।

प्रधानमन्त्री शेरबहादुर देउवा लिसें मन्त्रीतयेलिसे शुक्रबाः जूगु सहलहस आयोगया पदाधिकारीतयेसं फुक्क स्थानीय तहया निर्वाचन छक्वःलं १४ वैशाखय् यायेत प्रस्ताव याःगु खः ।

खर्चय् मितव्ययिता, सुरक्षा व्यवस्थापनय् सहजता, मुक्कं निर्वाचन व्यवस्थापनय् सहजता व मतदाता शिक्षा सामग्रीइ एकरुपता जुइगु लिसें छगू थाय्या निर्वाचन लिच्वःलं मेगु थासय् प्रभावित मलाकिगु जूगुलिं छन्हूं हे व छगू हे चरणय् निर्वाचन यायेगु पायेछि जुइगु निर्वाचन आयुक्त दिनेश थपलियां धयादील ।

छुं नं हुनिं छन्हूं हे निर्वाचन यायेत सम्भव मजूसा १४ व २२ वैशाखय् याये फइगु आयोगं धाःगु दु । स्थानीय तह निर्वाचन ऐन, २०७३ या  व्यवस्था कथं स्थानीय तहया पदाधिकारीतये पदावधि ५ जेठय् क्वचायेत्यंगु दु ।

संविधानया धारा २२५ य् स्थानीय जनप्रतिनिधिया कार्यकाल क्वचागु ६ ला दुने निर्वाचन यायेमाःगु धाःसा नं स्थानीय तह निर्वाचन ऐन, २०७३ या दफा ३ कथं कार्यकाल क्वचाइगु सिवें २ला न्ह्यः हे निर्वाचन जुइमाःगु व्यवस्था दु ।

लिसें कार्यकाल क्वचायेधुंका स्थानीय तह सञ्चालन सम्बन्धी छुं नं स्पष्ट कानूनी व्यवस्था मदूगुलिं वैशाखय् चुनाव यायेत पायेछि जुइगु आयोगं धाःगु दु । लिसःलय् प्रधानमन्त्री देउवां दलतयेलिसे सहलह याना आयोगया प्रस्ताव न्ह्याकेगु धाःगु दु ।

आयोगं स्थानीय तहया निर्वाचनय् भोटिङ मेसिनया छ्यलेत नं प्रस्ताव याःगु दु । लिसःलय् प्रधानमन्त्री देउवां राजनीतिक दलतये समहति मालेमाःगु व फुक्क क्षेत्रय् मजूसा नं निश्चित क्षेत्रय् भोटिङ मेसिन छ्यलावनेगु धयादील  ।

येँ महानगरं ४५म्ह दाफा गुरुपिन्त छगु ज्याझ्वः दथुइ हंगु दु । २७ क्वःगु महानगर दिवस ०७८ या लसताय् खुसिबुँइ जूगु उगु ज्याझ्वलय् दाफा गुरुपिन्त मेयर विद्यासुन्दर शाक्यं हनादीगु खः।

ज्याझ्वलय् नवासें मेयर शाक्यं वर्तमानलिसें पूर्व कुमारी, गणेश व भैरवया नं मासिक भत्ता थकयागु जानकारी बियादिल।‘परम्पराप्रतिया आकर्षण वसंस्कारया निरन्तरताया लागिं मुक्कं ई बीपिन्त भत्ताया व्यवस्था यानागु खः, थुकिं परम्परागत बाजंया संरक्षण व प्रशिक्षण, जात्रा, पर्व, संस्कार व संस्कृतिया निरन्तरताय् हःपाः जुइ’ शाक्यं धयादिल ।

ज्याझ्वलय् येँ महानगर १८ वडाध्यक्ष नाप सम्पदा तथा पर्यटन समितिया कजि न्हुच्छेकाजी महर्जनं महानगरया परम्परागत म्हसिकायात ल्यंकातय्त बाजं गुरुतय् सीप व कलायात पुस्तान्तरण यायेमाःगु व थःपिन्सं थुकिया लागिं कुतः यानाच्वनागु धयादिल । सम्मान लःल्हानाकासें गुरुपिं ज्योती शाक्य व राजभाइ ज्यापुं महानगरं ब्यूगु ग्वाहालिं परम्परागत बाजं संरक्षण, वादन प्रशिक्षणया ज्याझ्वःत अप्वयावःगु बिचाः तयादिल।

महानगरया लगानीं परम्परा पुस्तान्तरण यायेत अःपूगु दाफा गुरुपिनि धापू खः।

गुलरिया नगरपालिका वडा नं. ६ या आर्थिक सहयोग नाप जिल्ला प्रहरी कार्यालय बर्दियाय् कार्यरत प्रहरी कर्मचारीपिनिगु श्रमदानं नागरिक सहायता स्थपना जुगु दु।

कक्षया थौं छगु ज्याझ्वः दथुइ मूपाहाँ गुलरिया नगरपालिकाया मेयर मुक्तीनाथ यादवं उलेज्या जूगु दु।

उगु उलेज्या ज्याझ्वलय् विशेष अतिथि प्रमुख जिल्ला अधिकारी सन्त बहादुर सुनार, कार्यालय प्रमुख ईश्वर कार्की, गुलरिया नगरपालिका वडा नं. ६ या वडा अध्यक्ष निरज शर्मा, गुलरिया नगरपालिकाया ईन्जिनियर विशाल पौडेल नाप कार्यालयया कार्यरत प्रहरी अधिकृत नाप जवानपिनिगु उपस्थिती दुगु खः।

नेवाः विद्यार्थी युनियनया अध्यक्ष रिदेन महर्जनया अबु सुभ महर्जन मन्त।

मदुम्ह सुभ महर्जन ६६ दँयण््वंगु बुधबाः मदुगु खः।