सतकय् वेसहारा जुया म्वाना च्वपि मनू तयेगु व्यवस्थापनया लागि मानव सेवा आश्रम निर्माण जुइगु दु।

नागार्जुन नगरपालिकां जग्गा उपलब्ध याइगु, जग्गाय् भवन निर्माणया ज्या येँ महानगरपालिकां यानाबिइगु व सेवा सञ्चालन मानव सेवा आश्रमं याइगु कथं त्रिपक्षीय सम्झौता सम्पन्न जुगु दु। सम्झौताय् येँ महानगरपालिकाया मेयर विद्यासुन्दर शाक्य, नागार्जुन नगरपालिकाया मेयर मोहनबहादुर बस्नेत व मानव सेवा आश्रमया अध्यक्ष रामजी अधिकारीं हस्ताक्षर यउगु दु। थुकिया लागि येँ महानगरपालिकां २०७८ असोज १२ च्वंगु कार्यपालिकाया बैठकं उगु निर्णय याउगु खः।

अथेहे नागार्जुन नगरपालिकां न वंगु असार २१ गते सम्पन्न नगरसभां निर्णय याउगु खः।  नागार्जुन नगरपालिका वडा नं. ६ या सेतो गुम्बानाप स्वाउगु बागेश्वरी द्यः नाप कि. नं. ८२ व १८९ या करीब १८ रोपनी जग्गाय् नगरपालिकाय हे नामय् आश्रम निर्माण जुइ। भवनया नां ‘सहिद धर्मभक्त माथेमा महानगर मानव सेवा आश्रम’ जुइ। अन च्वनिपि मनू तयेगु लिंग, दँ, शारीरिक नाप मानसिक अवस्था, आवश्यकता व प्रकृतिया अवस्थाया आधारय् छुटे याना सेवा सञ्चालन व व्यवस्थापन याइ धका मानव सेवा आश्रम धाउगु दु।

सम्झौतालिपा महानगरया मेयर शाक्यं, सहरया गु न खुल्ला थासय् च्वना कष्टकर जीवन विते याये म्वालेमाः धका आश्रम दयकेत्यनागु धका धाउगु खः। ‘येँ मानवीयताया सहर खः। थन शारीरिक नाप मानसिक रुपं अशक्त, मनोरोगी, अनाथ, अपाङ्गता जूपि, अशक्त नाप सहयोगापेक्षी सूना न च्वने म्वालेमाः। सूया थः मदुसा वयागु लागि सरकार दु।’ शाक्यं धयादीगु दु, ‘सू मदया वेसहारापिनिगु उद्धार, उपचार, पालन पोषण व माःगु शिक्षादीक्षा थे जाःगु आधारभूत मानवीय आवश्यकताया परिपूर्ति थ्व हे आश्रमपाखे जुइ।’

अथेहे नागार्जुन नगरया मेयर बस्नेतं, आः येँ महानगर व नागार्जुन नगर दथुइ सहकार्य विस्तारं जिल्ला नाप दक्को नगरनाप स्वाइगु भलसा काउगु दु।

मानवीयता ल्यका तयगु कुतःया लागि यानागु थ्व छगु महत्वपूर्ण सम्झौता खः। महानगरया उपमेयर हरिप्रभा खड्गी श्रेष्ठं धयादीगु दु, ‘योजना निर्माण यायेत व क्षेत्रगत सहकार्य यानागु थ्व छगु नमूना ज्या खः।’

धौबिचौरया गाःहितीइ लःया मुहान खनेदत येँ महानगरपालिका १७ वडाया धौबिचौरया गाःहितीइ (ल्वहिती) म्हिगः लःया मुहान लुगु दु।

येँ महानगर १७ वडाध्यक्ष नबिन मानन्धरं बिउगु जानकारी कथं दच्छि न्ह्यःनिसे जुयाच्वंगु अनुसुन्धानय् म्हिगः उत्खनन् याउगु इलय् उगु ल्वहिती याउगु लःया मुहान लुगु खः।

मिस नेपाल सुप्रिया श्रेष्ठ फिलिपिन्सय् ब्बति कायेगु निति थःगु देय् या न्ह्यब्बयेत ल्वतितीबारे बिषय कयादीगु खः। श्रेष्ठ नाप जाना अनुसन्धान याउगु इलय् ईन्द्रायणी मार्गय् उगु मुहान लुगु खः।

आः अन च्वंगु स्वंगु ल्वहितीइ म्हिगः निसे लः वःगु दु। येँ महानगरपालिकां दँच्छि न्ह्यः उगु ल्वहिती अनुसन्धानया निती ८८ लाख बजेत छुटे याउगु खः धका १७ वडाध्यक्ष मानन्धरं लहानन्युजयात जानकारी बियादीगु खः।

वंगु २४ घण्टाया दुने देयन्यक ९६८ म्हेसित कोरोना भाइरस संक्रमण पुष्टि जुगु दु ।

११,८५२ म्हेसिगु पीसीआर परीक्षण यागुलि ७६२ म्ह व ४,४६० एन्टिजेन परीक्षण यागुलि २०६ म्ह यानाः ९९६८ म्हेसित कोरोना भाइरसया संक्रमण पुष्टि जुगु दु धका स्वास्थ्य व जनसंख्या मन्त्रालय जानकारी बिउगु दु।

अथेहे वंगु २४ घण्टाय् कोरोना संक्रमणं खुम्हेसिगु ज्यान वंगु दु सा १,११४ म्ह कोरोनामुक्त जुगु दु।