नेपाली कांग्रेस सभापतिया उम्मेदवार शेखर कोइरालाया टिमपाखे डा. मिनेन्द्र रिजाल व गगनकुमार थापा महामन्त्री याउगु उम्मेदवार जुइत्यंगु दु।

रामचन्द्र पौडेल सभापतिया उम्मेदवार मज्युइगु दु। उगु समूहया नेतापिन्स शेखर कोइरालाया नेतृत्वय् टिम दयकूगु दु। महामन्त्रीइ विश्वप्रकाश शर्मायात हया डा. रिजालयात उपसभापतिइ यकेंत छलफल जुयाच्वंगु दु।

तर डा. रिजाल व थापा हे महामन्त्रीया उम्मेदवार तय जुगु धका छम्ह नेतां जानकारी बिउगु दु। वयकःया कथं मेपि पदाधिकारी व केन्द्रीय सदस्यया टिम दयकेगु ज्या जुयाच्वंगु दु।

महेश आचार्य न नेपाली कांग्रेसया उपसभापतिइ उम्मेदवारी दर्ता याउगु दु।

केन्द्रीय सदस्य आचार्यं थौंन्हिनय् उपसभापतिइ उम्मेदवारी दर्ता याउगु खः।

नेपाली कांग्रेसया नेतृत्व ल्यइगु निति थौंनिसे निर्वाचन प्रकृया सुरु जुइत्यंगु दु।

निर्वाचन समितिया कथं थौं १० बजेनिसे बहनि ५ बजे तक उम्मेदवारया मनोनयन दर्ता जुइ। थुगु पटक कांग्रेस सभापतिया उम्मेदवार लागि ३० हजार शुल्क तोके याउगु दु।

उपसभापति व महामन्त्रीया लागि २५÷२५ हजार, सहमहामन्त्रीया लागि २० हजार तोके यागु दु सा केन्द्रीय सदस्यया लागि १० हजार शुल्क तोके याउगु दु।

प्रदेश अधिवेशनय् गण्डकीया सभापति उम्मेदवारया लागि ९१ हजार शुल्क तोके याउगु खः।

नेपाली कांग्रेसया नेत्री सुजाता कोइरालां उपसभापतिया उम्मेदवारी बिउगु दु।

कोइरालां प्रकाशमान सिंह समूहपाखे उपसभापतिया उम्मेदवारी बिइ धका नेपाली कांग्रेस येँया सभापति सबुज बानियाँ न जानकारी बिउगु दु। प्रकाशमान निकट बानियाँ धाउगु दु, ‘आःतकया समझदारी थ्व हे खः।

वयकलं प्रकाशमान दाइया टिमपाखे उपसभापति ल्वाइ।’ सभापति बानियाँ नं पदाधिकारीया लागि संस्थापन व पौडेल समूहया नेतापि नाप छलफल जुयाच्वंगु दु। सभापतिइ उम्मेदवारी बिइगु घोषणा याउगु प्रकाशमानं आः छु ई थःगु अवधारणा पत्र सार्वजनिक याइगु ज्याझ्वः दु।

कांग्रेसया निर्वाचन प्रक्रिया थौंनिसे शुरु जुइ। थौं उम्मेदवारया मनोनयन दर्ता जुइ।

‘येँ महानगर दुने पुननिर्माण यायेमाःगु दक्को सम्पदा पुननिर्माण जुइ धुकुगु दु। गुलि निर्माण जुइ धुकुगु दु सा गुलि निर्माणया झ्वलय् दु। जिमिसं गुलि सम्पदा दयकेगु झ्वलय् स्थानीय विवादया कारण न्ह्यने वने फुगु मदुनि।

गुलिं गुथि संस्थान व पुरातत्व विभागया स्वामित्व दुगु कारण प्रक्रियाय् वने फुगु मदु। थ्व बाहेक मेगु सम्पदां महानगरं थःगु हे लगानीइ पुननिर्माण जुयाच्वंगु दु।’ सम्पदा पुननिर्माणया विषय बियादीसेयेँ महानगरया मेयर विद्यासुन्दर शाक्यं धयादीगु दु, ‘आः शिलान्यास जुगु छु न ज्या ध्यवाया कारण निर्माणया ज्या रोके जुइ मखु। उकिया लागि महानगरं योजना कथं रकम विनियोजन याये धुकागु दु।’ वडा २१ लगं त्वाःलय् च्वंगु कीर्तिपुण्य महाविहार, च्वाकँ वही आँगछें शिलान्यास यायेगु झ्वलय् मेयर शाक्यं अथे धयादीगु खः।

अथेहे बागमती प्रदेश सभाया सदस्य डा.अजयक्रान्ति शाक्यं, येँ महानगरं अन्तरसरकार समन्वयपाखे पूर्वाधार निर्माण व सम्पदा पुननिर्माणय् उल्लेखनीय ज्या जुगु थःत महसुस जुगु धारणा तयादीगु खः। ’पूर्वाग्रह विना याउगु उगु ज्या महानगरया मौलिकता जोगे यायेगुलि तधःगु योगदान जुगु दु।‘ धका डा.शाक्यं धयादीगु खः।

वडा २१ सम्पदा दुगु वडा खः। उकिइ झीसं सम्पदा संरक्षणयात योगदान बियागु दु कार्यक्रमय् वडाध्यक्ष उदयचुडामणि बज्राचार्यं, सेवा प्रवाह व पूर्वाधार निर्माणयात समान महत्व बियाउगु दु धका धयादीगु खः। करीव १ करोड ५४ लाख रुपैयाँ लागत अनुमान यानतःगु थुगु निर्माणया लागि करीव १ करोड ५ लाख रुपैयाँ कबोल याउगु समन्द्री कन्स्ट्रसनयात जिम्मा बिउगु खः।

हनुमान ढोका दरबार संरक्षण कार्यक्रमपाखे कार्यान्वयन जुगु पुननिर्माण ०७९ कार्तिक १० गते दुने सम्पन्न यायेमाः। इन्जिनियर अमित बज्राचार्यया कथं स्वंगु तले भवनया हरेक तला करीव ६३० बर्गफुटया जुइ।