भारतीय जनता पार्टी (भाजपा)या नेता हर्ष वर्द्धनं भारतीय प्रधानमन्त्री नरेन्द्र मोदी सुदृढ व स्थिर नेपालया पक्षय् दु धका धाउगु दु।

नेपाली कांग्रेसया १४ क्वःगु महाधिवेशनया उलेज्या समारोहय् सम्बोधन यासे हर्ष वद्र्धनं भुखाय् व कोरोना महामारीया इलय् भारतं ग्वहालि यानागु खँ लुमनादीगु खः।

नेपाल व भारतया प्रधानमन्त्री दथुइ लिपागु पटक निकः सम्वाद जुगु दु धासे वयकलं धयादीगु दु, सुदृढ, स्थिर व मजुबुत नेपालया पक्षय् दु।’ छगु हे पार्टीया महाधिवेशनय् देशया दक्को दलया प्रमुख नेतापिनिगु उपस्थिति थःम्हेसिय मेगु देशय् मखनागु धका धयादीगु खः।

नेकपा एमाले बागमती प्रदेशया सांसद नाप नेवाः न्ह्यलुवा राजेश शाक्यया दाजु बिश्वरत्न शाक्य म्हिगः बहनि आकाझाका मन्त।

मदुम्ह शाक्ययात थौं शोभाभगवती अन्त्येष्टि याइ धका छेँ जःपिन्स जानकारी बिउगु दु।

सांसद हृयदेश त्रिपाठीं न्हुगु पार्टी घोषणा याइगु जुगु दु। त्रिपाठीं थःगु नेतृत्वय् जनता प्रगतिशील पार्टी घोषणा यायेगु तयारी याउगु दु।

त्रिपाठी धाउगु दु, ‘२८ गते पार्टी घोषणा यायेगु ज्याझ्वः तयागु दु। उगु दिं पार्टीया नां, ध्वाँय् व राजनीतिक दस्तावेज सार्वजनिक याये।’ त्रिपाठी, विजेशकुमार गुप्ता लगायतया तत्कालीन राजपापाखे अलग जूपि नेतापिन्स २०७४ या चुनावय् स्वतन्त्र राजनीतिक समूह दयकूगु खः। एमालेनाप तालेमल याना उमिसं सुद्यः चुनाव चिं ज्वना चुनाव ल्वाउगु खः।

त्रिपाठी केपी शर्मा ओली नेतृत्वया सरकारय् महिला स्वास्थ्य तथा जनसंख्यामन्त्री तक जुयादीगु खः। आः थःम्हेसिया दयके त्यनागु पार्टी तत्कालीन स्वतन्त्र राजनीतिक समूहय् आवद्ध नेतापि जक मखु मेमेपि न दु धका त्रिपाठीं धाउगु दु।

नेपाली कांग्रेसया केन्द्रीय समिति व पदाधिकारीपिनिगु उम्मेदवारी घोषणा यानाच्वपि नेतापिन्स महाधिवेशनस्थल भृकुटीमण्डपपाखे प्रचार सामग्री हटे याउगु दु।

कांग्रेसया १४ क्वःग महाधिवेशन थौंनिसे शुरु जुइत्यंगु खः। तर उम्मेदवारपिन्स महधिवेशनस्थल भृकुटीमण्डपय् थःथःगु प्रचार याये धुकुगु दु।

कांग्रेसया निर्वाचन आचारसंहिता विपरीत उम्मेदवारपिन्स प्रचार प्रसार यात धइगु आलोचना जुगुलि नेतापिन्स प्रचार सामग्री हटे याउगु खः।

भृकुटीमण्डपया मूलगेटनिसे उम्मेदवार जूपिन्स थःथःगु प्रचार सामग्री तुल, ब्यानर दयका तःगु खः।

कास्कीया पोखरा महानगरपालिका–२६ विजयपुरय् ट्रक दुर्घटना जुया निम्ह मनू सीउगु दु।

लेखनाथपाखे पोखरापाखे वया च्वंगु लु.२ ख २९४८ नम्बरया ट्रक अनियन्त्रित जुया थौं ४ः३० बजे पल्टे जुया निम्ह सीउगु खः।

लमजुङया पार्चे च्वम्ह ४२ दँ दुम्ह भिम बहादुर तामाङ व छम्हेसिगु धासा नां व थाय् खुले जुगु मदुनिसा।