कांग्रेसं १४ क्वःगु महाधिवेशनया लागि आचार संहिता जारी याउगु दु।

केन्द्रीय निर्वाचन समितिं आचार संहिता जारी यासे मतदान जुगु थासय् दुहावयेत मोबाइल फोन ज्वना वनेमदुगु ब्यवस्था याउगु दु। थःगु उमेदवारीया प्रचार प्रसार यायेत भिजिटिङ कार्ड, सामान्य अपिल वितरण यायेफइगु धका कांग्रेसं धाउगु दु।

सूना न व्यक्तिगत चरित्रय् लान्छना लगे याना प्रचार याये मदइगु धका निर्वाचन समितिं जारी याउगु आचार संहिताय् उल्लेख याउगु दु। मर्यादित, अनुशासित व संयमित जुया शान्तिपूर्ण तरिकां निर्वाचन प्रचार प्रसार यायेत समितिं इनाप याउगु दु।

नेपाली कांग्रेसया नेता कृष्णप्रसाद सिटौलां वरिष्ठ नेता रामचन्द्र पौडेलयात सहमतिया आधार छु ? धका न्ह्यसः तःगु दु।

थःत ग्वाहालि यायेमाल धासे थःगु निवास वःम्ह वरिष्ठ नेता पौडेलयात सहमति याये फइमखु धका लिसः बिउगु धका सिटौला निकट नेता भीमसेन दास प्रधानं जानकारी बिउगु दु।

“छु आधारय् सहमति यायेगु? सहमतिया आधार हयादीसँ। वया लिपा खँ ल्ह्यायेगु जुइ। ग्वाहालि माल धायेवं सहमति बिइ फइमखु?” सिटौलाया धापू उद्धृत यासे वयकलं थे धयादीगु खः।

सिटौलां महाधिवेशन तक थःम्हेसिया निर्णय बिइ धका धाउगु दु।पौडेल थःगु समूहया बैठक न्ह्यानाच्वंगु इलय् हे सिटौला नापला वंगु खः।

नेपाली कांग्रेसया नेता रामचन्द्र पौडेलं सभापतिया प्यम्ह आकांक्षी मिले मजुइगु अवस्था जूसा थः पार्टीपाखे हे बिदा जुइ धक धाउगु दु।

नेता प्रकाशमान सिंहया निवास चाक्सीबारीइ जुगु छलफलय् वयकलं अज्याउगु प्रस्ताव तःगु दु धका नेता डा. रामशरण महतं जानकारी बिउगु दु।

“दक्को ल्वायेगु व मिले मजूसा थः पार्टीपाखे बिदा जुइ, अलग जुइ जि आः छेँय् हे आराम याय धका धयादीगु दु,” नेता महतं पत्रकारनाप खँ ल्हानादीसे धाउगु दु, “आःतकयागु अवस्था मिले जुइगु खनेमदु।

दक्को थःथःगु हे अडानय् दु।” पौडेलं धाःसा छु न प्रतिक्रिया बिउगु मदुनि।

बुधबाः थौं न शेयर बजारय् तसकं कुहावंगु दु। शेयर कारोबार मापक नेप्से परिसूचक ५३ दशमलव १० अंकं घटे जुया २ हजार ४ सय ५५ दशमलव ८० अंकय् कुहावंगु दु।

‘क’ वर्गया कारोबार मापन याइगु सेन्सेटिभ इन्डेक्स न ९ दशमलव ३४ अंकं घटे जुगु दु। नेप्से परिसूचक नाप थौं बुधबाः शेयर कारोबार रकम तक कम जुगु दु। न्हिच्छियक जुगु ४२ हजार ९४६ कारोबारपाखे २२६ कम्पनीया ६५ लाख ६० हजार ९ सय ४७ कित्ता शेयर किनबेच जुगु दु।

थौं कारोबार रकम २ अर्ब ६६ करोड ३९ लाख ९ हजार ६ सय २० रुपैयाँय् रोके जुगु दु। बुधबाः यक्को कम्पनी याउगु शेयर भाः कुहावंगु दु। अयन स्टाण्डर्ड चार्टड बैंक, मैलुङखोला जलविद्युत्, नेपाल एसबीआई बैंक लगायतया शेयर भाः थहावंगु दु।

बुधबाः यक्को गुमे याःसा कम्पनी सामुदायिक लघुवित्त वित्तीय संस्था, एक्सेल डेभलपमेन्ट बैंक, ग्रीन डेभलपमेन्ट बैंक, नयाँ सारथी लघुवित्त लगायतया कम्पनी खने दु।

वंगु २४ घण्टाया दुने देयन्यक थप २८० म्हेसित कोरोना संक्रमण पुष्टि जुगु दु।

९ हजार १ सय ६८ म्हेसिगु पीसीआर परीक्षण याउगुलि २५५ व ३ हजार ६ म्हेसिगु एन्टीजेन परीक्षण याउगुलि २५ म्ह याना २८० म्हेसित कोरोजना संक्रमण पुष्टि जुगु।

अथेहे २४ घण्टाया दुने निम्ह सीउगु दु सा ३६६ म्ह कोरोनामुक्त जुगु दु। अथेहे स्वनिगः दुने १४६ म्ह संक्रमित जुगु दु।

उकि मध्ये येँ १००, यलय् ३१ व ख्वपय् १५ म्हेसित संक्रमित जुगु दु।