नेकपा एमालया अध्यक्ष नाप पूर्वप्रधानमन्त्री केपी शर्मा ओलीं थःगु पार्टीया सांसदपिन्त न मन्त्री दयका बिइमाल धका प्रधानमन्त्री देउवानाप इनापयासे यङ्ग्य यानादीगु दु।

प्रतिनिधि सभाय् थौं मङ्गलवाःया बैठकय् अध्यक्ष ओलीं मन्त्री दयका बिइमाल धासे सू सांसदपि चाः न्हिइ मधासे प्रधानमन्त्री देउवाया चाकडी यानाच्वंगु धासे ल्हाः जोडे याना मन्त्री दयकाबिइत व्यङ्गात्मक इनाप यागु खः।

देउवायात ल्हा जोडे याना ओलीं धागु दु, ‘जिगु हे पार्टीया सू मनूत नयेदइला धका ब्बाय् वनाच्वंगु दु। सुथय् बहनि चाकरी याः वनाच्वंगु दु। जिगु दलयात भचा घाटा जूसा सहयाये मन्त्री दयकादीसँ, प्लिज।’

शेयर बजाःया परिसूचक नेप्से थौं मङ्गलवाः झन्डै ५२ अङ्क थहावंगु दु। नेप्से थौं ५१ दशमलव ८६ अङ्क थहावना ३ हजार १ सय ६१ दशमलव ४४ विन्दुइ थ्यंगु दु।

थौं बैंकिङ समूहया शेयर ३९ अङ्क, विकास बैंकया ४ सय ६ अङ्क, फाइनान्सय् १ सय ९० अङ्क व माइक्रोफाइनान्सय् ७३ अङ्कं थहावंगु दु। अथेहे जीवन बीमा समूहया शेयर २ सय ११ अङ्क, निर्जीवन बीमा समूहया शेयर १ सय ४२ अङ्क, उत्पादनय् ४४ अङ्कं व मेमेगु समूहया शेयर ८ अङ्क थहावंगु खः। लिपागु इलय् निरन्तर थहावना च्वंगु जलविद्युत् समूहया शेयर थौं धासा कुहावंगु दु।

थौं बेस्ट फाइनान्स, मल्टिपर्पोज फाइनान्स, सिन्धु विकास बैंक लगायत १३ कम्पनीया शेयर १० प्रतिशतं थहावंगु खः। अथेहे न्यागु कम्पनीया शेयर ९ प्रतिशत स्वया अप्वो थहावंगु खः।समग्र बजाः थहावंसा साञ्जेन जलविद्युत् कम्पनीया शेयर ५ प्रतिशत कुहावंगु दु। थौं अप्वो जलविद्युत् कम्पनीया शेयर कुहावंगु दु।

थौं २ सय २५ कम्पनीया ३ करोड ३५ लाख ३५ हजार कित्ता शेयर १७ अर्ब ८४ करोड ६१ लाख रुपैयाँ कारोबार जुगु खः। दकलय् अप्वो माथिल्लो तामाकोशीया ८९ करोड ५८ लाख रुपैयाँ शेयर किनबेच जुगु खः।

बागबजारया पद्मकन्या क्याम्पसय् त्रिवि कायेत्यंगु परीक्षा रोके यायेत माग यासे प्रदर्शन यायेगु झ्वलय् खुम्हेसित प्रहरीं ज्वंगु दु।

‘नो भ्याक्सिन, नो एक्जाम’ धासे नाराबाजी यानाच्वपि खुम्हेसित ज्वना नियन्त्रणय् कयागु दु धक काठमाडौं प्रहरी प्रमुख अशोक सिंह जानकारी बिगु दु। नियन्त्रणय् कया उमित नगर प्रहरी भृकुटीमण्डपय् तयातःगु दु।

परीक्षाय् तसकं हुलमुल जुइगु धासे विद्यार्थीपिन्स पद्मकन्या क्याम्पस न्ह्यने प्रदर्शन यासे परीक्षा रोके यायेमाःगु माग यागु खः। उमिसं कलेजाया पिने प्रदर्शन यागु खः। पद्मकन्या कलेजय् थीथी १८ गु कलेजया सिफ्ट कथं परीक्षा तोके यागु खः।

थ्व स्वया न्ह्यः त्रिभुवन विश्वविद्यालयं परीक्षाया तालिका वये धुकुगु धासे भदौ ५ गते तक परीक्षा स्थगित मयायेगु धका धासे यथावत हे सञ्चालन यायेगु निर्णय यागु खः।

नेकपा एमालेया अध्यक्ष केपी शर्मा ओलीं अमेरिकी सहयोग नियोग मिलेनियम च्यालेन्ज कर्पोरेशन (एमसीसी) पास जुइ कि मजुइ धका न्ह्यसः तःगु दु।

प्रतिनिधि सभाया बैठकय् अध्यक्ष केपी शर्मा ओलीं साझा न्यूनतम कार्यक्रमय् एमसीसीबारे छु न उल्लेख मयागु धका न्ह्यसः तःगु खः। ‘प्रधानमन्त्रीजु, एमसीसी छु यायेगु ? नेपाली नागरिकं सिइके मास्ति वः,’ ओलीं धयादीगु दु, ‘छिमेकीनाप गन–गन सीमा समस्या दु, असमान सन्धि–सम्झौता गन सू नाप दु? व न स्पष्ट यानादीसँ।’

एमसीसीबारे साझा न्यूनतम कार्यक्रमय् छु न उल्लेख मया बरु थःम्हेसिया न्हापा हे एमसीसी पास याये माः धयागु भिडियो क्लिपया प्रचार यायेगु ज्या जुयाच्वंगु धका ओलीं धागु दु।

अथेहे कालापानी, लिम्पियाधुरा व कालापानीइ हे सीमा विवाद समाधान यायेगु उल्लेख यागु तर भूमि लित हयेगु विषय उल्लेख मयागु धका ओलीं असन्तुष्टि व्यक्त यागु खः।