इनाप प्रधानमन्त्री शेरबहादुर देउवां सत्ता गठबन्धनया नेतापिन्त मन्त्रीपिनिगु नां छ्वया हयेत धाउगु दु।

शुक्रबाः सुथय् बालुवाटारय् च्वंगु सत्ता गठबन्धनया शीर्ष नेतापिनिगु बैठकय् प्रधानमन्त्री देउवां मन्त्रीपिन्त नां बिइत इनाप याउगु दु।

उगु बैठकय् माओवादी केन्द्रया अध्यक्ष पुष्पकमल दाहाल प्रचण्ड, एकीकृत समाजवादीया अध्यक्ष माधवकुमार नेपाल, जनता समानवादी पार्टीया अध्यक्ष उपेन्द्र यादव व राष्ट्रिय जनमोर्चाया दुर्गा पौडेलपिनिगु उपस्थिति दुगु खः। कांग्रेस सभापति देउवां वंगु असार २९ गते प्रधानमन्त्री पदया शपथ ग्रहण याउगु खः।

तर आःतक न मन्त्रिपरिषदयात पूर्णता बिइ फुगु मदुनि। आःतक सरकारय् प्यम्ह मन्त्री व छम्ह राज्यमन्त्रीपि दु।

पशुपति महाद्यःया थाय् थौंनिसे भक्तजनया लागि खुल्ला जुगु दु।

न्हुगु भेरियन्टनाप कोरोनापाखे बचे जुइत वंगु प्यलानिसे भक्तजनया लागि बन्द जुगु खःसा थौं सुथय् ६ बजेनिसे खुल्ला जुगु खः।

पशुपति महाद्यः नाप गुह्येश्वरी लगायत द्यःया थाय् भक्तजनया लागि खुला जूगु धका पशुपति क्षेत्र विकास कोषं धाउगु दु।

न्हुगु भेरियन्ट नाप कोरोना सङ्क्रमण यक्को जुइवं वंगु वैशाख १० गतेनिसे पशुपति द्यःया थाय् भक्तजनया लागि बन्द जूगु खः।

पशुपति द्यःया थाय् वयने भक्तजनपिन्स अनिवार्य रूपं मास्क तयमाःगु व छकलं २५ म्ह जक दुहावने फइगु याउगु दु।

नेकपा माओवादी केन्द्रया अध्यक्ष प्रचण्ड व अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) उपाध्यक्ष फतिमा सुमार दथुइ भेटवार्ता जूगु दु।

भेटवार्ताया लागि उपाध्यक्ष सुमार नापया टोलीं थौं शुक्रबाः सुथय् प्रचण्ड निवास खुमलटार वउगु खः। उगु खँल्हाबल्हा १ घण्टा जुगु खः। बिहीबाः नेपाः वयेवं हे सुमारं राजनीतिक भेटवार्ता जारी याउगु खः।

प्रतिपक्षी दल नेकपा एमालेया अध्यक्ष केपी शर्मा ओलीपाखे राजनीतिक भेटवार्ता सुरु याना बिहीबाः हे नेकपा एकीकृत समाजवादीया अध्यक्ष माधव कुमार नेपाल व जसपाया अध्यक्ष उपेन्द्र यादव व डा. बाबुराम भट्टराई नाप न सहलह याये धुकुगु दु।

अथेहे प्रधानमन्त्री शेरबहादुर देउवा व अर्थमन्त्री जनार्दन शर्मा नाप न भेटवार्ता याइगु ज्याझ्वः दु।

पुच्वय् निसः दँ न्ह्यः पुलागु इतिहास दुगु फल्चा पुनर्निर्माण जुइगु दु।

जिल्ला अदालत लगनखेलं वंगु भदौ २ गतेय् बिउगु अन्तरकालीन आदेश खारेज यासे म्हिगः बिहीबाः फल्चा शिलान्यास याउगु दु।

लालीगुँरास बहुउद्देश्य सहकारी संस्थाया कर्मचारी तक निवेदक जुगु उगु फल्चा पुनर्निर्माण रोक्का याये दय्मा धका निवेदन दर्ता याउगु खः।

यल महानगरया मेयर चिरीबाबु महर्जनं थ्वः सत्य न्ह्यावलय् त्याइ धका धयादीगु खः। ‘सर्वाेच्च अदालत व जिल्ला प्रशासन कार्यलय ललितपुरं पाटी पुनर्निर्माण रोके यायेमते धइगु आशय नाप आदेश वय धुकुगु खः,’ वयकलं धाउगु दु, ‘अय्न जिल्ला अदालतं अन्तरकालीन आदेश जारीयात।

थुकिइ भदौ ३ गतेय् याये धइगु शिलान्यास थौं जुल।’ फल्चा पुनर्निर्माण यायेत रोबिन महर्जनया अध्यक्षताय् उपभोक्ता समिति गठन याये धुकुगु दु। पुनर्निर्माण लगत ३३ लाख १६ हजार खः। उकिइ जनसहभागितापाखे ३ लाख ३१ हजार व महानगरपाखे २९ लाख ८५ हजार रुपैयाँ तइगु जुगु दु।