राष्ट्रियसभाया सांसद कोमल वलीं तः तधःगु भ्रष्टाचार काण्डया छानविन यायेत सरकारयाके माग यागु दु।

राष्ट्रियसभाय् थौं बुधबाः जुगु बैठकय् न्ववायेगु झ्वलय् प्रमुख प्रतिपक्ष दल नेकपा (एमाले) या सांसद वलीं देयन्यक तः तधःगु भ्रष्टाचार काण्डय् निष्पक्ष छानविन यायेत माग यागु दु। ओली भ्रष्टाचारया खँ भोट फ्वनिइगु माध्यम जक दयकेगु बाइडबडी, अरुण तेस्रो, टनकपुर, बालुवाटार प्रकरण, ओम्नी प्रकरण, आयल निगमया जग्गा खरिद प्रकरण व क्यान्टोनमेन्टया तक भ्रष्टाचार छानविन याये मागु धका धागु खः।

‘थन भ्रष्टाचारया खँ यक्को जुल । भाषण जुल। भोट फ्वनेगु माध्यम जक जुल। निष्पक्ष छानविन यायेनु। वाइडबडीया छानविन याये । अरुण थर्डया छानविन याये। टनकपुरया छानविन याये। बालुवाटारया छानविन याये ।

ओम्नया छानविन याये। आयल निगमया जग्गा खरिद जुगु छानविन याये।’ वयकल धागु दु, ‘क्यान्टोनमेन्टया न छानविन याये। तः तधःगु हाइड्रोया न छानविन याये। १६५ म्ह सांसदया समर्थन दु, व छु किया लागि खः? धका सांसद वलीं न्ह्यसः तयादीगु ख? 

स्वास्थ्य तथा जनसंख्या मन्त्रालयया कतं थौं स्वनिगलय् ९६४ म्हेसित कोरोना संक्रमित जूगु धका धागु दु।

मन्त्रालयया कथं थौं दकलय् अप्वो येँ ६६३ म्हेसित कोरोना सक्रमण जुगु दु सा यलय् १९२ म्ह व ख्वपय् १०९ म्हेसित कोरोना सक्रमण जुगु दु।

थेहे मन्त्रालय बिगु जानकारी मेमेगु जिल्लाय् झापाय् २२०, कास्कीइ २१६, मोरङय् १५३ म्हेसित कोरोना संक्रमण जुगु दु।

अथेहे सुनसरी व चितवनय् ८०÷८० म्ह, दोलखाय् ७७, रुपन्देहीय् ७०, बागलुङय् ६७, नवलपरासी पूर्वय् ६१, नुवाकोटय् ५०, सिन्धुपाल्चोक व बर्दियाय् ४४÷४४ म्ह, दाङय् ४२ म्हेसित कोरोना संक्रमित जुगु दु। 

वंगु २४ घण्टाया दुने देयन्यक थप ३,४८१ म्ह कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १० हजार ९०७ म्हेसित पीसीआर परीक्षण यागुलि २,६१६ व ५,७४९ म्हेसित एन्टिजेन परीक्षण यागुलि ८६५ म्ह याना ३,४८१ म्ह संक्रमण पुष्टि जुगु खः।

कोरोना संक्रमणया कारण वंगु २४ घण्टाया दुने ३० म्ह सीगु दु सा १ हजार ८८५ म्ह कोरोनामुक्त जुगु दु। थ्व नाप नेपालय् कोरोना संक्रमितपि ७ लाख २३ हजार २९६ म्ह थ्यंगु दु।

अथेहे नेपाल कोरोना सीपि आःतक १० हजार १८० म्ह थ्यंगु दु सा ६ लाख ७५ हजार ८३ म्ह संक्रमणमुक्त जुइ धुकुगु दु। मन्त्रालयया कथं आःतक देयन्यक सक्रिय संक्रमितपि ३८ हजार ३३ म्ह थ्यंगु दु।

उकि मध्ये ३४ हजार ८१३ म्ह होम आइसोलेसनय् दु सा ३ हजार २२० म्ह संस्थागत आइसोलेसनय् च्वना च्वंगु दु।

कोरोनाया बिरामीपि मध्ये ७९६ म्ह आईसीयू व १८४ म्ह भेन्टिलेटरय् उपचार यानाच्वंगु दु।

सभामुख अग्निप्रसाद सापकोटां अमेरिकी सहयोग परियोजना एमसीसी राष्ट्रिय सहमति जुइमाः धका धयादीगु दु।

बुधबाः थःगु हे कार्यकक्षय् पत्रकारपि नाप खँ ल्हानादीसे वयकलं एमसीसीइ राष्ट्रिय सहमति जुइमाः धका धागु दु। ‘एमसीसीया विषय जि तटस्थ ढंगं अध्ययन यानाच्वनागु दु, थुकियात न्ह्यने यकेगु सन्दभय् जिं चाहे जु, राष्ट्रिय सहमति जुइमाः, छाय् धासा थ्व जनतापिनिगु छेँ छेँ थ्यनिइगु विषय खः’ कयकलं धयादीगु खः।

यदि राष्ट्रिय सहमति जुइ मफुत धासा संसदय् दुगु दलपि दथुइ सहमति जुइमाः व वन मजुसा सत्ता गठबन्धनय् दुगु दल दथुइ सहमति जुइमाः धका सभामुख सापकोटां धागु दु।

वयकलं सिन्धुपाल्चोकया जुगल गाउँपालिका वनागु इलय् छम्ह स्थानीयं तामाङ भाषाय् खँ ल्हायेगु झ्वलय् एमसीसी पारित जुइ मखु धका धागु छम्ह पत्रकारयात धागु खः। अमेरिकी सहयोग परियोजना सम्बन्धी सम्झौता अनुमोदनया लागि संसदय् विचाराधीन जुयाच्वंगु दु।

मुख्यमन्त्री शंकर पोखरेलविरुद्ध वंगु अविश्वास प्रस्तावय् छलफलया लागि शुरु जुगु लुम्बिनी प्रदेशसभाया विशेष अधिवेशन स्थगित जुगु दु।

विशेष अधिवेशन न्ववासे मुख्यमन्त्री पोखरेलं राजीनामा बिइवं अधिवेशन स्थगित जुगु दु। बुधबाः न्हिसिया १ बजे शुरु जुगु विशेष अधिवेशनय् नेपाली कांग्रेस, नेकपा माओवादी केन्द्र, जनता समाजवादी पार्टी व राष्ट्रिय जनमोर्चाया सांसदपिन्स अविश्वास प्रस्तावय् न्ववागु दु।

सत्तारुढ नेकपा एमालें बहिस्कार यागु प्रदेशसभाय् मुख्यमन्त्री न अनुपस्थित जुगुलि सभामुख पूर्णबहादुर घर्तीं मुख्यमन्त्रीया लिसः बिइगु लागि प्रदेशसभा १ घण्टाया लागि स्थगित यागु खः।

उगु बैठकय् प्रदेश प्रमुख  कार्यालयपाखे वंगु मुख्यमन्त्रीया राजीनामा सम्बन्धी पौ ब्बना प्रदेशसभा बैठक हाकन स्थगित यागु खः।