नेकपा एमालेया महाधिवेशनं अध्यक्ष व केन्द्रीय सदस्यपि जक ल्यइगु कथं विधान संशोधन प्रस्ताव यायेगु प्रस्ताव न्ह्यने हःगु दु।

उकिइ १३ म्ह पदाधिकारी दइगु जुसा स्थायी कमिटी खारेज याना सचिवालय, पोलिटब्यूरो व केन्द्रीय कमिटी दइ। थौं सोमबाः तुलसीलाल स्मृति प्रतिष्ठान, च्यासलय् च्वंगु अध्यक्ष केपी शर्मा ओली पक्षीय नेतापि जक दुथ्यागु केन्द्रीय कमिटी बैठकं विधान संशोधन प्रस्ताव क्वयागु कमिटी तक छलफलय् यकेगु व वइगु विधान महाधिवेशनय् यकेगु निर्णय तक यागु दु।

प्रवक्ता प्रदीप ज्ञवालीया कथं प्रस्तावित विधानय् अध्यक्ष, निम्ह उपाध्यक्ष, छम्ह महासचिव, निम्ह उपमहासचिव व ७ म्ह सचिव जुइगु उल्लेख यागु दु। उकि मध्ये अध्यक्ष महाधिवेशनपाखे निर्वाचित जुुइसा मेपि केन्द्रीय कमिटीं ल्यइगु व्यवस्था यागु दु। आः अध्यक्ष, न्याम्ह उपाध्यक्ष, छम्ह महासचिव, निम्ह उपमहासचिव, न्याम्ह सचिव दइगु व्यवस्था दुगु खःसा दक्को महाधिवेशनपाखे निर्वाचित जुइगु व्यवस्था दु।

अथेहे स्थायी कमिटी खारेज यायेगु, पोलिटब्यूरो व २२५ म्ह सदस्यीय केन्द्रीय कमिटी दयकेगु प्रस्तावित विधानय् उल्लेख दु । प्रदेश, जिल्ला व स्थायी तहया कमिटीइ अध्यक्ष, उपाध्यक्ष सचिव व निम्ह सहसचिव दइ। दक्को कमिटीइ अध्यक्ष व कमिटी अधिवेशनपाखे ल्यइ।

नेकपा एमालें विधान महाधिवेशनया लागि थीथी प्यंगु समिति गठन यायेगु प्रस्ताव यागु दु।

सोमबाः च्वंगु केन्द्रीय कमिटीया बैठकं भदौ २७ व २८ गते जुइगु विधान अधिवेशनया लागि प्यंगु समिति प्रस्ताव यागु दु। उकिइ राजनीतिक प्रतिवेदन मस्यौदा समितिया संयोजकय् अध्यक्ष केपी शर्मा ओली व सदस्यपि वामदेव गौतम, रामबहादुर थापा (बादल), प्रदीप ज्ञवाली, छविलाल विश्वकर्मा, सत्यनारायण मण्डल, विष्णु रिमाल व  विन्दा पाण्डेपि दुथ्यागु दु।

अथेहे संगठनात्मक प्रतिवेदन मस्यौदा समिति संयोजकय् महासचिव ईश्वर पोखरेल व सदस्यपि विष्णु पौडेल, टोपबहादुर रायमाझी, शंकर पोखरेल, किरण गुरुङ व पद्मा अर्यालपि च्वंगु दु।

विधान संशोधन मस्यौदा समिति संयोजकय् विष्णु पौडेल व सदस्यपि सुवास नेम्वाङ, पृथ्वीसुब्बा गुरुङ, लेखराज भट्ट, रघुवीर महासेठ, राधा ज्ञवाली, भानुभक्त ढकाल व प्रभु साह च्वंगु दु।

व्यवस्थापन समिति संयोजकय् रामबहादुर थापा (बादल) व सदस्यपि मणि थापा, शेरबहादुर तामाङ, सुजिता शाक्य, विनोद श्रेष्ठ, खिमलाल भट्टराई, महेश बस्नेत व पासाङ शेर्पापि च्वंगु दु।

स्वास्थ्य तथा जनसंख्या मन्त्रालयया कथं थौं येँ जक ६२४ कोरोना सक्रमण पुष्टि जुगु दु।

अथेहे चितवनय् २६३, कास्कीइ २१०, ख्वपय् १७०, यलय् १६५, मोरङय् १३१, बागलुङय् १२८ व सुनसरीइ १०२ म्हेसित कोरोना संक्रमण पुष्टि जूगु दु।

अथेहे नुवाकोटय् ९२, मकवानपुरय् ८६, नवलपरासी पूर्वय् ५८, झापाय् ५४, धादिङ व रुपन्देहीइ ४४÷४४ म्ह, दोलखाय् ३४, पर्वतय् ३० म्हेसित कोरोना संक्रमण खनेदुगु खः।

पाल्पाय् २३, धनकुटाय् २१, कपिलवस्तुइ १८, तनहुँइ १६, सिन्धुपाल्चोकय् १५, सिरहा व बर्दियाय् १४÷१४ म्ह, सिन्धुलीइ १३, धनुषा, गोरखा व अर्घाखाँचीइ १२÷१२ म्ह व महोत्तरीइ ११ म्हेसित कोरोना संक्रमितपि थपे जूगु दु धका स्वास्थ्य तथा जनसंख्या मन्त्रालयं धागु दु।

वंगु २४ घण्टाया दुने देयन्यक ३,६५१ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथं १०,४४५ म्हेसिगु पीसीआर परीक्षण यागुलि २,६०९ म्ह व ६,१४९ म्हेसिगु एन्टीजेन परीक्षण यागुलि १०४२ म्ह याना ३,६५१ म्हेसित कोरोना संक्रमण पुष्टि जुगु खः।

अथेहे वंगु २४ घण्टाया दुने कोरोना संक्रमणं २२ म्ह सीगु दु सा १ हजार ७८४ म्ह कोरोनामुक्त जुगु दु।

 सर्वोच्च अदालतं खड्गी समुदायपिनिगु आत्मसम्मानय् घाः मजुइगु कथं थर कायम यायेत सरकारयात निर्देशनात्मक आदेश जारी यागु दु।

खड्गी समुदायपिन्त राज्यं बिइगु नागरिकता, पासपोर्ट, सवारी चालक अनुमतिपत्र, जग्गाधनी प्रमाणपत्र, शैक्षिक प्रमाणपत्र लगायत सरकारी भ्वँतय् साविकय् दुगु थर गथेकि कसाई, कसाही, साही, साईया कथं आत्मसम्मान जुइकथं नायः सिंह, शाही व खड्गी कायम यायेत व उकिया लागि आवश्यक कानुनी लिसें मेमेगु व्यवस्थापकीय प्रबन्ध कार्यान्वयन यायेत सर्वोच्चं निर्देशनात्मक आदेश जारी याःगु खः।

सर्वोच्चं २०७६ चैत्र २ गते हे थज्याःगु निर्देशनात्मक आदेश जारी यासाः नं छुं दिं न्हय् जक पूर्ण पाठ जारी याःगु खः। अदालतं जारी याःगु पूर्ण पाठय् नेपाःया संविधानं ब्यूगु सम्मानपूर्वक म्वायेदयेमाःगु हकया व्याख्या यागु खः।

नेपाल खड्गी सेवा समितियापाखें संरक्षक मनोज नेवाः खड्गीं साविकया थर खड्गी समुदाययात मदिक्क मानसिक, सामाजिक लिसें आर्थिक विकासय् गम्भीर नकारात्मक असर लाःगु धासें सर्वोच्चय् रिट दायर यागु खः।

उगु रिटय् विपक्षी दयेकातःगु नेपाल सरकार, प्रधानमन्त्रीलिसें मन्त्रिपरिषद् ज्याकु, गृह मन्त्रालय, भूमिसुधार मन्त्रालय, शिक्षा मन्त्रालय, परीक्षा नियन्त्रण ज्याकु सानो ठिमी ख्वप, उच्च माध्यमिक शिक्षा परिषद्लगायतया नामय् सर्वोच्चं उगु आदेश जारी याःगु खः।