स्वनिगलय् आः बहनि सवारीसाधन सञ्चालन यायेगुलि रोकेयागु निर्णय यागु दु।

बिहीबाः निसे लागू जुइ कथं निषेधाज्ञा थप यासे प्रशासनं बहनि ८ बजे लिपा सार्वजनिक व निजी सवारीसाधन सञ्चालनय् रोके यागु दु।

येँया प्रमुख जिल्ला अधिकारी कालिप्रसाद पराजुलीया कथं कोभिड–१९ भाइरस संक्रमण अप्वोया वंगुलि बहनि सवारीसाधनया आवत जावतय् कडाइ यागु खः।

अत्यावश्यक सवारीसाधन चाहिँ न्ह्यागु इलय् न चले याय दइ। थपे यागु निषेधाज्ञा ८ भदौ तक जारी जुइ।

प्रमुख विपक्षी दलया नेता केपी शर्मा ओलीं सरकारया न्यूनतम साझा कार्यक्रमयात ‘लँय् ह्वला तःगु भ्वँ’ धका टिप्पणी यागु दु।

२८ असारय् प्रतिनिधिसभा पुनःस्र्थापना नाप प्रधानमन्त्रीपाखे हटे जुम्ह ओलीं थौं मंगलबाः न्हापागु पटक संसदय् सम्बोधन यागु खः।

उगु झ्वलय् ओलीं थःगु नेतृत्वया सरकारं यानागु ज्यायात बचे यासे, वर्तमान सरकार व सत्तारुढ गठबन्धनया आलोचना यागु खः। सरकारया साझा न्यूनतम कार्यक्रमयात संकेत यासे लँय् ह्वला तःगु भ्वँया संज्ञा बिया व उकिइ प्रतिपक्षयात सराबिया जक राष्ट्रिय सहमतिया लागि पहल याइगु उल्लेख यागु धका ओली धागु दु।

एमाले संसदीय दलया नेता ओलीं धागु दु, ‘गज्यागु बालागु तरिका ! प्रमुख प्रतिपक्षयात ख्याना राष्ट्रिय सहमति ।’ धका धागु खः।

नेपाल मेडिकल काउन्सिलया दर्ता प्रमाणपत्र (लाइसेन्स) परीक्षा थ्व हे वइगु साउन २८ व २९ गते जुइगु दु।

कम्प्युटरपाखे जुइगुलि परीक्षा केन्द्र पुल्चोक इन्जिनियरिङ क्याम्पसया सूचना तथा सञ्चार केन्द्र तोके यागु दु। साउन २८ गते  सुथय् १० बजेनिसे रोल नम्बर २१०८२०३२१ निसे २१०८२०६४० तक व उगु हे दिं न्हिनय् ३ बजेय् निसे २१०८१०००१ निसे २१०८१०१९६ तक परीक्षा जुइ।

अथेहे, २९ गते सुथय् १० बजेय् निसे रोल नम्बर २१०८२०००१ निसे २१०८२०३२० तक व न्हिनय् ३ बजेय् २१०८२०६४१ निसे २१०८२०९६० तक परीक्षा जुइ। १८० पूर्णांकया परीक्षाया ई ३ घण्टा जुइ धका  काउन्सिलं धागु दु।

मैलुङ खोला जलविद्युत् कम्पनीं बिक्री यागु धितोपत्रया प्रारम्भिक सार्वजनिक निष्कासन (आईपीओ) बाँडफाँड जूगु दु।

थौं बिक्री प्रबन्धक सिद्धार्थ क्यापिटलं कम्पनीया आईपीओ बाँडफाँड यागु दु। क्यापिटलया कथं कम्पनीया आईपीओय् कुल २० लाख ६७ हजार ९६७ म्हेसिया आवेदन बिगु खः।

उकि मध्ये २ हजार ८४३ म्हेसिगु आवेदन रद्द जुगु दु सा बाँकी २० लाख ६५ हजार १२४ म्हेसिगु आवेदन स्वीकृत जुगु दु। सामूहिक लगानी कोष व कर्मचारीपिन्त सुरक्षित यागु बाहेक सर्वसाधारणया लागि बिक्री खुला यागुलि ६ लाख ८४ हजार ७४६ कित्ता सेयर स्वीकृत आवेदनमध्ये ६८ हजार ४७४ म्हेसित १० कित्ताया दरं बाँडफाँड जूगु दु। उकि मध्ये खुम्हेसित थप छगु कित्ता अथे धइगु कुल ११ कित्ता सेयर प्राप्त यागु दु।

योग्य आवेदक मध्ये १९ लाख ९९ हजार ४९३ म्ह आवेदकपिन्त सेयर मलागु दु। कम्पनीं थ्व हे वंगु साउन १४ निसे १८ गते तक प्रतिसेयर १०० रुपैयाँया ७ लाख ३६ हजार २८६ कित्ता सेयर निष्कासनय् हःगु खः।

उकि मध्ये २ प्रतिशत अर्थात् १४ हजार ७२६ कित्ता सेयर कर्मचारीपिन्त व ५ प्रतिशत अर्थात् ३६ हजार ८१४ कित्ता सामूहिक लगानी कोषया लागि छुटे याना बाँकी दुगु ६ लाख ८४ हजार ७४६ कित्ता सर्वसाधारणया लागि बिक्री खुला यागु खः।

निन्हु न्ह्यनिसे लगातार घटे जुगु लुँया भाः थौं धासा तोला निसः थहावंगु दु।

थौं तोलां निसः थहावना ८९ हजार २ सय रुपैयाँ थ्यंगु दु। म्हिगः तोलां द्धःति व म्हिंगः  १५ सय रुपैयाँ घटे जुगु खः।

वहः धासा थौं तोलां झीतका क्वहावंगु दु। तोलां झीतक क्वहावया थां तोलां १२ सय ५ रुपैयाँ न कारोबार जुगु खः।