यलय् च्वंगु क्वन्ति महाद्यःया देगः जिर्णोद्धार सम्पन्न जुगु दु।

थौं छगु ज्याझ्वः दथुइ जिर्णोद्धारया अनावरण प्रधानमन्त्री शेरबहादुर देउवां यानादीगु दु। वंगु २०७२ वैशाख १२ व २९ गते ब्बगु भुखाचं देगः क्षति जुगु खः।

झण्डै ३ करोड रुपैयाँ उगु देगः जिर्णोद्धार यागु खः।

येँं महानगरपालिकाया मेयर विद्यासुन्दर शाक्यं येँया कला, संस्कृति, सम्पदा व भाषाया संरक्षण मयाइपिन्स आः चुनाव त्याके फइमखु धका धागु दु। येँ धइगु नेपाःया हे मू सांस्कृतिक नगर जुगु कारणं थनयागु कला, संस्कृति, भाषा, सम्पदाया संरक्षण यायेफतकि जक थुगु नगरया अस्तित्व कायम जुइगु  विचाः तयादीगु दु।

नेपालभाषा केन्द्रीय विभाग, पाटन क्याम्पसय् थौं छगु ज्याझ्वलय न्ववानादीसे मेयर शाक्यं येँ महानगरपालिकाय् थःपि निर्वाचित जुया वये धुका  थनयागु संस्कृति, सम्पदा व भाषा संरक्षणय् यक्को लगानी याये धुकागु दु। वयकल धयादीगु दु, ‘कुमारी संस्कृति आः विश्वय् परिचित नेपाःया संस्कृति खः उकिइ थुगु संस्कृतिइ छु न प्रकारया समस्या मवयेमाः धका जिमिसं वर्तमान जीवित देवी कुमारीया लागि मासिक ५० हजार, जीवित देवता गणेश व भैरवया लागि मासिक ३०–३० हजार विशेष भत्ताया व्यवस्था यानागु दु। अथेहे भूतपूर्व कुमारीया लागि मासिक १५ हजार व गणेश नाप भैवरया लागि मासिक १२–१२ हजारया व्यवस्था यानागु दु।

कुमारीया हेरचाह याइम्ह चिताइदार परिवारया लागि न मासिक ५० हजार बियागु दु।’ येँ महानगरपालिकां नकतिनि हे कक्षा १ निसे ८ तक शुरु याना नेपालभाषाया पाठ्यक्रम येँ देय् म्हसीके थःपिन्स शुरु जक यानागु व आः लिपा वइपि जनप्रतिनिधिपिन्स न थुकियात अझ थपे याइगु विश्वास यानादीगु दु,‘उकिइ सु ना थथे याइ उमिस जक आः चुनाव त्याके फइ।’

उगु हे ज्याझ्वलय न्ववानादीसे येँ महानगरपालिकायण उपमेयर हरिप्रभा श्रेष्ठ खड्गीं येँया संस्कृति धइगु हे आः विश्वय् नेपाःया संस्कृति धका परिचित जुगु दु व थुगु संस्कृतियात येँया नेवाः समुदायपिन्स बचे याना वयच्वंगु कारणं नेवाः समुदायपिनिगु भाषा, संस्कार, संस्कृतियात संरक्षण यायेत महानगरपालिकां प्राथमिकताय् तया वयाच्वनागु दु धका धयादीगु खः।

केन्द्रीय विभागं नेपालभाषाय् स्नातकोत्तर विषयया पठनपाठन शुरु यागु ४१ दँ थ्यंगु लसताय् जुगु उगु  ज्याझ्वलय् नेपालभाषाया महाकवि सिद्धिादास महाजुया दक्को कृति संकलन ‘सिद्धिमाः’ लगायत सफू पितब्बज्या जुगु दु। अथेहे नेपालभाषा केन्द्रीय विभागय् संग्रहित करिब ३० हजार सफूयात न डिजटाइज याना ई–पुस्तकालय रुपान्तरण यायेत येँ महानगरपालिकां ५० लाख बजेट विनियोजन यागु जानकारी बिगु खः।

नेपालभाषा केन्द्रीय विभागया प्रमुख प्रा.डा.ओमकारेश्वर श्रेष्ठ सभाध्यक्षताय् जुगु उगु ज्याझ्वलय् त्रिभुवन विश्वविद्यालयया उपकुलपति डा. धर्मकान्त बास्कोटा, पाटन संयुक्त क्याम्पसया प्रमुख डा. लक्ष्मण कुँवरपिन्स न न्ववानादीगु ख।

माधवकुमार नेपाल नेतृत्वया पार्टी यागु नां नेकपा एमाले मजुइगु जुगु दु। एमाले विभाजन यायेवं नेता नेपालं थःगु नेतृत्वय् नेकपा एमाले समाजवादी दर्ताया लागि बुधबाः निवेदन बिगु खः।

अय्न राजनीतिक दलसम्बन्धी अध्यादेश कथं नियमावली बिहीबाः जक वंगुलि शुक्रबाः हाकनं निवेदन बिइगु तयारी दु। अथेहे वंगु दिं एमाले समाजवादी नेता डा. विजय पौडेल आयोग वंगु खः।

आयोगया अधिकारीपिन्त नापलाना सर्वोच्च अदालतं २३ फागुनया फैसला कथं छगु पार्टीया नां विशेषण झुण्डे याना मेगु दल दर्ता याये मज्यु धका धागु दु।

पौडेलं नेकपा एमाले समाजवादी मजुसे नेपाल कम्युनिस्ट पार्टी एकीकृत समाजवादी तयेज्यु ला धका न्यंगु खः। नेपाल समूहया नेतापिनिगु कथं नेपाल कम्युनिस्ट पार्टी एकीकृत समाजवादी वा नेपाल कम्युनिस्ट पार्टी समाजवादी नांया पार्टी दर्ता जुइगु सम्भावना दु।

सरकारं प्रभुराम शर्मायात प्रधान सेनापतिइ नियुक्त यायेगु सिफारिस यागु दु।

बिहीबाः च्वंगु मन्त्रिपरिषदया बैठकं नेपाली सेनाया कायममुकायम प्रधान सेनापति शर्मायात प्रधान सेनापति नियुक्त यायेगु राष्ट्रपति समक्ष सिफारिस यागु दु।

सरकारया प्रवक्ता ज्ञानेन्द्रबहादुर काकीया कथं भदौ २५ गते निसे लागू जुइगु कथं शर्मा प्रधान सेनापति नियुक्त यागु खः।