वंगु २४ घण्टाया दुने देयन्यक कोभिड–१९ या कारणं ३ हजार ७५ म्ह संक्रमितपि थपे जुगु दु।

१६ हजार ४३८ म्हेसिगु स्वाब नमुना परीक्षण यागुलि ३ हजार ७५ म्हेसित कोरोना  संक्रमण पुष्टि जुगु दु।

थ्व नाप आःतक नेपालय् सक्रिय संक्रमितपिनिगु ल्याः ४० हजार ५०० म्ह थ्यंगु दु। अथेहे, वंगु २४ घण्टाया दुने कोरोनाया कारण देयन्यक ३३ म्ह सीगु दु।

अथेतु थौं २ हजार १२६ म्ह संक्रमणमुक्त जुगु दु धका स्वास्थ्य तथा जनसंख्या मन्त्रालयं धागु दु।

फागुन २३ गते सर्वोच्च अदालतपाखे नेकपा एमाले जुइवं ८९ म्ह केन्द्रीय सदस्यपिनिगु साथ दुम्ह माधवकुमार नेपालं म्हिगः बुधवाः पार्टी विभाजन यासे स्थायी कमिटीया अधिकांश नेतापि नाप ३७ म्ह केन्द्रीय सदस्यपिनिगु न साथ गुमे यागु दु।

नेता नेपालं दल दर्ताया लागि निवेदन बिगुलि एमाले समाजवादीया ९५ म्ह सदस्यीय केन्द्रीय समितिइ साबिक एमालेया ५८ म्ह केन्द्रीय सदस्य दुथ्यागु खः।

अथेहे वया दथुइ पशुपति चौलागाई मदुगु व गणेश पहाडी, बिष्णु रिजाल नाप सोम मिश्रपिन्स माधव गुट त्वतेवं ८६ म्ह केन्द्रीय सदस्य दुगु खः।

नौकुण्ड गाउँपालिका–५ कोलडाँडाय् चलः वया छम्ह सीगु दु सा छम्ह घाइते जुगु दु।

अथेहे स्वम्ह बेपत्ता जुगु दु। वाः वयातुं च्वंगुलि चलः वया श्यामबहादुर धइम्ह बुद्धि तामाङया जहान ३२ दँ दुम्ह कमला मदुगु खः।

चलः वया तनाच्वम्ह कमलाया शव ल्हानाच्वंगु अवस्थाय् लुगु खः । अथेहे ११ दँ दुम्ह म्ह्याय् पि सोकिता, ८ दँ दुम्ह सुकुमाया व न्ह्य दँ दुम्ह काय् आशिष अझ न बेपत्ता जुयाच्वंगु दनि।

उमित मालेगु ज्या जुयाच्वंगु दु धका रसुवाया प्रहरी नायब उपरीक्षक देवेन्द्र पाण्डे धागु दु।

राजधानी दैनिकया अध्यक्ष महेन्द्र शेरचन कोरोना संक्रमणं मन्त।

६७ दँ दुम्ह शेरचन सशस्त्र प्रहरीया एपीएफ अस्पतालय् बुधबाः बहनि मदुगु खः। निवाः न्ह्यः कोरोना संक्रमण पुष्टि जुगु खः।

पशुपतिस्थित आर्यघाटय् थौं सुथय् ११ बजे वयागु अन्त्येष्टि याइ धका पारिवारिक स्रोतं धागु दु। मदुम्ह शेरचन मिडिया अलाइन्सया उपाध्यक्ष व विज्ञापन बोर्डया सदस्य न खः।

मदुम्ह शेरचनया जहान नाप स्वम्ह काय् व छम्ह म्ह्याय् दी।

रोजगारीया झ्वलय् अफगानिस्तानय् वंपि २८८ म्ह नेपाःमिपिनिगु उद्धार यानागु दु धका परराष्ट्र मन्त्रालयं धागु दु।

मन्त्रालयया कथं मित्रराष्ट्रपि नाप निरन्तर कुतः व समन्वयय् २८८ म्ह नेपाःमिपिनिगु उद्धार याना येँ हःगु दु। भदौ १ गते सुथय् ११८ म्ह व चान्ह्य ८४ म्ह व भदौ २ गते सुथय् ६१ म्ह व बहनि २५ म्ह येँ हःगु खः।

अफगानिस्तानपाखे उद्धार याना थप नेपाःमिपि नेपाल हयेगु प्रकृया न्ह्याकगु दु धका परराष्ट्र मन्त्रालयं धागु दु। उद्धार याना सामाखुशीइ सरकारं व्यवस्थापन याना होल्डिङ सेन्टरय् तयेगु व स्वास्थ्य मापदण्ड कथं कोभिड–१९ या परीक्षणलगायत प्रक्रिया याना छेँ छ्वयेगु तयारी यागु दु।