बागमती प्रदेशया मुख्यमन्त्री अष्टलक्ष्मी शाक्य नियुक्त जुगु दु। वयकलं थौं बुधबाः हे पद व गोपनीयताया शपथ कागु दु।

एमाले दुने माधवकुमार नेपाल समूहय् दुम्ह नेता नेपालं न्हुगु पार्टी दर्ता यायेवं हे मुख्यमन्त्री नियुक्त यागु खः। न्हुगु पार्टी गठनय् नेता नेपालयात साथ मबिउम्ह शाक्ययात एमालेें वाग्मती प्रदेश संसदीय दलं बुधबाः हे दलया नेता ल्यंगु खः।

वयकःयात संसदीय दलया नेताय् निवर्तमान मुख्यमन्त्री डोरमणि पौडेलं हे प्रस्ताव यागु खः। एमालेपाखे बागमती प्रदेश सभाय्् ५६ म्ह सांसद दु।

कुल ११० सांसद दुगु बागमतीइ बहुमतया लागि ५६ सांसद आवश्यक दु। एमालेया सांसदया हे बलं पौडेलयाके बहुमत दु। बागमतीइ ओलीपक्षया ३५ व माधवपक्षया २१ म्ह सांसद दु।

प्रदेशय् प्रमुख प्रतिपक्ष नेकपा माओवादी केन्द्र २३, नेपाली कांग्रेस २२, विवेकशील साझा ३, नेपाल मजदुर किसान पार्टी २, राप्रपा २ व छम्ह स्वतन्त्र सांसद दु।

शेयर कारोबार मापक नेप्से परिसूचक आःतक हे दकलय् उच्च विन्दुइ थ्ंयगु दु। बुधबाः नेप्से परिसूचक ३ हजार २ सय न्ह्यने थ्यका न्हुगु रेकर्ड कायम जुगु दु।

थ्व स्वया न्ह्यः ३ हजार १७९ अंकय् थ्यका न्हुगु रेकर्ड कायम जुगु खः। नेप्से परिसूचक नाप कारोबारय न थौं बुधबाः उत्साह खनेदुगु दुगु। कारोबार रकम धासा २१ अर्ब ६४ करोड स्वया न्ह्यने थ्यका न्हुगु रेकर्ड तोडे याये फुगु मदुनि।

नेप्से परिसूचक ३८ दशमलव २८ अंकं थहावना ३ हजार १९८ दशमलव ६० अंकय् थ्यंगु दु। ‘क’ वर्गया कारोबार मापन यायगु सेन्सेटिभ इन्डेक्स न ४ दशमलव ८३ अंकं थहावंगु दु। कारोबार रकम न २१ अर्ब स्वया अप्वो थ्यंगु दु।

थौं जुगु १ लाख ८८ हजार ४५४ कारोबारपाखे २२८ कम्पनीया ३ करोड ६५ लाख ९ हजार ७५१ कित्ता शेयर किनबेच जुगु खः। उकिइ कारोबार रकम २१ अर्ब ३१ करोड ३४ लाख ८९ हजार २६९ कित्ता रुपैयाँ थ्यंगु दु।

वंगु २४ घण्टाया दुने स्वनिगलय् ९९३ म्हेसित कोरोना संक्रमित जुगु दु। उकि मध्ये येँ ७११ म्हेसित कोरोना सक्रमण जुगु दु सा यलय् १६० म्ह व ख्वपय् १२२ म्ह संक्रमित जुगु दु।

स्वास्थ्य तथा जनसंख्या मन्त्रालयया कथं कास्कीइ ३१५, झापाय् १८३, मोरङय् १४६, व चितवनय् ११५ म्हेसित कोरोना संक्रमण पुष्टि जुगु दु।

अथेहे सुनसरीइ ८६, रुपन्देहीइ ६१, काभ्रेपलाञ्चाय् ५७, मकवानपुरय् ५६, कैलालीइ ४३, नवपलपरासी पुर्व व दाङय् ३९÷३९ , नुवाकोटय् ३४, गोरखा व स्याङजाय् ३०÷३० म्ह, इलाम व बागलुङय् २८÷२८ म्ह, सुर्खेतय् २३, सिन्धुपाल्चोक व लमजुङय् २२÷२२ म्ह व बर्दियाय् २० म्ह कोरोना संक्रमण खनेदुगु दु।

जुम्लाय् १९, पर्वत व म्याग्दीइ १७÷१७ म्ह, पाल्पा व बाँकेय् १६÷१६ म्ह, धनकुटा व धादिङय् ११÷११ म्ह व तनहुँइ १० म्हेसित कोरोना संक्रमितपि थपे जुगु दु धका स्वास्थ्य तथा जनस्ख्या मन्त्रालयं धागु दु।

वंगु २४ घण्टाया दुने देयन्यक ३४०३ म्ह कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ११ हजार ८३९ म्हेसिगु पीसीआर परीक्षणय् २,६१३ म्ह व ४,९९९ म्हेसित एन्टिजेन परीक्षणय् ७९० म्ह याना ३,४०३ म्हेसित कोरोना संक्रमण पुष्टि जुगु खः।

मन्त्रालयया कथं वंगु २४ घण्टाया दुन २,१०४ म्ह संक्रमणमुक्त जुगु दु सा ४२ म्ह सीगु दु।

नेकपा एमाले विभाजन याना माधवकुमार नेपाल समूह न न्हुगु दल नेकपा एमाले समाजवादी दर्ताया लागि निर्वाचन आयोगमा निवेदन बिगु दु।

सरकारया सिफारिसय् राष्ट्रपति विद्यादेवी भण्डारीं संसदीय दल वा केन्द्रीय समितिं २० प्रतिशतं दल विभाजन याये फइगु राजनीतिक दलसम्बन्धी अध्यादेश हयेवं नेपाल समूह न न्हुगु दल दर्ताया निर्णय यागु खः।

नेता नेपालं एमालेया ५८ म्ह केन्द्रीय सदस्य नाप न्हुगु दल दताया लागि आवदेन बिगु खः।  न्हुगु पार्टीया अध्यक्ष माधवकुमार नेपाल नाप वरिष्ठ नेता झलनाथ खनाल खः।

अथेहे ९५ म्ह सदस्यीय केन्द्रीय कमिटी गठन यागु धका नेता पाण्डें जानकारी बिगु खः। एमाले समाजवादीइ गुक्वःगु महाधिवेशननिसे नेपाल समूहय् दुपि स्थायी कमिटीया अधिकांश नेतापि मदु। भीम रावल, अष्टलक्ष्मी शाक्य, घनश्याम भुसाल, योगेश भट्टराई लगायतया नेतापिे नेता नेपालयात त्वतूगु दु।