प्रधानमन्त्री नाप नेपाली कांग्रेसया सभापति शेरबहादुर देउवां इस्लाम धर्मावलम्बीपिनिगु  नखः इद उल अज्हाया लसताय् सकल नेपाली मुसलमान समुदायपिन्त भिंतुना देछानादीगु दु।

प्रम देउवां बिगु भिंतुना सन्देशय् संयमता, धैर्यता, विश्वशान्ति भाइचाराया सन्देश बिया थुगु नखःपाखे स्वदेश व विदेशय् च्वनाच्वपि सकल नेपाली मुस्लिम समुदायपिनिगु उन्नति, प्रगति व समृद्धिया कामना यानादीगु दु।

कोभिड–१९ या महामारीया कारण झीगु सामाजिक व सांस्कृतिक धरोहरय नखः दक्को छथाय् च्वना हनेत थाकुगुलि देउवां कोभिड–१९ या प्रभाव मजुइमा धासे स्वास्थ्यया मापदण्ड अपने याना इद पर्व हनेत इनाप यागु दु।

वरिष्ठ कलाकार नाप नेपाल प्रज्ञा प्रतिष्ठानया आजीवन सदस्य उत्तम नेपाली ८५ दँय् मन्त।

मनमोहन कार्डियोभास्कुलर सेन्टर महाराजगञ्जय् उपचार यायेगु झ्वलय् थौं बुधबाः सुथसिया४ बजे मदुगु खः।

नेपाली अमूर्त कलाया सिद्धहस्त कलाकार माने यानातम्ह खः। वयकः छु दिं निसे मुटुइ समस्या खनेदुग खः।

वयकःया परिवारय् निम्ह म्ह्याय् दिइ।

प्रधानमन्त्री शेरबहादुर देउवा नेकपा माओवादी केन्द्रया अध्यक्ष पुष्पकमल दाहाल प्रचण्ड निवास खुमलटार वंगु दु।

बिरामी जुयाच्वम्ह प्रचण्ड जहान सीता दाहालयात नापलायेगु निति प्रधानमन्त्री देउवा प्रचण्ड निवास वंगु दु धका धागु दु।

व स्वया न्ह्यः थौं सुथय् प्रधानमन्त्री देउवायात नापलायेगु निति माओवादी अध्यक्ष प्रचण्ड बालुवाटार वंगु खः। उगु भेटय् सरकार सञ्चालन व गठबन्धनया साझा नीति व कार्यक्रम क्वछिगु विषय छलफल जुगु खः।

अथेहे प्रचण्डं थौं हे नेकपा एमालेया वरिष्ठ नेता माधवकुमार नेपाल नाप  न भेटवार्ता यागु खः। मंगलबाः सुथय् सत्तारुढ गठबन्धन जनता समाजवादी पार्टीया अध्यक्ष उपेन्द्र यादव न नेता नेपालयात नापलागु खः।

स्वास्थ्य मन्त्रालयया कथं थौं दकलय् अप्वो येँ ५३१ म्हेसित कोरोना सक्रमित जुगु दु धका धागु दु।

अथेहे मोरङय् २५२, झापाय् १७८, सुनसरीइ १६५, यलय् १४७, कास्कीइ १२६ व चितवनय् १२५ म्हेसित कोरोना संक्रमण जुगु दु धका धागु दु। अथेतु, मकवानपुरय् ६८, नवलपरासी पूर्वय् ६१, कैलालीइ ४५, धादिङइ ४४, ख्वपय् ४१, रुपन्देहीइ ३७, पाल्पाय् ३२, बागलुङय् २७, दोलखाय् २३, काभ्रे व सुर्खेतय् २२÷२२ म्हेसित कोरोना संक्रमित जुगु दु।

सप्तरीइ १७, बाराय् १६, तनहुँ व स्याङजाय् १४÷१४ म्ह, रामेछाप, पर्वत व दाङय् १२÷१२ म्ह, नुवाकोटय् ११ व तेह्रथुमय् १० म्हेसित कोरोना संक्रमण पुष्टि जुगु दु धका मन्त्रालयं धागु खः।

वंगु २४ घण्टाया दुने थप ३,१०८ म्हेसित कोरोना भाइरस (कोभिड–१९) या संक्रमण पुष्टि जुगु दु।

देयन्यक १३ हजार १३५ म्हेसिगु नमुना परीक्षण यागुलि उलि संक्रमण पुष्टि जुगु खः। अथेहे २५ म्ह कोरोना सक्रमण सीगु दु धका स्वास्थ्य तथा जनासंख्या मन्त्रालयं धागु दु सा १ हजार ५९५ म्ह कोरोनामुक्त जुगु दु।

मंगलबाः थपे जुगु नाप आःतक नेपालय् कोरोना संक्रमितपि ६ लाख ७० हजार ९९३ म्ह थ्यंगु दु। उकि मध्ये ९ हजार ६०७ म्ह सी धुकुगु दु सा ६ लाख ३४ हजार ९२७ म्ह संक्रमणमुक्त जुइ धुकुगु दु।