नेवाः विद्यार्थी युनियनया ग्वसालय् नेपालभाषाया निगू सफू – श्रीलक्ष्मीश्रेष्ठया ‘सच्छिदंया सत्यमोहन जोशी’ व डा.बालगोपाल श्रेष्ठया ‘डायरी पानाय् बुयावःगु कविता’या समालोचकीय परिचर्चाया भर्चुअल ज्याझ्वः क्वचागु दु ।

ज्याझ्वलय शताब्दी पुरुष सत्यमोहन जोशीजुं नेपालभाषाया काव्यया इतिहास कुलादिसें सफू च्वमिपिंत निरन्तर च्वज्या न्ह्यज्याना चोनेमा धका भिंतुना व सुवाः बियादिगु ख । भिंतुना संदेश भिडियो रेकर्ड क्यनेगु ज्या जूगु ख । उगु ज्याझ्वलय् बिमल ताम्राकारपाखें ‘सच्छिदंया सत्यमोहन जोशी’ सफूया महत्व कनादीगु खःसा, ‘डायरी पानाय् बुयावःगु कविता’ सफूया तकया समालोचकपिं पूर्णकाजी ताम्राकारपाखें ‘वैचारिक सचेतता’, ध्रुब मधिकर्मिपाखें सफूया ‘सन्दर्भ म्हिगः व थौं’ व डा. ज्योति तुलाधारपाखें ‘डायरी पानाय् बुयावःगु कविता जिं स्वयेबलय्’ विषयस केन्द्रित जुयाः समालोचना प्रस्तुत यानादीगु खः।

ह्याउँनिभाः टाइम्सया संयोजनय् जूगु थुगु ज्याझ्वलय् सफू नाप सम्बन्धित दिवंगत जुयावंपिं स्वम्ह व्यक्तित्वपिं नांदंम्ह समालोचक इन्द्र माली, मस्कोय् च्वनादीम्ह च्वमि अले अनुवादक कृष्ण प्रकाश श्रेष्ठ व समालोचक माधव लाल प्रधानप्रति श्रद्धाञ्जलि देछासें न्ह्याःगु खः । नेवाः विद्यार्थी युनियनया नायः रिदेन महर्जनं लसकुस न्वचूबिया न्ह्योज्यागु उगु ज्याझ्वलय् ह्याउँनिभाः पुचःया पाखें नायः धनबहादुर महर्जनं नेपालभाषा साहित्य नापनापं थौंया इलय्‘नेवाः लगानी – नेवाः बजार विस्तार – नेवाः समाजया विकासया लागि’ धइगु अवधारणा ज्वनाः न्ह्यज्यायेमाःगुआवश्यकतायात कुलादिगु ख।

भाजु अच्युत रत्न बज्राचार्यं न्ह्याकुगु उगु ज्याझ्वःया लिपातय च्वमि श्रीलक्ष्मी श्रेष्ठपाखें सुभाय् देछा व च्वमि बाल गोपाल श्रेष्ठपाखें थःगु खँ नापं सुभाय् देछाये ज्या धुंकाः ज्याझ्वः क्वचागु खः । नेपाल संवत ११४१ तछलागा दशमि कुन्हुं जुमया दबुलिइसंचालन जूगु थुगु ज्याझ्वः च्यानल एस टेलिभिजन, फेसबुक व युट्यूवपाखें प्रत्यक्ष प्रसारण जूगु खःसा थीथी नेपाः, बेलायत, अमेरिका नापं युरोपया थीथी देशय दीपिं नेपालभाषाया साहित्यकार लगायतं ब्वतिकागु खः ।

महालक्ष्मी उद्योग वाणिज्य संघ व अरनिको समाज मिले जुया चीनं वंगु स्वास्थ्य सामाग्री महालक्ष्मी नगरपालिका व लुभु प्राथमिक स्वास्थ्य चौकीइ हस्तान्तरण यागु दु।

कोभिड–१९ महामारी रोकथाम यायेत चीनया थीथी कम्पनीािखे नीद्धः मास्क, पञ्जा, पीपीई, कन्टिन्युअस पोजेटिभ एअर प्रेसर थेरापी मेसिनया सामाग्री उपलब्ध यागु खः।

महालक्ष्मी वाणिज्य संघ अध्यक्ष सञ्जय नारायण श्रेष्ठ व अरनिको समाजया अध्यक्ष सर्वोत्तम श्रेष्ठं महामारी नियन्त्रण यायेत फुगु कुतः जुयाच्वंगु दु व थुकियात निरन्तरता कुतः यानाच्वनिगु ज्इ धका धयादीगु खः। महालक्ष्मी नगरपालिकाया मेयर रामेश्वर श्रेष्ठं समाजयात भिंकेगु लागि संघसंस्था नाप एमओयू याना ज्या यायेत थः इच्छुक दु धका धयादीगु खः।

ललितपुर उद्योग वाणिज्य संघ पूर्वअध्यक्ष अजरमान जोशीं वंगु सामाग्रीया सहि प्रयोग जुइमाः धका बः बियादीगु खः। 

लियो क्लब अफ काठमाडौं कोहिनुर ‘लियो वर्ष २०२१–२२’ या अध्यक्षय् यलयाम्ह अभिनव जोशी नियुक्त जुगु दु।

भर्चियोल ज्याझ्वः दथुइ पदस्थापन जुगु खः। अथेहे न्हापाम्ह उपाध्यक्षय् यजु महर्जन, निम्हम्ह मेरिना सिलवाल, सचिवय् आज्ञा श्रेष्ठ, कोषाध्यक्षय् अनिता तामाङ, सह–सचिवय् प्रणय प्रधान, सह–कोषाध्यक्षय् ग्रिष्मा श्रेष्ठ नियुक्त जुगु खः।

प्रोग्राम डाइरेक्टरय् आशिका पोखरेल व प्राप्ति श्रेष्ठपिं च्वनादीगु खः। लायन्स क्लबया युवा संगठन लियो क्लब युवा नेतृत्वया विकास व सामाजिक ज्याय् सक्रिय जुयावया च्वंगु संस्था खः।

संसद विघटन मुद्दाया सुनुवाइ यायेगु निति थौं संवैधानिक इजलास च्वनेत्यंगु दु। प्रधानन्यायाधीश चोलेन्द्र शमसेर जबरा नेतृत्वया इजलासय् पक्ष विपक्षया बहस, एमिकस क्युरीया राय लगायत प्रक्रिया वंगु असार २१ गते क्वचाःगु दु।

सर्वोच्च अदालत स्रोतं सुनुवाइया दक्को प्रक्रिया क्वचाःगुलिं थौं फैसला वयेफु धका धागु दु। प्रतिनिधिसभाया १४६ सांसदपिन्स प्रतिनिधिसभा विघटन बदर यायेत व शेरबहादुर देउवायात प्रधानमन्त्री दयकयेगु परमादेशया माग यासे सर्वोच्चय् रिट दायर यागु खः।

वंगु जेठ ७ गते सरकारया सिफारिसय् राष्ट्रपति विद्यादेवी भण्डारीं प्रतिनिधिसभा विघटन यासे वंगु कात्तिक २६ व मंसिर ३ गते मध्यावधि निर्वाचन घोषणा यागु खः। थुगु पलाःयात असंवैधानिक धासे सर्वोच्च अदालतय् ३० गु रिट वःगु खः। उगु रिटय् वंगु असार ९ गतेनिसे निरन्तर बहस जुयावया च्वंगु खः।

कांग्रेस सभापति शेरबहादुर देउवायात वैकल्पिक प्रधानमन्त्रीया रुपय् न्ह्यने हयाः विपक्षी गठबन्धनया १४६ म्ह सांसदपि पाखे दायर रिटय् देउवायात प्रधानमन्त्री दयकेत परमादेश जारी यागु खः। रिटया सुनुवाइ लागि प्रधानन्यायाधीश जबराया नेतृत्वय्, न्यायाधीशपि दीपककुमार कार्की, मीरा खड्का, ईश्वरप्रसाद खतिवडा व डा.आनन्दमोहन भट्टराईपिनिगु संवैधानिक इजलास गठन यागु खः।

वीरेन्द्र अस्पताल छाउनीइ महानगरवासी मृगौला ल्वगिया लागिं निःशुल्क हेमोडाइलाइसिस सेवा थौंनिसे न्ह्याःगु दु।

येँ महानगरपालिकाया आर्थिक ग्वाहालि व नेपाली सेनाया व्यवस्थापनय् वीरेन्द्र अस्पताल छाउनीइ निःशुल्क हेमोडाइलासिस सेवा न्ह्याःगु खः। थौं आइतबाः येँ महानगरपालिका मेयर विद्यासुन्दर शाक्य व प्रधान सेनापति पुर्णचन्द्र थापां मंकाः रुपं निःशुल्क हेमोडाइलाइसिस सेवा न्ह्याकादिगु खः। उगु ज्याझ्वलय् महानगर मेयर शाक्यं मिर्गौला सम्बन्धी ल्वय् जुइ न्ह्यवः हे उकिया पनेत वा ल्वय् जुइधुंकाः अप्वः स्यंकेमबीत थुगुसीनिसें हे ‘स्वस्थ मिर्गौला–स्वस्थ काठमाडौं’ ज्याझ्वः न्ह्यायेधुंकूगु दु धका धयादिगु खः।

मिर्गौला बचाउ अभियान नांया संस्थालिसे सहकार्य यासें महानगरपालिकाया स्वीनिगुलिं वडाय् ज्याझ्वः न्ह्याःगु शाक्यं जानकारी बियादिगु खः। ‘येँ महानगरपालिकां थःगु नीति अले कार्यक्रमय् हे अस्पताल न्ह्याकेगु धाःगु दु । आःया लागिं व सम्भव मजूगुलिं विशेषज्ञ सेवा दुपिंलिसे सहकार्य यानाः महानगरवासीयात स्वास्थ्य सेवा बीगु कुतः न्ह्याकागु खः’ शाक्यं धयादिल ।

सेवा न्ह्याकेत आवश्यक भौतिक पूर्वाधार, ८ हेमोडायलाइसिस मेसिन, छगः रिप्रोसेसिङ मेसिन, लः शुद्धीकरण प्लान्ट व मेगु मेडिकल उपकरणत नं जडान यायेत महानगरं अस्पतालयात ३ करोड तका अनुदान उपलब्ध याकूगु दु । थुगु सम्बन्धि महानगरपालिका व अस्पताल दथुइ ०७६ पुस २ गते सम्झौता जूगु खः । सम्झौताया ई न्यादँया तयातःगु दु । सम्झौता कथं जडान जूगु ८ हेमोडायोलाइसिस मेसिनं हरेक वालय् निगू सिफ्टय् सेवा बी फइ। अस्पतालया प्रमुख सहायक रथी डाक्टर अरुण शर्मां सेवा काःवइपिं विरामीं महानगरं ब्यूगु सिफारिस ज्वनाः वयेमाःगु जानकारी बियादिल।

सेवा न्ह्याकेत अस्पतालय् बिस्कं हे युनिट दयेकूगु दु । उपचारय् संलग्न छम्ह एमबीबीएस डाक्टर, स्वम्ह स्टाफ नर्स, छम्ह हेमोडायलाइसिस प्राविधिक, छम्ह प्रशासन स्वइम्ह अधिकारी व छम्ह सफाई कर्मचारी यानाः मुक्कं ७ जनशक्तिया लागिं तलब खर्च महानगरं बी ।मिर्गौलां ज्या मयाइगु अवस्थाय् शरीरय् मुनीगु दुषित पदार्थत शरीरं पिछ्वयाः स्वस्थ दयेकेगु विधि डायोलाइसिस खः ।

आः देयन्यंकया ६५ गु अस्पतालय् ४०० व ९८ डायोलासिस मेसिनं ३ हजार ५०० व १६ विपन्न वर्गया विरामीतयसं निःशुल्क हेमोडायोलाइसिस सेवा कयाच्वंगु तथ्याङ्क दु । निःशुल्क डायोलाइसिस यायेबलय् राज्यं प्रति विरामी दँय् २ लाख ६० हजार तका खर्च यानाच्वंगु धाःगु दु ।नेपालय् दँय्दसं २ हजार ६सःम्ह मिर्गौलाया न्हूपिं विरामी थप जुयाच्वंगु सरकारी तथ्यांक दु ।