नेपाली कांग्रेसया संस्थापन समूह इतर जिल्ला सभापतिपिनिगु भेला क्वचायेवं पार्टी सभापति शेरबहादुर देउवा निकट जिल्ला सभापतिपि न छलफल सुरु यागु दु।

महाधिवेशनयात सुनिश्चित यायेत धासे संस्थापन पक्ष निकट जिल्ला सभापतिपि बिहीबाः सुथ निसे छलफल यागु दु।

संस्थापन समूह निकट जिल्ला सभापतिपिन्स  थौं पार्टी सभापति देउवा व वरिष्ठ नेता पौडेल लगायत केन्द्रीय सदस्यपिन्त नापलाना महाधिवेशन मजुइगु कथं व विधानविपरीतया भेला दिकेत इनाप यायेगु तयारी यागु दु।

वरिष्ठ नेता पौडेल निकट जिल्ला सभापतिपिनिगु भेलां महाधिवेशन यायेत नेतृत्वं मूस्वगू व पार्टी वैधानिकता संकटय वंगु आरोप बिगु दु।

लुम्बिनी प्रदेश सरकारया दाबी यासे प्यंगु दलीय गठबन्धनं ४२ म्ह सांसदपिनिगु हस्ताक्षर प्रदेश प्रमुख अमिक शेरचनया लल्हागु दु।

माओवादी केन्द्रया नेता कुलप्रसाद केसी (सोनाम) यात ४२ म्ह सांसदपिनिगु समर्थन दु धासे गठबन्धनया संयोजक नाप कांग्रेस संसदीय दलया नेता विरेन्द्र कनोडियां प्रदेश प्रमुख शेरचनयात लल्हागु खः।

उगु गठबन्धनय् हृदयश त्रिपाठी समूहय् दुम्ह अजय शाही न केसीयात समर्थन यासे लल्हाग खः।

थौं बिहीबाः निसे स्वनिगलय् बहनि सवारी साधन सञ्चालन याये मदइगु जुगु दु।

कोरोना भाइरस (कोभिड–१९) या जोखिम अप्वोया वंगुलि निषेधाज्ञायात छु भचा कडा यासे बहनि ८ बजे लिपा सार्वजनिक व निजी सवारी साधन सञ्चालनय् रोक लगे यागु दु। थुगु नियम भदौ ८ गते तक लागू जुइ।

स्वनिगलय् च्वपि स्वम्ह प्रमुख जिल्ला अधिकारीपिनिगु निर्णय कथं चान्ह्यःया इलय् अत्यावश्यकबाहेकया सवारी साधन सञ्चालन याये दइ मखु।

निर्माण सामग्री ढुवानीया लागि धासा बहनि ९ बजे निसे सुथय् ५ बजे तक सवारी साधन सञ्चालन याये दइ मखु।

पसः धासा बहनि ७ बजे लिपा बन्द यायेमाः।

विश्वविद्यालयया थीथी संकाय व तहया परीक्षा बिइपि विद्यार्थीपिन्त थौंनिसे खोप बिइगु सुरु यायेगु धका सरकारं धागु दु।

स्वास्थ्य सेवा विभाग परिवार कल्याण महाशाखाया खोप शाखा प्रमुख डाक्टर झलक गौतमया कथं झण्डै ६० हजार विद्याथीपिन्त खोप बिइगु तयारी दस धका धागु दु।

दक्को स्वास्थ्य निर्देशनालय, प्रदेश व जिल्ला स्वास्थ्य कार्यालय खोपया व्यवस्था याये धागु दु व येँ थौंनिसे विद्यार्थीपिन्त खोप बिइगु सुरु याइगु जुगु दु।

स्वास्थ्य तथा जनसङ्ख्या मन्त्रालय म्हिगः च्वंगु सचिवस्तरीय बैठकं त्रिभुवन विश्वविद्यालय लगायत मेमेगु विश्व विद्यालयया परीक्षाय् सहभागी जुइपि विद्यार्थीपिन्त न कोरोना विरुद्धया खोप बिइगु निर्णय यागु दु।

लुम्बिनी प्रदेश सरकारय् थौं विपक्षी गठबन्धनं दाबी पेस याइगु जुगु दु। मुख्यमन्त्री शंकर पोखरेलं म्हिगः थःगु पदपाखे राजीनामा बिगुलि प्रदेश प्रमुख अमिक शेरचनं दलपिन्त थौं न्हिनसिया ३ बजे तक ई बिया सरकारय् दाबी पेस यायेत धागु खः।

कांग्रेस, माओवादी, जसपा व राष्ट्रिय जनमोर्चाया गठबन्धनं थौं सरकारया नेतृत्वय् दाबी पेस यायेत धागु दु। विपक्षी गठबन्धनं माओवादी केन्द्र संसदीय दलया नेता कुलप्रसाद केसी (सोनाम) यात न्हुम्ह मुख्यमन्त्रीया रुपय् न्ह्यने हःगु खः। कांग्रेस व माओवादी दथुइ च्याला च्याला सरकारया नेतृत्व यायेगु सहमति जुगु खः।

उगु सहमति कथं सुरुया च्यालाया लागि माओवादी नेता केसीयात न्ह्यने हःगु खः। विशेष अधिवेशन आह्वान हे गलत खः धासे लुम्बिनी प्रदेशया सांसद लीला गिरीं सर्वोच्च अदालतय् रिट दायर यागु खः। तर रिटया सुनुवाइ जुगु हे दिं प्रदेशसभाया विशेष अधिवेशनय् मुख्यमन्त्री विरुद्धया अविश्वास प्रस्तावय् छलफल जुगु खः। तर अविश्वास प्रस्ताव क्वमछिकं हे मुख्यमन्त्री पोखरेलं राजीनामा बिगु खः।

सर्वोच्चं थ्व स्वया न्ह्ययागु मुद्दाय् प्रदेश प्रमुखया कार्यालय, प्रदेशसभा सचिवालय लगायतया विपक्षीपिन्त लिखित जवाफ माग यागु व रिटयात संवैधानिक इजलासय् सुनुवाइ यायेगु निर्णय यागु खः।