लुँया भाः थौं तोलां प्यसः कुहावंगु दु।

थौं प्यसः कुहावया तोलां ८८ हजार ८ सय रुपैयाँ कायम जुगु दु। नेपाल सुनचाँदी व्यवसायी महासंघया कथं अन्तर्राष्ट्रिय बजारय् लुँया भाः कुहावंगुलि नेपालय् न कुहावंगु खः धका धागु दु।

थौं महासंघं तेजावी लुँया भाः ८८ हजार ३५० रुपैयाँ कायम यागु दु। अथेहे थौं वहः न झीन्यातका कुहावंगु दु।

वहः तोलां झीन्यातका कुहावया १ हजार १९० रुपैयाँ कारोबार जुगु धका महासंघ धागु दु।

सरकारं हितेन्द्रदेव शाक्ययात उपयुक्त थासय् बिया नेपाल विद्युत प्राधिकरणया कार्यकारी निर्देशकपाखे विदा बिगु दु। कुलमान घिसिङयात प्यदँया लागि कार्याकारी निर्देशक नियुक्त यागु दु।

अथेहे सरकारं शाक्ययात विज्ञताया आधारय् न्हुगु सम्मानजक नियुक्त यायेगु निर्णय यागु दु। शाक्ययात जल तथा ऊर्जा क्षेत्रय्े ‘थिंक ट्यांक’ माने यागु जल तथा ऊर्जा आयोगया सचिवालय प्यदँया लागि नियुक्त यागु दु।

सिंहदरबारय् ऊर्जा, जलस्रोत तथा सिँचाइ मन्त्रालय दकलय् सचिवालयया विशिष्ठ श्रेणीया पद (सचिव) सरहया पद दयका प्राधिकरणया कार्यकारी निर्देशकया पारिश्रमिक व सुविधा दइगु कथं आयोगय् पूर्णकालीन सदस्य नियुक्त यागु खः।

शाक्यया आः मासिक तलब २ लाख २१ हजार रुपैयाँ व कार्यसम्पादन मूल्याङ्कनया आधारय् प्रोत्साहन भत्ता दु। अथेहे ‘लिडरसिप एलाउन्स’ थप २ लाख याना शाक्यं मासिक ४ लाख रुपैयाँ स्वया अप्वो सुविधा दु। उगु सुविधा घटे मजुइगु कथं शाक्ययात आयोगया विज्ञ कथं नियुक्त यायेगु निर्णय यागु धका स्रोतं धागु दु। आयोगय् आः छम्ह सचिव दइगु व्यवस्था दु ।

सरकारं आयोगया गठन आदेश हे संशोधन याना शाक्ययात आयोगय् सचिव सहर हे नियुक्ति यागु खः।

नेपाल विद्युत प्राधिकरणया कार्यकारी निर्देशकय् कुलमान घिसिङ नियुक्त यागु दु।

सोमबाः च्वंगु मन्त्रिपरिषद् बैठकं घिसिङयात प्राधिकरणया कार्यकारी निर्देशकय् नियुक्त यागु खः। २०७७ भदौय् थःगु प्यदँया कार्यकाल पुरा याना विदा जुम्ह घिसिङयात सरकारं हाकनं प्राधिकरणया कार्यकारी निर्देशकय् नियुक्त यागु खः। सोमबाः च्वंगु मन्त्रिपरिषद् बैठकं घिसिङयात कार्यकारी निर्देशक दयकेगु निर्णय यागु दु धका ऊर्जा जलस्रोत तथा सिँचाइ मन्त्रालययात मन्त्रिपरिषदया कार्यालयं थौं मंगलबाः जानकारी बिगु खः।

मन्त्रालयं थौं बुधबाः घिसिङयात नियुक्ति पत्र बिइगु तयारी यागु दु। वंगु साउन १९ गते हे ऊर्जा जलस्रोत तथा सिँचाइ मन्त्री पम्फा भुसालं प्राधिकरणया वर्तमान कार्यकारी निर्देशक शाक्ययात पदं राजीनामा बिया ग्वाहालि यायेत इनाप यागु खः। मन्त्री भुसालं शाक्ययात सरकारं बालागु थासय् जिम्मेवारी बिइगु निर्णय यायेगु धासे शाक्ययात प्राधिकरणपाखे विदा जुइत इनाप यागु खः।

अथेहे घिसिङयात कार्यकारी निर्देशक यायेवं प्राधिकरणया वर्तमान कार्यकारी निर्देशक शाक्ययात जल तथा ऊर्जा आयोगय् विशिष्ठ श्रेणीया पद –सचिव) सरहया पूर्ण कालीन सदस्य पदय् पदस्थापन यायेगु निर्णय यागु खः। उकिया लागि आयोग गठन आदेश तक संशोधन यागु दु।

सरकारं शाक्य आः प्राधिकरणं कया वयाच्वंगु तलब सुविधा घटे मजुइगु कथं जिम्मेवारी बिइगु निर्णय यागु खः । थुकिया लागि अर्थ मन्त्रालय न सहमति बिइ धुकुगु दु।

येँ महानगरं मेगु निगु नगरपालिकानाप अन्तरस्थानीय तह भगिनी सम्वन्ध स्थापनाया लागि समझदारी–पत्रय् ल्हाचिं तःगु दु। येँ महानगरं प्रदेश नम्बर–१ य् धनकुटा पाख्रीबास नगरपालिका व सुदुरपश्चिम प्रदेशया डडेल्धुरा अमरगढी नगरपालिका दथुइ अन्तरस्थानीय तह भगिनी सम्वन्ध स्थापनाया लागि समझदारी–पत्रय् हस्ताक्षर यागु खः।

उगु नगर दथुइ समझदारी पत्रय् येँ महानगरपालिकापाखे मेयर विद्यासुन्दर शाक्यं हस्ताक्षर यागु खःसा अमरगढी नगरपालिकापाखे विश्वेश्वरप्रसाद ओझा व पाख्रीबास नगरपालिकापाखे बृषबहादुर राई न सम्झौताय् हस्ताक्षर यागु खः। हितैषी व मैत्रीपूर्ण सम्वन्धं संस्थागत प्रणालीयात अझ सुदृढ व सवल दयकिइ, थःथःगु हित व सहकार्ययात थकायेत, बालागु अभ्यास व अनुभवयागु आदान प्रदान याना स्थानीय स्वायत्त शासन, स्वशासन व समृद्ध नगर निर्माणया अभियानय् थः व थः समन्वय, साझा प्रयत्न व सहकार्य यायेगु उद्देश्यं निगु नगर दथुइ भगिनी सम्वन्ध स्थापनाया अभियान न्ह्याकागु खः धका मेयर शाक्यं जानकारी बिगु खः।

‘देय् दुने हे स्थानीय तह दथुइ भगिनी सम्बन्ध स्थापनां पर्या–पर्यटन व धार्मिक पर्यटनया लागि थप ग्वाहालि जुइगलि थज्यागु सम्वन्ध स्थापना यानागु खः,’ कार्यक्रम लिपा सम्वोधन यासे मेयर शाक्यले धागु दु, ‘थौं जिमिसं पाख्रीवास व अमरगढी नगरपालिकानाप भगिनी सम्बन्ध स्थापना यानागु दु। थुगु निगु नगर व येँ च्वंपि दथुइ थप प्रगाढ जुइगु अपेक्षा जिमिस कयागु दु।’

वयकलं धयादीगु दु ‘संयोग हे धायेमाः धनकुटाय् मदुम्ह पूर्वप्रधानमन्त्री सुर्यबहादुर थापा व डडेलधुरा वर्तमान प्रधानमन्त्री शेरबहादुर देउवाया गृह जिल्ला खः,’ थुगु निगु नगर नाप थौं भगिनी सम्वन्ध स्थापना याये दया तसकं लयताःगु दु धका धयादीगु खः।’ उगु समझदारी पत्रय् येँ महानगरपालिकां नगर–नगर साझेदारी कार्यक्रम अन्तरगत पाख्रीबास नगरपालिकाय् सुन्तले डाँडाय् धार्मिक व पर्यटकीय क्षेत्र विकासया लागि अन पार्क निर्माण यायेत १ करोड ५० लाख सहयोग सम्झौता यागु खः।

अथेहे अमरगढी नगरपालिकां वडा नम्बर–२ व ५ य् अमरगढी पार्क निर्माणया लागि १ करोड ५० लाख सहयोग यागु खः। ४ सय ५० रोपनी क्षेत्रफल दुगु उगु पार्क निर्माणया लागि सहयोग यानागु धका महानगरपालिकां जानकारी बिगु खः।