नेपाली कांग्रेसया येँ महानगरपालिका समितिया नेतृत्व चयनया लागि जुगु निर्वाचनया मतगणना शुरु जूगु दु।

शनिबाः उलेज्या जुगु येँ महानगरया अधिवेशन आइतबाः मतदान जुगु खः। सुथय् ९ बजेनिसे २ बजे तक मतदानया लागि ई क्वछिउगु खः।

निर्वाचनय् १३३९ मत कुहावंगु दु धका निर्वाचन समितिं धाउगु दु। येँ महानगरपालिका कांग्रेस सभापतिया लागि प्रगतिमान रञ्जित व नीलकाजी शाक्यं उम्मेदवारी बिउगु खः।

रञ्जित व शाक्य निगु हे प्यानल दयका चुनावी प्रतिस्पर्धाय् कुहावंगु खः। रञ्जित संस्थापन समूहया उम्मेदवार खःसा शाक्य वरिष्ठ नेता रामचन्द्र पौडेल समूहया समर्थन खः।

सरकारं ११ म्ह प्रमुख जिल्ला अधिकारी (सीडीओ)पि सरुवा याउगु दु। प्रधानमन्त्री शेरबहादुर देउवां जिल्ला डडेल्धुरा नाप सरकारं ११ जिल्लाया सीडीओपि सरुवा याउगु दु धका गृह मन्त्रालयं धाउगु दु।

गृहया कथं आःतक मन्त्रालयय् कार्यरत निम्ह सहसचिव व न्याम्ह उपसचिव याना १६ म्ह कर्मचारीपि ने सरुवा याउगु दु। इलाका प्रशासन कार्यालय टीकापुरय् कार्यरत मोहनराज जोशीयात डडेल्धुराय् छ्वंगु दु सा डडेल्धुराय् कार्यरत हरि प्रसाद घिमिरेयात गृह मन्त्रालय सिंहदरवारय् हःगु दु।

अथेहे मन्त्रालयं गृह मन्त्रालय कार्यरत सह–सचिव कमलराज ढकालयात जिल्ला प्रशासन कार्यालय भोजपुरय् सरुवा याउगु दु सा जयनारायण आचार्ययात जिल्ला प्रशासन कार्यालय कास्कीया सिडीओ दयकूगु दु। अथेहे कास्कीया सीडीओ थानेश्वर गौतमयात गृह मन्त्रालय हःगु दु सा त्रिभुन अन्तराष्ट्रिय विमानस्थलय् कार्यररत प्रमुख अध्यागमन अधिकृत सुशील वैद्ययात लमजुङया सीडीओ दयकूगु दु।

अथेहे डोटीइ शंकरबहादुर विष्ट, मुगुइ रोम बहादुर महत, मनाङय् रविन्द्र प्रसाद आचार्य, म्याग्दीइ चिरञ्जीवी राना, रसुवाय् नवराज जैसी, तेह्रथुमय् अनुज कुमार घिमिरेयात प्रमुख जिल्ला अधिकारी दयकूगु दु। लमजुङया सीडीओ होमप्रसाद लुईँटेल व रसुवाया सीडीओ इश्वरीप्रसाद ढकालयात गृह मन्त्रालयय् हःगु दु।

अथेहे इलाका प्रशासन कार्यालय चन्द्रनिगाहपुरया उपसचिव डोरेन्द्र निरौलायात जगन्नाथदेवल काठमाडौंया जेलर दयकूगु दु धका गृह मन्त्रालय धाउगु दु।

नेकपा एमालें केन्द्रनिसे टोल कमिटी तकया ल्याः निर्धारण याउगु दु। विधान महाधिवेशनपाखे एमाले न केन्द्रनिसे टोल कमिटी निर्माणय् सदस्य ल्याःतक निर्धारण याउगु दु।

२२५ म्ह सदस्यीय केन्द्रीय कमिटीया प्रस्ताव न्ह्यने यकां एमाले न प्रदेश कमिटी, उपत्यका विशेष प्रदेश कमिटी, जिल्ला, पालिका, वडा व टोल कमिटीया सदस्य ल्याः तक निर्धारण याउगु दु। प्रदेश कमिटीइ ५० म्हेसिगु ल्याः आधार माने याना व हरेक प्रतिनिधिसभा निर्वाचन क्षेत्रपाखे न्याम्ह न्याम्ह थपे याइ। उपत्यका विशेष प्रदेश कमिटीइ न ५० म्ह आधार माने याना प्रत्येक शाखापाखे न्याम्ह थपे याइ। जिल्ला कमिटीइ न ५० म्ह आधार माने याना प्रत्येक प्रदेश निर्वाचन क्षेत्रपाखे १५ म्ह थपे याइ।

पालिका तहया कमिटीइ न ५० म्हेसिगु आधार मानेयाना प्रत्येक वडापाखे न्याम्ह थपे याइ। वडा कमिटीया ल्या? न निर्धारण याउगु दु। महानगरं वडाय् १०१, उपमहानगरया वडाय् ८५, नगरपालिका÷गाउँपालिकाय्७५ सदस्यीय कमिटी जुइ। टोल कमिटीइ अप्वो ३१ म्ह सदस्यीय जुइ। दक्को कमिटीं कमिटीया छगु चौथाइ अप्वो मयासे सचिवालय दयकिइगु जुगु दु।

उपमहासचिव विष्णुप्रसाद पौडेलं हलय् प्रस्तुत याउगु प्रस्ताव पारित जुगु दु।

वाःया न्हापागु दिं थौं आइतबाः शेयर कारोबार मापक नेप्से परिसूचक करिब ५६ अंकं घटे जुगु दु।

नेप्से परिसूचक ५५ दशमलव ९३ अंकं घटे जुया २ हजार ५ सय ७७ दशमलव ४९ अंकय् कुहावंगु दु।

‘क’ वगया कम्पनी याउगु शेयर कारोबार मापन याइगु सेन्सेटिभ इन्डेक्स न ११ दशमलव ०७ अंकय् कुहावंगु दु। शेयर कारोबार रकम धासा थौं आइतबाः न बालागु खनेमदु। ५२ हजार ३९१ कारोबार जुगुलि ८९ लाख ४८ हजार ९३७ कित्ता शेयर किनबेच जुगु दु।

उकिइ मध्ये कारोबार रकम ४ अर्ब ११ करोड ३८ लाख १४ हजार हजार २४६ रुपैयाँ थ्यंगु दु। बजाः घटे जूसा छु भचा कम्पनी याउगु शेयर भाः थहावंगु दु।

मेमेगु शेयर बजाः कुहावंसा मैलुङ खोला, जलविद्युत् कम्पनी स्वाभिमान लघुवित्त, सबैको लघुवित्त वित्तीय संस्था, प्रिमियर इन्स्यारेन्स कम्पनी व माउन्टेन इनर्जी नेपालया थहावंगु दु।

नेकपा एमाले न छगु कार्यकारी पदय् निकः तक उम्मेदवार जुइ दइ व ७० दँया हद निगु व्यवस्था कायम याउगु दु।

तर कार्यकालया दथुइ ७० दँ पूरा जूसा पूरा कार्यकाल ज्या याये दइगु कथं विधानय् व्यख्या याउगु दु। एमाले अध्यक्ष ओली आः ७० दँ दये धुकुगु दु व वइगु फागुनय् ओली ७० वर्ष पूरा जुइ।

तर वइगु मंसिरय् महाधिवेशन यायेगु व हाकन अध्यक्ष जुइगु योजना दु। एमालेया विधानय् ७० दँया हद न्हुगु परिभाषां आः ओली अध्यक्षया उम्मेदवार जुया व न्यादँया कार्यकाल पूरा याये दइ।