छत्रपाटी निःशुल्क चिकित्सालय अस्पतालया न्हूगु भवनया शिलान्यास जूगु दु । थौं येँ महानगर प्रमुख विद्यासुन्दर शाक्यं अस्पतालया न्हूगु भवन शिलान्यास यानादिल । भवन शिलान्यासया झ्वलय् महानगर प्रमुख शाक्यलिसें उपप्रमुख हरिप्रभा खड्गी श्रेष्ठ, १७ वडाया वडाध्यक्ष नविन मानन्धर व अस्पतालया नायः डा. मनोजमान श्रेष्ठं मंकाः कथं भूमि पुजन यानादीगु खः । उगु इलय् नवासें प्रमुख शाक्यं इलय् हे स्तरीय ज्या यायेत इनाप यासें धेबाया चिन्ता मकायेत धयादिल । क्षेत्रपाटीइ १० आना १ दाम जग्गा करीब ३५ करोड तकाया लागतय् अस्पतालया न्हूगु भवन दयेकेत्यंगु खः । ज्याझ्वलय् महानगर उपप्रमुख खड्गी श्रेष्ठं दक्वं अधिकारमध्ये नं नागरिकयात स्वास्थ्य सम्बन्धी अधिकारया प्रत्याभूति याकेत थःपिन्सं कुतः यानाच्वनागु धयादिल । वडा १७ या वडाध्यक्ष मानन्धरं ०७२ सालया भुखाय्, ०७५ य् डेंगु व आः विश्व महामारी जुयाच्वंगु कोभिड संक्रमणया इलय् चिकित्सालयं स्वास्थ्योपचारय् ब्यूगु योगदानयात च्वछानादिल ।

अस्पतालया नायः डा. मनोजमान श्रेष्ठं मेगु वालंनिसें न्हि सच्छि सिलिण्डर अक्सिजन उत्पादन क्षमताया प्लान्ट स्थापना यायेत्यनागु जानकारी बियादिल । अस्पताल निर्माणया न्हापांगु चरणय् १२ करोड तकाया लागतय् भूमिगत १ तलालिसें ७ तलाया भवनया स्ट्रक्चर तयार याइ । उकिया नितिं येँ महानगरं न्हापा हे २ करोड ५० लाख तका उपलब्ध याकेधुंकूगु दु ।

आः थप २ करोड ५० लाख तकालिसें महानगरं ५ करोड तका बीगु धाःगु दु । थ्व बाहेक अस्पतालया आन्तरिक आय व दातापिनिगुपाखें चूलाइगु ग्वहालि धेबा छ्यलेगु नायः श्रेष्ठं धयादिल । अस्पतालय् आः २४ घौ हे इमर्जेन्सी, शल्यक्रिया, जनरल वार्ड, आइसीयू, भेन्टिलेटर, प्याथोलोजी ल्याबलिसें दक्वं कथंया सामान्य व विशेषज्ञ स्वास्थ्य सेवा न्ह्यानाच्वंगु दु । कोभिड संक्रमणया निगूगु लहरया इलय् महानगरं थुगु अस्पतालयात महानगरया कोभिड विशेष अस्पतालया रुपं न्ह्याकूगु खः । २०१७ सालय् राजनीतिक अस्थिरताया इलय् जूगु झडपय् घाःपाः जूपिन्त वासः यायेगुलिइ थुगु चिकित्सालयया तःधंगु भूमिका दु ।

येँया वलय् पिहावंगु हल्चोकया आकाश भैरबया स्वम्ह देवगणया ख्वापातय् लँपू छायेगु (ख्वापाः र्ममत व रंग तयेगु) ज्या जुयाच्वंगु दु।

ञंलाथ्व पारु कुन्हु हल्चोकं निसे छगु लियागु सन्दुकय् तया गुथियारपिन्स क्वबिया हया येँया मांसगल्ली चित्रकारया छेँ हयेगु याइ।

येँया मांसगल्ली च्वनादीम्ह तेजबहादुर चित्रकारं वंगु न्यागु दशकनिसे हल्चोक आकाश भैरव देवगणया लँपू छायेगु ज्या यान वयाच्वनादीगु खः।

थौ कन्ह्यः वयकः ८५ दँ दय् धुकुगु दु। लँपू छाय् सिधयका ञंलाथ्व एकादशी कुन्हु हल्चोकय् लित यकां उगु हे दिं द्यः छेँ न्ह्यने पूजा यायेगु याइगु परम्परा दु।

हल्चोक आकाश भैरव, चण्दी व कुमारी येँया ज्वंछि पिहावयेगु याइ।

व्यवसायी रुक्म शमशेर राणा मन्त। डाबर नेपालया प्रबन्धक निर्देशक तक जुयादीम्ह राणा येँया बत्तिसपुतली थःगु हे निवासय् थौं शनिबाः सुथय् मदुगु खः।

वयकः २००९ निसे २०११ तक भारतया लागि नेपाली राजदूत जुयादीम्ह खः।

वयकः राष्ट्रिय खेलकुद परिषद (राखेप)या सदस्यसचिव न जुयादी धुकुम्ह खः।

येँया वलय् हनुमानध्वाकाय् थनिइगु यःसि येँया भोताहिती थ्यंगु दु।

न्हापा नालाया यःसिख्यः निसे गुथियारपिन्स येँ थ्यक हया च्वंगु खः। थुगु दँय् न्हापागु पटक यःसिख्यलनिसे येँया भोताहिती तक क्रेन हया म्हिगः बहनि ९ बजे येँ थ्यकहःगु खः।

भोताहिती थ्यने धुका गुरुजु पल्टनं तोप तःगु खः। न्हाप न्हाप गुथियारपिन्स यःसिख्यलय् निसे हयेगु यानाच्वंगु खः। इतिहासय् न्हापागु पटक क्रेन सालां यःसि येँया भोताहितीइ थ्यकं हःगु खः।

उगु यःसि ञंलाथ्व द्धादशी कुन्हु येँया हनुमानध्वाकाय् थने वं येँया जात्रा औपचारिक कथं सुरु जुइगु याइ

किपा दिब्य महर्जन

ऊर्जा, जलस्रोत तथा सिँचाइमन्त्री पम्फा भुसालनाप मिलेनियम च्यालेञ्ज कर्पोरेशन (एमसिसी) उपाध्यक्ष फतेमा सुमारं शिष्टाचार भेट याउगु दु।

मन्त्रालय थौं उपाध्यक्ष फतेमा नाप जुगु भेटय् दिगो आर्थिक विकास व एमसिसी परियोजना कार्यान्वयनया विषय विचार विमर्श जुगु खः। उगु भेटय् निम्ह दथुइ सतक सञ्जाल, विद्युत् प्रसारण लाइन निर्माण लगायत नेपालया भौतिक पूर्वाधार विकासया आयोजना कार्यान्वयनया निति अनुदान कथं अमेरिकापाखे वइगु ५० अर्ब सहयोग कार्यान्वयनया विषय छलफल जूगु खः।

उपाध्यक्ष सुमारं नेपालय् गरिबी घटे यायेत व दिगो सामाजिक–आर्थिक विकासया लागि नेपालया इनाप कथं एमसिसी सम्झौता जुगु उल्लेख यासे थुकिया कार्यान्वयनय् सहयोग यायेत इनाप याउगु दु। वयकलं एमसिसीया विषय नेपालय् जुयाच्वंगु चर्चाया विविध विषय खँ जुगु खः। उकिया लिसः बिइगु झ्वलय् मन्त्री भुसालं नेपाल–अमेरिका दथुइ जुयावया च्वंगु सम्बन्ध बल्लाकेगु उल्लेख यासे  एमसिसीया सन्दर्भय् राजनीतिक सहमती व जनताया चाहना कथं हे निष्कर्षय् थ्यकेयेगु जुइ धका धयादीगु खः।

वयकलं नेपालं द्विपक्षीय नाप बहुपक्षीय दातृ निकायपाखे सहयोग कया हे विकास प्रक्रियायात न्ह्यने यकेंगु  धका धयादीसे वइगु दिनय् न अमेरिकापाखे थप ग्वाहालि जुइगु भलसा कयादीगु खः।

उगु भेटय् नेपाःपाखे ऊर्जा मन्त्रालय व परराष्ट्र मन्त्रालयया उच्चअधिकारी नापं अमेरिकापाखे नेपाःया लागि अमेरिकी राजदूत ¥याण्डी बेरी नाप सहभागीता दुगु खः। अमेरिकी सरकारपाखे एमसिसी व नेपाःपाखे अर्थ मन्त्रालय दथुइ सम्झौता जुगु खः।