वंगु २४ घण्टाय् कोरोना संक्रमितपि मध्ये ४३३ म्ह स्वनिगलय् पुष्टि जुगु दु।

उकि  मध्ये येँ जक २८९ म्हेसित पुष्टि जुगु दु। अथेहे यलय् ९० म्ह व ख्वपय् ५४ म्हेसित संक्रमण पुष्टि जुगु दु।

अथेहे झापाय् १४१, मोरङय् १३९, सुनसरी व बागलुङय् १२३÷१२३, चितवनय् १०२, कास्कीइ ६९, नुवाकोट व गुल्मीइ ४८÷४८ व मकवानपुरय् ४५ म्हेसित कोरोना पुष्टि जुगु दु।

अथेतु रुपन्देहीइ ३७, नवलपरासी पूर्वय ३३, पाल्पाय् २२ व पर्वतय् २१ म्हेसित कोरोना संक्रमण पुष्टि जुगु दु ।

वंगु २४ घण्टाया दुने २ हजार ३७० म्हेसित कोरोना भाइरस संक्रमण पुष्टि जुगु दु।

७ हजार ६८९ पीसीआर परीक्षणय् १ हजार ६९० म्ह व ३ हजार ८९५ एन्टिजेन परीक्षण यागुलि ६८० म्ह याना २ हजार ३७० म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धागु दु।

अथेहे वंगु २४ घण्टाय् कोरोना संक्रमणं १८ म्ह सीगु दु । अथेहे थप १ हजार १३३ म्ह कोरोनामुक्त जुगु दु। नेपालय् कोरोना संक्रमितपि ६ लाख ५७ हजार १३९ म्ह थ्यंगु दु।

उकि मध्ये आःतक ९ हजार ४०० म्ह सी धुकुगु दु सा ६ लाख २१ हजार २७ म्ह संक्रमणमुक्त जुइ धुकुगु दु।

सेयर बजारय् ४५.०६ अंक गिरावट वंगु दु। म्हिगः आइतबाः ७३ अंक थहावंगुलि थौं बजाः तधःगु गिरावट वंगुलि धासा कारोबार रकमय् उल्लेख्यनिय सुधार वंगु दु।

सोमबाः सेयर कारोबार मापक नेप्से परिसूचक घटे जुया २ हजार ८५४ दशमलव ९८ अंकय् थ्यंगु दु। छगु दशमलब ५५ प्रतिशत घटे जुगु बजाःया कारोबार रकम धासा ९ अर्ब ९८ करोड थ्यंगु दु।

‘क’ वर्गया कारोबार याइगु सेन्सेटिभ इन्डेक्स सोमबाः ८.५८ अंक क्वहावगु दु।सोमबाः निगुगु बजारया २२९ कम्पनीया दुई करोड ६० लाख २१ हजार १०४ कित्ता सेयर ९२ हजार १९२ पटक कारोबार जुुगु खः। थौं समृद्धि फाइनान्स कम्पनीया सेयर भाः ५.२४ प्रतिशत थहावंना लगानीकर्तापिन्स निगुगु बजारय् दकलय् अप्वो कमे यागु दु।

अथेहे युनियन व खानीखोला हाड्रोपावर व आरेन्टल होटलया लगानीकर्तापिन्स सम्पत्ति सोमबाः न्यागु प्रतिशत स्वया अप्वो क्वहावंगु दु। सोमबाः निर्धान उत्थान लघुवित्त, एनआईसी एसिया बैंक, राष्ट्रिय बिमा कम्पनीया प्रमोटर सेयर व नबिल बैंकया सेयर यक्को कारोबार जुगु खः।

निर्धन उत्थान लघुवित्तया ४९ करोड, एनआईसी एसिया बैंकया ३४ करोड व राष्ट्रिय बिमा कम्पनीया प्रमोटर सेयर २९ करोड स्वया अप्वो सेयर निगुगु बजारय् कारोबार जुगु खः।

नेकपा एमाले संसदीय दलया उपनेता सुवास नेम्वाङं प्रतिनिधिसभा पुनःस्थापना यायेगु सर्वोच्च अदालतया फैसला गलत जूसां नं स्वीकार यायेगु धाःगु दु ।

नेकपा एमाले संविधान, लोकतान्त्रिक मूल्य व मान्यता माने याइगु शक्ति जूगुलिं अदालतया फैसला माने यायेगु धका नेम्वाङं धाःगु दु ।

नेम्वाङं धाःगु दु, ‘थ्व फैसलाप्रति सहमत जुइफइगु थाय् खनेमदु । तर थुलि जूसां नं कानूनया शासन व लोकतन्त्रय् विश्वास याइगु शक्ति जूगु हुनिं सर्वोच्च अदालतया थुगु गलत निर्णयया जिमिसं माने याये ।’ वं संविधान, लोकतान्त्रिक मूल्य व मान्यता कथं निरन्तर संघर्षय् वनेगु नं धाःगु दु ।

अदालतया फैसलां गम्भीर न्ह्यसः ब्वलनीगु स्थिति वःगु नेम्वाङं धाःगु दु । संविधान, संवैधानिक अभ्यास व संसदीय न्ह्यसःयात तकं न्ह्यसः ब्वलनीगु कथं फैसला वःगु नेम्वाङं धाःगु दु ।

नेपाली कांग्रेसया सभापति शेरबहादुर देउवां सर्वोच्च अदालतया फैसला ऐतिहासिक जूगु धका धाःगु दु ।

अदालतं थःत प्रधामन्त्री दयेकूगु सिबें नं संविधान अःखः छ्यूगु पलाःयात भिंकूगु धका देउवां धाःगु खः। संसद विघटनयागु बदर यासे सर्वोच्च अदालतं देउवायात कन्हय् मंगलवाः सनिलया ५ बजे तक प्रधानमन्त्री नियुक्त यायेत आदेश बिगु खः।

सभापति देउवां संचारकःमिपिन्त थःगु प्रतिक्रिया बिगु झ्वलय् धाःगु दु, ‘निष्पक्ष व धम्कीलिसे मग्याइम्ह अदालतं लोकतन्त्र, न्याय व विधिया शासनयात बचेयाःगु दु ।’