वाग्मती प्रदेश सभाया काँग्रेस सांसद नरोत्तम वैद्यं प्रधानमन्त्री विरुद्ध म्हिगः शुक्रवाः बिगु विवादास्पद अभिव्यक्ति लित कागु दु।

थौं शनिवाः प्रदेश सभाया बैठक सुरु जुइवं सभामुखयात ई कया थःम्हेसिया भावावेशय् वया थज्यागु अभिव्यक्ति बिइलात धासे आत्मालोचना यासे उगु अभिव्यक्ति लितकयागु दु धका धागु दु।

शुक्रवाःया बैठकय् सांसद वैद्यं प्रधानमन्त्रीया मनोमानी रोके यायेत नाथुराम गोड्सेया आवश्यकता दुगु व आवश्यकता जूसा थः हे आफू गोड्से जुइत तयार दु धका अभिव्यक्ति बिगु खः। सांसद वैद्यया थुगु अभिव्यक्ति प्यखेरं विरोध जुगुलि काँग्रेसले तक अभिव्यक्ति लित कायेत निर्देशन बिगु खः।

शनिवाः बैठकय् वैद्यं प्रधानमन्त्री केपी शर्मा ओली नाप थःगु छु न रिसइवी मदुगु धासे थः हत्या हिंशाय् विश्वास मयाइम्ह व गान्धीवादी नेता जुगुलि आवेशय् थज्यागु अभिव्यक्ति बियागु धासे उगु अभिव्यक्ति लित कयागु धका धागु दु। थम्हेसिया अभिव्यक्ति बिइ धुका संसदीय मर्यादा पिने वना न्ववानागु महसुस जुगु धका धागु दु।

वयकलं आत्मालोचनासहित अभिव्यक्ति लित कयागु दु धासे उगु अभिव्यक्ति संसदया रेकर्डपाखे हटे यायेत इनाप यागुलि सभामुखं उगु अभिव्यक्ति रेकर्डपाखे हटे यायेत निर्देशन बियागु दु धका धागु दु।

बागमती प्रदेश सभाया बैठकय् नेपाली कांग्रेसया प्रदेश सभा सदस्य नरोत्तम बैद्यं संसदीय मर्यादा विपरीत अभिव्यक्ति बिगु धासे सत्ता पक्षया सांसदपिन्स हदै तक कारवाही यायेत माग यागु दु।

उगु बैठकय् सांसद वैद्यं सांसद देशया कार्यकारी प्रमुखयात संसदीय मर्यादा तक बिचाः मयासे अभिव्यक्ति बिगु खेदजनक जुगुलि कारवाहीया माग यागु दु। वागमती प्रदेश सासद डा.अजयक्रान्ती शाक्यं देशया प्रधानमन्त्री यागु हत्या यायेत थः तयार दु धका बिगु अभिव्यक्ति क्षमा योग्य मजुगु धका धयादीगु दु।

डा. शाक्यं धयादीगु दु, ‘महात्मा गान्धीया हत्यारा नाथुराम विनायक गोड्सेया उदाहरण बिया बैद्य देशया प्रधानमन्त्रीया हत्या यायेत तयार दु धका बिगु अभिव्यक्ति क्षमा याये योग्य मजू। बैद्ययात हदै तक कारबाही यायेत माग याये।’ प्रदेशसभाय् प्रस्तुत जुगु नीति तथा कार्यक्रम बारे बहस यायेगु झ्वलय् वैद्यं देशया कार्यकारी प्रमुख हे हत्या यायेगु अभिव्यक्ति बिगु अराजकताया पराकाष्ठा जुगु धका सांसद पिन्स धाःगु दु।

नेपालय् निषेधाज्ञा न्ह्यानाच्वंगु इलय् म्ह्वः आय दुगु परिवारया लागिं चाइनीज संस्था चाइना फाउन्डेसन फोर पभर्टि एलिभिएसनं नसा ज्वलं ग्वाहालि याःगु दु । फाउन्डेसनं बिहिबाः गोकर्णेश्वर नगरपालिकाया ४२७ विद्यार्थीतयत ग्वाहालि ब्यूगु खः ।

फाउन्डेसनं सफा सुनौलो नेपाललिसेया सहकार्यय् आपतकालीन समुदाय खाद्यान्न वितरण ज्याझ्वः अन्तर्गत विद्यार्थीतयत ग्वाहालि याःगु खः । निषेधाज्ञां प्रभावित वागमती प्रदेशया थीथी प्यंगू विद्यालयया ४२७ विद्यार्थीतयत न्हियान्हिथंया उपभोग्य नसा ज्वलं ब्यूगु खः ।

गोकर्णेश्वर नगरपालिका वडा नम्बर ६ स्थित श्री खगेन्द्र माध्यामिक विद्यालय नारायणटारय् जूगु ज्याझ्वलय् विद्यार्थीतयत जाकि, केँ, चिकं लिसेंया नसा ज्वलं ब्यूगु खः ।

ज्याझ्वलय् नवासें गोकर्णेश्वर नगरपालिका प्रमुख सन्तोष चालिसें चाइनां ब्यूगु ग्वाहालिं वर्तमान परिस्थितीइ महामारी नियन्त्रणया लागिं अझ सशक्त ढङ्गं न्ह्याःवनेत उत्साह ब्यूगु धयादिल ।

अथे हे, गोकर्णेश्वर नगरपालिका वडा नम्बर ६ या वडाध्यक्ष रमेश अर्यालं सकसितं संयमित जुयाः धैर्यता तयाः संक्रमण नियन्त्रणय् ग्वाहालि यायेत इनाप यानादिल ।

अथे हे, फाउन्डेसनया नेपाल निर्देशक झाउ छि याङं नेपालया थीथी क्षेत्रय् निम्न आय दुपिं १ लाख अप्वः परिवारयात ग्वाहालि यायेगु आज्जु दुगु जानकारी याकादिल । निम्न आय दुपिं व दैनिक ज्याला मजदुरी यानाः जीविका न्ह्याकेमाःगु परिवारयात ग्वाहालि यायेगु आज्जुलिसें ज्याझ्वः न्ह्याकाच्वनागु झाउं कनादिल ।

फाउन्डेसनं नेपालय् संक्रमणया न्हापांगु लहरय् नं वागमती प्रदेशलिसें प्रदेश २ या थीथी थासय् विद्यार्थीतयत ग्वाहालि याःगु खः । अथे हे, थीथी अस्पताल अले आइसोलेसनय् नं थीथी स्वास्थ्य सामग्री ग्वाहालि यानावःगु दु ।

नेपाली कांग्रेसया सभापति शेरबहादुर देउवां पदाधिकारी बैठक सःतूगु दु।

पार्टीया १४ क्वःगु महाधिवेशन कार्यतालिका प्रभावित जुगुलि सभापति देउवां कन्ह्यः शनिवाः पदाधिकारीपिगिु बैठक सःतूगु दु।

पूर्व निर्धारित कार्यतालिया कथं असारय् वडा तहया अधिवेशन सुरु याये माःगु खः। तर अःतक क्रियाशील सदस्यतापिनिगु टुंगे जुइ फुगु मदुनि। आःतक ८ लाख क्रियाशील सदस्यया विवरण डेटा सिस्टमय् इन्ट्री जुइ धुकुगु दु, तर उकिया प्रकाशित याना उजुरी तक आह्वान याये ल्यःदनिइ।

 वंगु २४ घण्टाया दुने देयन्यक ३७५० म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ९५९८ म्हेसिगु पीसीआर परीक्षणय् २७०९ म्ह व ५५८४ एन्टिजेन परीक्षणय् १०४ १ म्ह याना ३७५० म्ह संक्रमण पुष्टि जुगु दु। संक्रमणं वंगु २४ घण्टाय् ६७ म्ह सीगु दु ।

अथेहे ५२२५ म्ह संक्रमणमुक्त जुग दु।