वंगु २४ घण्टाया दुने देयन्यक ९११ म्हेसित कोरोना भाइरस संक्रमण पुष्टि जूगु दु।

७ हजार ८७८ नमुना पीसीआर परीक्षणय् ८३८ म्ह व ३ हजार १४० नमुना एन्टिजेन परीक्षण यागुलि ७३ म्हेसित कोरोना संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

वंगु २४ घण्टाय् १ हजार ४२३ म्ह संक्रमणमुक्त जुगु दु सा १३ म्ह सीगु दु। 

चीनलिसेया सिमा विवादबारे अध्ययन यायेत सरकारं दयेकूगु अध्ययन टोली हुम्लाया सिमकोट थ्यंकःवःगु दु ।

गृह मन्त्रालयया सहसचिव जयनारायण आचार्य नेतृत्वया ७ दुजःया टोली म्हिगः हुम्ला थ्यंगु खः । टोलीं चीनलिसे स्वाःगु हुम्लाया १५ सीमास्तभमध्ये १३ सीमास्तम्भया अध्ययन याइगु धाःगु दु ।

मौसमं साथ ब्यूसा १५गुलिं स्तम्भया अध्ययन याइगु तर मौसमं साथ मब्यूसा १३गू जक स्तम्भया अध्ययन यायेगु प्रमुख जिल्ला अधिकारी गणेश आर्चायं जानकारी बियादिल ।

थगुने हुम्लाया नाम्खा गाउँपालिका–६ लिमिया लोलुङजोङय् चीनं दयेकूगु भवन नेपाली भूमिइ लाःगु बुखँ सार्वजनिक जुइधुंकाः न्हापांगु खुसी सरकारी टोली स्थलगत अध्ययनया लागिं हुम्ला थ्यंगु खः तर, तत्कालिन ओली सरकारं चीनं दयेकूगु संरचना वयागु हे भूमिइ लाःगु व नेपालया सिमा क्वत्यःगु मदुगु दावी याःगु खः ।

ओली सरकारया निर्णयलय् असहमती क्यनाः देउवा सरकारं थ्व हे भदौ १७ गते हुम्लाया नाम्खा गाउँपालिकाया लिमी व जःखःया क्षेत्रय् चीनं सिमाना क्वत्यःगु विषयस स्थलगत अध्ययन यायेत समिति दयेकूगु खः ।

क्षत्रपाटी उपभोक्ता बिकास समितीया ग्वसालय् १७ वडा दुने सरसफाइ ज्याझ्वः जूगु दु।

सरसफाइ ज्याझ्वः लिपा छगु ज्याझ्वःयासे मूपाहाँ येँ महानगरपालिका १७ वडाध्यक्ष नबिन मानन्धरं न्हुगु दुजः जूपिन्त दुजःपौ लल्हादीगु खः।

उगु ज्याझ्वलय् मूपाहाँ १७ वडाध्यक्ष मानन्धर थःगु त्वालय् थथे सूचुपिचू यायेगु झीगु हे दायित्व खः धका धयादीगु खः।

ज्याझ्वः समितिया अध्यक्ष्य राजु मालीं सभाध्यक्षता यानादीगु खः। 

सत्तापक्षया रणनीति व मन्त्रिपरिषदयात पूर्णता बिइगु विषय छलफल यायेत सत्ता गठबन्धनया शीर्ष नेतापिनिगु बैठक च्वनिइगु दु।

बैठक थौं सुथय् १० बजे प्रधानमन्त्रीया सरकारी निवास बालुवाटारय् च्वनेत्यंगु दु।

वंगु शुक्रबाः च्वंगु बैठकय् प्रधानमन्त्री देउवां थःथःगु पार्टीइ छलफल याना याकन मन्त्री जुइपिनिगु नां बिइत शीर्ष नेतापिन्त इनाप याउगु खः।

शेरबहादुर देउवा नेतृत्वया वर्तमान सरकार गठन जूगु निलाः दयत्यंगु दु अय्न मन्त्रिपरिषदयात पूर्णता बिइफुगु मदुनि।

येँ महानगरपालिकां थौं इन्द्र जात्राया व्यवस्थापनय् खटे जुइपि स्वसःम्हेसित कोविड विरुद्धया खोप भेरोसेलया न्हापागु मात्रा बिउगु दु। येँयो मजिपाः लाखे ननिइ उगु खोप बिउगु खः।

इन्द्रजात्रा नेपाःया राष्ट्रिय पर्व खः। उगु खोप ज्याझ्वलय् न्ववानादीसे महानगरया मेयर विद्यासुन्दर शाक्यं, महामारीपाखे थः बचे जूया परम्परा न बचे यायेगु प्रयासया लागि खोप कार्यक्रम सञ्चालन यानागु खः धका धयादीगु खः। ‘विश्वव्यापी महामारीया रुपय् फैलै जूगु कोविडया जोखिमयात कम खकें मज्यु।

मेगु पाखे झीसं न्हापानिसे हना वयाच्वनागु नखः नियमित कथं हनेमाः। जात्रायात निरन्तरता बिइगु झ्वलय् महामारीया जोखिम कम यायेत येँ महानगरपालिकां वहन याये माःगु दक्को दायित्व पूरा यायेमाः।’ मेयर शाक्य धयादीगु दु। खोप नाप जात्रा सञ्चालनया लागि माग जुगु मास्क, पञ्जा, स्यानिटाइजरनाप स्वास्थ्य सुरक्षा सामाग्री उपलब्ध यायेगु योजना दु।

महानगरया जनस्वास्थ्य विभागया प्रमुख हरिबहादुर कुँवरं, सचेतनाया लागि स्वास्थ्य शिविर सञ्चालन यायेगु जानकारी बियादीगु खः।