एमसीसी उपाध्यक्ष फातिमा सुमार व सहायक उपाध्यक्ष जोनाथन ब्रुक्स येँ थ्यंगु दु।

उपाध्यक्ष सुमार नेतृत्वया टोली नेपाः प्यन्हुया भ्रमण यायेगु झ्वलय् येँ थ्यंगु दु। कतार एयरवेजपाखे थौं बिहीबाः सुथय् ९ः२५ बजे येँ थ्यंगु दु धका नेपाल नागरिक उड्डयन प्राधिकरणया प्रवक्ता जानकारी बिउगु दु।

उपाध्यक्ष सुमारया टोलीं सम्झौताया विषय प्रधानमन्त्री शेरबहादुर देउवा व राजनीतिक दलया शीर्ष नेतापि नाप वार्ता यायेगु ज्याझ्वः दु।

नेपाःया राजनीति व साहित्यय् महत्वपूर्ण योगदान दुम्ह न्हापाम्ह जननिर्वाचित प्रधानमन्त्री विश्वेश्वरप्रसाद कोइरालाया थौं १०८ क्वःगु बुदिं खः।

नेपालय् प्रजातन्त्र स्थापना नाप पुनःस्थापनाया लागि कठोर सङ्घर्ष यानादीम्ह कोइरालाया बुदिं १९७१ साल भदौ २४ गते जूगु खः। राणा शासनया विरोधय् वयकःया अबु कृष्णप्रसाद कोइरालां गरिब किसानं पूनातःगु लँ राणा प्रधानमन्त्री चन्द्रशम्शेरयात छ्वया कोइराला परिवार भारत निर्वासनय् वंगु खः।

निर्वासनय् हे विपीं भारतया स्वतन्त्रता सङ्ग्रामय् ब्बति काउगु खः। भारत निर्वासनया हे झ्वलय जहानियाँ राणा शासनया अन्त यायेत २००३ सालय् विपीया नेतृत्वय् नेपाली राष्ट्रिय कांग्रेस स्थापना जूगु खः। प्रजातन्त्र स्थापना हे मू आज्जु कया सुवर्ण शम्शेरया नेतृत्वय् २००६ सालय् स्थापना जूगु नेपाल प्रजातन्त्र कांग्रेसया दथुइ एकता लिपा २००७ सालय् क्रान्ति सफल जूगु खः।

२०१५ सालया आमनिर्वाचनय् कांग्रेसं दुईतिहाई वहुमत कया न्हापाम्ह जननिर्वाचित प्रधानमन्त्री जुयादीगु खः। कोइरालां नेपालय् राष्ट्रियता, प्रजातन्त्र व समाजवाद स्थापनाया लागि राजनीतिक नेतृत्व प्रदान यानादीगु खः।

अमेरिकी सहयोग नियोग मिलेनियम च्यालेन्ज कर्पोरेसन (एमसीसी) या उपाध्यक्ष फतिमा सुमार नेपाल भ्रमण वइगु जुगुनि थौं येँया सुरक्षा व्यवस्था कडा याउगु दु।

एमसीसीया विरोधय् प्रदर्शन जुइफुगुलि येँया मू मू सतकय् सुरक्षाकःमिपिन्त तैनाथ याना तःगु दु। थापाथली, नयाँबानेश्वर, पुतलीसडक, माइतीघर, महाराजगञ्ज लगायतया थासय् सशस्त्र प्रहरी गणया टोली परिचालित याना तःगु दु।

अमेरिकी अनुदान सहयोग सम्बन्धी सम्झौता एमसीसीया विरोधय् छु दिं न्ह्यः जक न्हिन्हि प्रदर्शन जुयाच्वंगु दु। बुधबाः जक येँ ६ सय सुरक्षाकःमिपि परिचालित याउगु दु सा छगु दर्जन स्वया अप्वो प्रदर्शनकारीपिन्त ज्वंगु खः।