Display Style:
Column Style
येँ महानगरपालिकाया आर्थिक ग्वाहालिं वीरेन्द्र अस्पतालय् निःशुल्क हेमोडाइलासिस सेवा न्ह्यात
लहानान्युज | दिल्लाथ्व पारु ११४१,असार २७ आईतवाः
वीरेन्द्र अस्पताल छाउनीइ महानगरवासी मृगौला ल्वगिया लागिं निःशुल्क हेमोडाइलाइसिस सेवा थौंनिसे न्ह्याःगु दु।
येँ महानगरपालिकाया आर्थिक ग्वाहालि व नेपाली सेनाया व्यवस्थापनय् वीरेन्द्र अस्पताल छाउनीइ निःशुल्क हेमोडाइलासिस सेवा न्ह्याःगु खः। थौं आइतबाः येँ महानगरपालिका मेयर विद्यासुन्दर शाक्य व प्रधान सेनापति पुर्णचन्द्र थापां मंकाः रुपं निःशुल्क हेमोडाइलाइसिस सेवा न्ह्याकादिगु खः। उगु ज्याझ्वलय् महानगर मेयर शाक्यं मिर्गौला सम्बन्धी ल्वय् जुइ न्ह्यवः हे उकिया पनेत वा ल्वय् जुइधुंकाः अप्वः स्यंकेमबीत थुगुसीनिसें हे ‘स्वस्थ मिर्गौला–स्वस्थ काठमाडौं’ ज्याझ्वः न्ह्यायेधुंकूगु दु धका धयादिगु खः।
मिर्गौला बचाउ अभियान नांया संस्थालिसे सहकार्य यासें महानगरपालिकाया स्वीनिगुलिं वडाय् ज्याझ्वः न्ह्याःगु शाक्यं जानकारी बियादिगु खः। ‘येँ महानगरपालिकां थःगु नीति अले कार्यक्रमय् हे अस्पताल न्ह्याकेगु धाःगु दु । आःया लागिं व सम्भव मजूगुलिं विशेषज्ञ सेवा दुपिंलिसे सहकार्य यानाः महानगरवासीयात स्वास्थ्य सेवा बीगु कुतः न्ह्याकागु खः’ शाक्यं धयादिल ।
सेवा न्ह्याकेत आवश्यक भौतिक पूर्वाधार, ८ हेमोडायलाइसिस मेसिन, छगः रिप्रोसेसिङ मेसिन, लः शुद्धीकरण प्लान्ट व मेगु मेडिकल उपकरणत नं जडान यायेत महानगरं अस्पतालयात ३ करोड तका अनुदान उपलब्ध याकूगु दु । थुगु सम्बन्धि महानगरपालिका व अस्पताल दथुइ ०७६ पुस २ गते सम्झौता जूगु खः । सम्झौताया ई न्यादँया तयातःगु दु । सम्झौता कथं जडान जूगु ८ हेमोडायोलाइसिस मेसिनं हरेक वालय् निगू सिफ्टय् सेवा बी फइ। अस्पतालया प्रमुख सहायक रथी डाक्टर अरुण शर्मां सेवा काःवइपिं विरामीं महानगरं ब्यूगु सिफारिस ज्वनाः वयेमाःगु जानकारी बियादिल।
सेवा न्ह्याकेत अस्पतालय् बिस्कं हे युनिट दयेकूगु दु । उपचारय् संलग्न छम्ह एमबीबीएस डाक्टर, स्वम्ह स्टाफ नर्स, छम्ह हेमोडायलाइसिस प्राविधिक, छम्ह प्रशासन स्वइम्ह अधिकारी व छम्ह सफाई कर्मचारी यानाः मुक्कं ७ जनशक्तिया लागिं तलब खर्च महानगरं बी ।मिर्गौलां ज्या मयाइगु अवस्थाय् शरीरय् मुनीगु दुषित पदार्थत शरीरं पिछ्वयाः स्वस्थ दयेकेगु विधि डायोलाइसिस खः ।
आः देयन्यंकया ६५ गु अस्पतालय् ४०० व ९८ डायोलासिस मेसिनं ३ हजार ५०० व १६ विपन्न वर्गया विरामीतयसं निःशुल्क हेमोडायोलाइसिस सेवा कयाच्वंगु तथ्याङ्क दु । निःशुल्क डायोलाइसिस यायेबलय् राज्यं प्रति विरामी दँय् २ लाख ६० हजार तका खर्च यानाच्वंगु धाःगु दु ।नेपालय् दँय्दसं २ हजार ६सःम्ह मिर्गौलाया न्हूपिं विरामी थप जुयाच्वंगु सरकारी तथ्यांक दु ।
पेट्रोलियम पदार्थय् भाः थकागु विरोधय् आन्दोलन तच्वेकिगु
लहानान्युज | दिल्लाथ्व पारु ११४१,असार २७ आईतवाः
विपक्षी गठबन्धनया विद्यार्थी संगठनं पेट्रोलियम पद्धार्थय् याःगु मूल्यवृद्धिया विरुद्ध शंख पुया विरोध प्रदर्शन याःगु दु ।
विपक्षी गठबन्धनया विद्यार्थी संगठन त नेपाल विद्यार्थी संघ, अखिल(क्रान्तिकारी), एमाले वरिष्ठ नेता माधवकुमार नेपाल लिकसंया अनेरास्ववियू, जनता समाजवादी पार्टीया उपेन्द्र यादव लिकसंया समाजवादी विद्यार्थी युनियन व अखिल(छैठौँ) तय्सं प्रतिगमन, पेट्रोलियम पद्धार्थया मूल्यवृद्धि, भ्रष्टाचार व कुशासन विरुद्ध आइतबाः माइतीघरय् मुनां शंख पुया विरोध जुलुस पिकाःगु खः । विद्यार्थीपिन्सं शंख पुया विरोध याःगु खः धाःसा “झिगु ब्वज्या न्ह्यानाच्वंगु दु, मण्डलेपिं होशियार, विद्यार्थी एकता जिन्दावाद” थें जाःगु नारा थ्वेकूगु खः ।
थ्वयांन्ह्यः निगमं पेट्रोलिय पद्धार्थय् याःगु मूल्यवृद्धि लित मकागु धासें विपक्षी गठबन्धनया विद्यार्थी संगठनतय्सं थौं पत्रकार सम्मेलन याना आन्दोलनया मेमेगु ज्याझ्वः घोषणा याःगु खः । विद्यार्थी संगठनतयस् मूल्यवृद्धि लिछ्यायेत असार २४ गते ७२ घण्टे अल्टिमेटम बिउसां मूल्यवृद्धि लिमछ्याःगु धाःसें आइतबाः पत्रकार सम्मेलन याना थप ज्याझ्वःया घोषणा याःगु खः ।
न्हूगु आन्दोलनया ज्याझ्वः कथं असार २८ गतेनिसें नेपाल आयल निगमया गाडी त न्ह्याके मबिइगु, असार २९ गते पेट्रोलियम ढुवानी व न्यायमि यानावयाच्वंगु संगठनपिन्त पेट्रोल पम्प व ट्याङ्कर सेवा बन्द यायेत इनाप यायेगु व असार ३० गतेनिसें देय्यंकया दक्वः पेट्रोल पम्प व ट्याङ्कर बन्द यायेगु अखिल क्रान्तिकारीया नायः रञ्जित तामाङं धयादिल ।
२४घौ दुने १८३१म्ह संक्रमित थपू जुल
लहानान्युज | दिल्लाथ्व पारु ११४१,असार २७ आईतवाः
नेपालय् आःतक्क थ्यमथ्यं ७गू लख मनुत कोरोना संक्रमित जूगु दु । लिपांगु २४घौ दुने १८३१म्ह संक्रमितया थपू जुसें देशय् मुक्कं ६गू लख ९९द्वः ८८म्हसित संक्रमण जूगु खः ।
स्वास्थ्य तथा जनसंख्या मन्त्रालयं थौं याःगु प्रेस व्रिफिङ्य् मन्त्रालयया प्रवक्ता डा. कृष्ण प्रसाद पौडेलं पीसीआर व एन्टिजिन याना ९द्वः २१८म्हेसित याःगु परीक्षणय् थ्यमथ्यं १९.८६ प्रतिशत मनुत संक्रमण जूगु जानकारी बियादिल ।
अथेहे पीसीआर परीक्षण जुगुलि २२.२गू प्रतिशत मनुपिंके संक्रमण खनेदूगु धासें डा. पौडेलं आः न्ह्याम्ह सित परीक्षण यायेबले छम्ह संक्रमण जुयाच्वंगु धयादिल ।
अथेहे थौं येँ स्वनिगलय् ३१९म्ह संक्रमण जूगु दु । गुकिइ २६३म्ह येँ, ९७म्ह यलः व ३१म्ह ख्वपःय् खनेदूगु खः । स्वनिगः लिपाः झापा, मोरङ, सुनसरी, मकवानपुर, चितवन व कास्की अप्वः संक्रमित खनेदूगु खः । परीक्षणया तुलनाय् गण्डकी व कर्णाली प्रदेशय् अप्वः संक्रमण खनेदूगु खः ।
थ्वः ईलय् १५३३म्ह संक्रमितपिं संक्रमणमुक्त जूगु दु धाःसा कोरोनाया हुनिं लिपांगु २४घौ दुने २०म्हेसिन ज्यान छ्वय्माःगु दु ।
अमेरिकी खोप कन्हे वइगु
दिल्लाथ्व पारु ११४१,असार २७ आईतवाः
कोभ्याक्स संयन्त्रमार्फत अमेरिकां नेपाःयात अनुदानय् चुलाकेत्यंगु १५गू लख डोज जोन्सन एन्ड जोन्सन खोप कन्हय् सुथय् ये्ँय् थ्यंकावइगु जूगु दु ।
प्रधानमन्त्रीया परराष्ट्र मामिला सल्लाहकार राजन भटट्राईया कथं छगू डोज जक काःसा गाइगु जोन्सन एन्ड जोन्सन खोपयात अमेरिकां द्वहलपा कथं बिइत्यंगु खः ।
वंगु लाय् अमेरिकी राष्ट्रपति जो बाइडेनं नेपाः लिसेंया देय्यात न्हापांगु चरणय् ८०गू मिलियन डोज खोप कोभ्याक्सपाखें चूलाकेगु घोषणा यानादीगु खः ।
येँय् दूगु अमेरिकी दूतावासं उगु खोप अमेरिकी जनतायापाखें नेपाली जनतायात द्वहलपा जूगु न्ह्यथनादीगु दु ।
थौं विश्व जनसंख्या दिवस
लहानान्युज | दिल्लाथ्व पारु ११४१,असार २७ आईतवाः
थौं विश्व जनसङ्ख्या दिवस । समाधानया नितिं अधिकार व छनोट : शिशु ल्याःखय् उच्च वृद्धि वा म्हो न्ह्यागु जूसा नं प्रजनन दर सुधार यायेत प्रजनन स्वास्थ्य व फुक्क नागरिकया अधिकारया प्राथमिकीकरण हे खः धइगु नारालिसें हनेज्या जुयाच्वंगु दु ।
कोभिडयात त्याकेत मुक्कं हलिंयात आह्वान यासें थ्वखुसिइ थी थी ज्याझ्व जुयाच्वंगु दु । सन् १९८९ निसें दँय्दसं जुलाई ११ तारिखय् हलिंयंकया जनसङ्ख्याया मुद्दायात सम्बोधन यायेगु आज्जुं थुगु दिवस हनेगु न्ह्यागु खः ।
सन्तुलित जनसङ्ख्या मदयेकं छुं नं देय्या सुरक्षा, विकास स्यल्लागु भविष्यया कल्पना नं याये फइमखु । हलिंया शक्तिकेन्द्र व हलिंया जनसङ्ख्याय् थःगु अधिकतम थाय् तइगु चीनं अप्वःगु जनसङ्ख्याया भय थुइका ‘छम्ह जक सन्तान प्रणाली’ लागू याःगु खः ।
तर लिपांगु ई जनसङ्ख्याया निश्चित स्तर चूलाकेत ताः ईया अध्ययन लिपा सन् २०१५ य् निम्ह सन्तान जन्म यायेत अनुमति जक मखु कि थः नागरिकयात आह्वान हे याःगु दु ।
नेपाल, भारत व बङ्गलादेशय् धाःसा ‘पपुलेसन बोनस’ जूगु नालेगु याः । थुकिया अर्थ क्रियाशील जनसङ्ख्या धायेकि १६गू निसें ४९ गू प्रतिशत तक्कया जनसङ्ख्या मुक्कं जनसङ्ख्याया ६० गू प्रतिशत सिवें अप्वः जूवनिगु खः ।
थुगु जनस्रोतया बाँलाक्क छ्यले फुूसा विकास तापाइ मखु । तर नेपाली जनशक्तिया चःति धाःसा स्वदेशय् सिवें विदेशय् बावानाच्वंगु खनेदु ।
