ईजरायलया लागि नेपालया राजदूत डा.अन्जान शाक्यया विशेष कुतलं ईजरायलपा कोभिड–१९ रोकथाम तथा नियन्त्रणया लागि अत्यावश्यक स्वास्थ्य सामाग्री व उपकरण नेपाल थ्यंगु दु।

स्वास्थ्य सामाग्री व उपकरण कायेत ईजरायल वंगु नेपाल वायुसेवाया २३५३ ‘चार्टड फ्लाईट’ पाखे उगु सामग्री नाप नेपाल थ्यंगु दु धका दूतावासं जानकारी बिगु दु। विमानस्थलय् परराष्ट्र व स्वास्थ्य मन्त्रालयया पदाधिकारी नाप नेपालया लागि ईजरायली राजदूत हनान गोडेरसहितया टोली अन थ्यंका सामग्री हस्तान्तरण यागु धका दूतावासं जानकारी बिगु दु।

‘नेपाल वंगु उगु स्वास्थ्य सामग्री इजरायल सरकार, इजरायलया स्वास्थ्य संस्थापिन्स ग्वाहालि यागु’ धका राजदूत डाक्टर शाक्यं धयादीगु दु, ‘करीब २० करोडया अनुमानित स्वास्थ्य सामग्रीया तौल करीब १८ टन दु ।’ राजदूत शाक्यया कथं उगु सामग्रीइ ५८ भेन्टिलेटर, १२० अक्सिजन कन्सन्ट्रेटर, आइसीयु नाप सम्बन्धित उपकरण, वासः, पीपीई, थर्मल गन लगायतया कोरोनाया उपचार नाप सम्बन्धित खः।

थ्व स्वया न्ह्यः न राजदूत शाक्यं नेपालया लागि ईजरालपाखे कोभिड नाप सम्बन्धित थीथी ग्वाहाली याये धुकुगु दु।

किपू नगरपालिकां थःगु मातहत लाःगु फुक्कं स्कुलय् थ्व हे शैक्षिक सत्रंनिसें शुरु यायेत्यंगु नेपालभाषा विषय ब्वंकीपिं शिक्षकपिन्त तालिम बिउगु दु ।

किपूया मंगल माविइ जूगु छगू ज्याझ्वलय् किपू नगरपालिकाया मेयर रमेश महर्जनं उगु तालिमया उलेज्या यानादीगु दु । उलेज्या समारोहय् मेयर  महर्जननाप उपप्रमुख सरस्वती खड्का, शिक्षा विभाग प्रमुख टंकलाल गैरे आदिपिंसं नुगःखँ प्वंकादीगु खः ।

किपू नगरपालिकां थःगु नपा दुने लाःगु सरकारी व निजी यानाः फुक्कं स्कुलय् कक्षा १ निसें ३ तक स्थानीय विषयया रुपय् नेपालभाषा ब्वंकेगु निर्णय याःगु खः । म्हिगःनिसें शुरु उगु जूगु तालिमय् किपू नगरपालिका दुने २८ गू स्कुलया २८ म्ह हे शिक्षकतय्सं ब्वति कयाच्वंगुलि तालिम न्यान्हु तक न्ह्याइगु धका तालिमया संयोजक जुजुभाई महर्जनं धयादीगु दु। महर्जनं धयादीकथं थुगु तालिम किपू दुनेया ४० गू स्कुलया शिक्षकतय्त बीगु ताः तयातःगु दु ।

थुगु तालिमय् नेपालभाषा, शिक्षण विधि, किपूया शैक्षिक अवस्था, नेवाः कासा, संस्कृति, सम्पदा, पर्यटन, लसक व स्वास्थ्य आदि विषयया तालिम बीगु खँ नं महर्जनं कनादिल । किपुली नेपालभाषा विषयया पाठ्यक्रम व सफू नं तयार यानाच्वंगु खँ धाःगु दु ।

वाःया लिपागु दिं बिहीवा सेयर बजाःया भाः थहावंगु दु।

सेयर करोबार मापक नेप्से परिसूचक दोहोरो अंकं थहावगु व्यापार व ‘मेगु’ बाहेकया दक्को थहावंगु दु। नेप्से परिसूचक २३ दशमलव ७६ अंक थहावना २ हजार ८२४ दशमलव ८९ अंक थ्यंगु दु।

‘क’ वर्गया कम्पनीया कारोबार मापन याइगु सेन्सेटिभ इन्डेक्स न ४ दशमलव ४१ अंक थहावंगु दु। कारोबार रकम धासा ५ अर्ब मथ्यं। न्हिच्छियकं जुगु १ हजार ८६८ कारोबारपाखे २२३ कम्पनीया १ करोड ३१ लाख ४३ हजार २४० कित्ता सेयर किनबेच जुगु दु। उकिपाखे कारोबार रकम ४ अर्ब ८१ करोड ५५ लाख २० हजार २९४ रुपैयाँ थ्यंगु दु।

बिहीवाः दकलय् अप्वो फाइनान्स कम्पनीया समूहगत सवइन्डेक्स थहावंगु दु। फाइनास ३ प्रतिशत स्वया अप्वो थहावंसा विकास बैंक २ प्रतिशत च्वय् व लघुवित्त समूह १ प्रतिशत थहावंगु दु। दकलय् अप्वो गुहेश्वरी मर्चेन्ट फाइनान्सया सेयर भाः करिब १० प्रतिशत थहावंगु दु। राष्ट्रिय बिमा कम्पनीया संस्थापक समूहपाखे सेयर भाः छगुकित्ता १ हजार ८४ रुपैयाँ थहावंगु दु।