सर्वोच्च अदालतं गण्डकी प्रदेशसभा सदस्यय् पदमुक्त जुम्ह कृष्ण थापायात प्रदेशसभा सदस्यया हैसियतय् ज्या याकेत अन्तरिम आदेश बिगु दु।

न्यायाधीश कुमार चुडालया एकल इजलासं थापायात यागु कारबाही कार्यान्वयन मयायेत गण्डकी प्रदेशसभा सचिवालय व राष्ट्रिय जनमोर्चाया नामय् अन्तरिम आदेश जारी यागु दु। राष्ट्रिय जनमोर्चां थापायात दलपाखे निष्कासन यायेत प्रदेशसभा सचिवालय जानकारी बिगु दु।

सभामुख नेत्रनाथ अधिकारीं थापायात दलं कारबाही यागु पौं वयेवं थापा पदमुक्त जुगु खः। उकिया विरुद्ध थापां बिगु रिटया सुनुवाइ यासे सर्वोच्चं वयात यागु कारबाहीया निर्णय कार्यान्वयन मयोत अन्तरिम आदेश बिगु दु।

सर्वोच्चं थापा न दलया ह्वीप उल्लंघन यागु खने मदुगु धासे दल त्यागया कारबाही याये मिले जुगु वा मजुगु विषयया गम्भीर कानुनी व्याख्या यायेमागु धासे तत्कालया लागि कारवाहीया निर्णय कार्यान्वयन मयोत अन्तरिम आदेश बिगु खः।

सर्वोच्चया आदेश लिपा आः थापां प्रदेशसभा बैठकय् भाग कया व प्रदेशसभा सदस्यया हैसियतं मतदान याये दइगु जुगु दु।

वंगु २४ घण्टाया दुने देयन्यक ३ हजार २४ म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयया प्रवक्ता डा. कृष्णप्रसाद पौडेलं थौं आइतवाः कोभिड ब्रफिङय बिगु जानकारी कथं थीथी जिल्लाय् यागु १० हजार ४७१ पीसीआर परीक्षणय् ३ हजार २४ म्हेसित कोरोना पुष्टि जुगु दु।

अथेहे, ३ हजार २६२ एन्टिजेन परीक्षणय् ४५५ म्हेसित कोरोना संक्रमण खनेदुगु खः। पीसीआर व एन्टिजेन परीक्षणपाखे ३ हजार ४७९ म्हेसित संक्रमण पुष्टि जुगु धका मन्त्रालयं धागु दु।

अथेहे, २४ घण्टाया दुने ६ हजार ६३६ म्ह कोरोना संक्रमणमुक्त जुगु दु। नेपालय् सक्रिय संक्रमितपि ८९ हजार २१७ म्ह दु। मन्त्रालयं बिगु जानकारी कथं देयन्यक थप ९९ म्ह सीगु दु।

थ्व नाप आःतक नेपालय् कोरोनां सीपि ७ हजार ८९८ म्ह थ्यंगु दु ।

चुरे दोहन विरुद्ध प्रदर्शन यापि नेपाल विद्यार्थी संघया गुम्ह नेता व कार्यकर्तापि थौं येँया गोंगबुइ ज्वंगु दु।

सरकारं हःगु चुरे नीति गलत जुगु धासे भन्दै प्रदर्शन यागुलि नेविसंघया नेता नाप कार्यकर्तापिन्त प्रहरीं गोंगबु चोकं ज्वंगु खः।

नेविसंघया महामन्त्री दीपक भट्टराई नाप परोपकार अधिकारी, किशोर गुरुङ, धर्मराज शाही, सुमन थापा मगर, दीपेन्द्र ढकाल, हिक्मत शाही, सुदर्शन पनेरूयात ज्वंगु खः।

चुरे दोहन, उपप्रधानमन्त्री राजेन्द्र महतों बिगु बहुल राष्ट्रिय राज्यया बारे अभिव्यक्ति व पेट्रोलियम पदार्थया भाः थकागुलि प्रदर्शन यागु खः।

नेपाली सेयर बजाःया परिसूचक नेप्से आःतक हे दकलय् अप्वो बिन्दुइ थ्यंगु दु।

थुगु वाःया न्हापागु दिं कारोबार नेप्से परिसूचक २९०६.९१ अंकय् थ्यंगु खः। आइतवाः नेप्से परिसूचक २९२०.९१ विन्दइ अंक तक थ्यना लिहावंगु खः। आइतावाः बजारय् ५०.१४ अंक थहावंगु खः।

थ्वं १.७६ प्रतिशत वृद्धि खः। थौं आईतवाः बैंकिङ परिसूचकं बजाःयात नेतृत्व यागु दु, थुकिया प्रभाव समग्र परिसूचक न्ह्यने लागु खः। ५० अंकं थहावंगु खुगु समूहया भाः धासा क्वहावंगु दु।

थौं बैंक, विकास बैंक, वित्त, लघुवित्त, म्यूचअल फण्ड, लगानी व मेमेगु समूहया परिसूचक थहावंगु खः। तर, व्यापार, होटेल व पर्यटन, जलविद्युत, निर्जिवन बीमा, निर्माण नाप उत्पादन व जीवन बीमा समुहय् परिसूचक क्वहा वंगु दु। आइतवाः कुल २१८ कम्पनीया १ लाख ७१ हजार ६० कारोबार जुगु खः।

कारोबार जुगु सेयर ल्याः ३ करोड ७४ लाख ५५ हजार १ सय ८९ खः। आइतवाः कारोबार रकम धासा १७ अर्ब २७ करोड १७ लाख ८७ हजार ५२५ थ्यंगु दु। थौं दकलय् अप्वो लघुवित्त वित्तीय संस्थाया लगानीकर्तां कमे यात।

थ्व बाहेक गुडविल फाइनान्स, लुम्बिनी विकास बैंक, रिडि हाइड्रोपावर विकास कम्पनी, नेपाल बंगलादेश बैंकया कारोबार सर्किट लेवलय् थ्यंगु दु। राधी विद्युत कम्पनीया लगानीकर्तापिन्स दकलय् गुमे यात।

थ्व बाहेक दिव्येश्वरी हाइड्रो, नारायणी विकास बैंक, आँखुखोला जलविद्युत कम्पनी, युनियन हाइड्रोपावरया भाः तसकं क्वहावल।

१४ लाख डोज खोप डेनमार्कं नेपालयात बिइगु डेनमार्क सरकारं नेपालयात अनुदानय् १४ लाख डोज खोप बिइत्यंगु दु।

डेनिस सरकारं स्वास्थ्य सेवा विभागयात पौ च्वया एस्ट्राजेनेकाया खोप उपलब्ध यायेत जानकारी यागु स्वास्थ्य सेवा विभाग, आपूर्ति व्यवस्थापन महाशाखाया भमि सिंह टिकंरी न जानकारी बिगु दु।

वयकःया कथं डेनिस सरकारं उपलब्ध याइगु खोजया लागि सहजीकरण याना बिइत विभागं युनिसेफयात इनाप यागु दु।