येँया प्रमुख जिल्ला अधिकारी (सीडीओ) कालीप्रसाद पराजुलीया सरुवा जुउगु दु।

पराजुलीयात गृह मन्त्रालय हउगु दु सा मन्त्रालयया प्रशासन महाशाखा प्रमुख गोविन्द रिजालयात येँया सीडीआया रूपय् छ्वंगु दु धका गृह मन्त्रालयया प्रवक्ता फणिन्द्रमणि पोखरेलं जानकारी बिउगु दु।

थौं गृह मन्त्रीस्तरीय निर्णय न सरुवा याउगु खः। पराजुली वंगु मङ्सिनिसे येँया प्रशासन प्रमुख जुया वयाच्वंगु खः।

राष्ट्रिय मानव अधिकार आयोगं विचाः व अभिव्यक्ति स्वतन्त्रता अधिकारया सम्मान यायेत सरकारयात इनाप याउगु दु।

दार्चुलाया जयसिंह धामी महाकाली खुसिइ छ्यलिइगु झ्वलय् वंगु साउन १५ गते महाकाली खुउगु घटना व एमसीसी लगायतयात कया जुयाच्वंगु आन्दोलनयात लक्षित यासे गृह मन्त्रालयपाखे प्रकाशित विज्ञप्तिइ ध्यानाकर्षण जूगु दु धका आयोगं धाउगु दु।

गृह मन्त्रालयपाखे नकतिनि हे प्रकाशित जूगु विज्ञप्तिपाखे नागरिकया विचाः व अभिव्यक्ति स्वतन्त्रता कुण्ठित जुगु अवस्थाप्रति राष्ट्रिय मानव अधिकार आयोगं च्यूताः प्वकूगु दु। ‘गृह मन्त्रालयपाखे २०७८ भदौ १८ व २० गते मित्रराष्ट्रपाखे सञ्चालित विकास आयोजना, अन ज्यायाइपि कर्मचारी, विदेशी नागरिक व उमिगु सम्पत्तियात लक्षित यासे प्रत्यक्ष वा परोक्ष रूपं सञ्चार माध्यम व सामाजिक सञ्जालय् नकारात्मक टिप्पणी यायेगु, धम्कीपूर्ण अभिव्यक्ति बिइगु गतिविधिइ कडा कारबाही यायेगु व्यहोराया प्रेस विज्ञप्ति प्रकाशित जुगु खने दु’, विज्ञप्तिइ धाउगु दु। थज्याउगु विज्ञप्तिपाख नागरिकपिनिगु शान्तिपूर्ण रूप प्रदर्शनय् सहभागी जुइ दइगु अधिकार तक कुण्ठित जूगु दु धका आयोगं धाउगु दु।

नाप संविधान व अन्तर्राष्ट्रिय मानव अधिकार कानुन दुने च्वना विचाः व अभिव्यक्ति स्वतन्त्रतायात सम्मान यासे थज्याउगु ज्या रोके यायेगु छु सूचं, विज्ञप्ति नाप गतिविधि मयायेत, मयाकेत आयोगं सरकारयात इनाप याउगु दु।

प्रधानमन्त्री शेरबहादुर देउवां सत्ता साझेदार दलपिन्स नां बिइ धुका मन्त्रिपरिषद विस्तार जुइ धका धाउगु दु।

मंगलबाः नेपाली कांग्रेस संसदीय दलया बैठकय् सांसदपिन्स न्यंगु न्ह्यसःया लिसः बिउगु झ्वलय् देउवां नेकपा माओवादी केन्द्र व एकीकृत समाजवादीें नां बिइ धुका मन्त्रिपरिषद विस्तार जुइ धका धाउगु खः।

‘एमाले (आःया एकीकृत समाजवादी), माओवादी मिले जुया सरकार बने जूगु सकसिया स्यू हे खँ खः। उपि नाप सल्लाह यायेमाः। उमिस नां बिलकि सरकारं पूर्णता काइ धका देउवां बैठकय् धाउगु खः।

वंगु असार ३२ गते प्रधानमन्त्री नियुक्त जुयादीउम्ह देउवाया मन्त्रिपरिषद आःतक ६ सदस्यीय जक दु। सरकार गठनय् निला जुइत्यंगु दु सा मन्त्रिपरिषद विस्तार याये मफयाच्वंगुलि देउवाया आलोचना जुयाच्वंगु दु।

सोमबाः कीर्तिमानी तःगु शेयर बजाः परिसूचक नेप्से थौं मंगलबाः धासा कुहावंगु दु।

आइतबाः १०८.२६ अंकं घटे जुउगु बजा म्हिगः सोमबाः १६२ अंकं थहावंगु दु। मंगलबाः धासा ४४.१८ अंकं घटे जूया बजाः २९३६.६० विन्दुइ कुहावंगु दु। मंगलबाः बजाः १.४८ प्रतिशतं कुहावंगु दु।

थौं मंगलबाः कारोबार रकम न तधःगु कमी जूगु दु। थौं जक ७ अर्ब ४९ करोड रुपैयाँ जक कारोबार जूगु दु। थौं २२२ कम्पनीया ८६ हजार ५ सय ८ पटक कारोबारपाखे १ करोड ५० लाख ८२ हजार ८१ कित्ता शेयर किनबेच जुगु खः।

थौं होटेल व पर्यटन, ननलाइफ इन्स्योरेन्स व माइक्रोफाइनान्सया लगानीकर्तापिन्स यक्को गुमे याउगु दु। म्यूचअल फण्ड व मेमेगु समुहपाखे मंगलबाः थौं कुहावंगु दु। सानिमा लाइफ इन्स्योरेन्साया पोटेटिभ सर्किट लेवलय् कारोबार जूगु दु।

थुगु कम्पनीया शेयर भाः १० प्रतिशतं थहावंगु दु। युनाइटेड मोदी हाइड्रोपावर, हाइड्रोइलेक्ट्रिसिटी इन्भेष्टमेन्ट एण्ड डेभलपमेन्ट कम्पनी, युनिलिभर नेपाल लिमिटेड, महालक्ष्मी स्मार्ट लघुवित्त नाप कम्पनीया लगानीकतापिन्स यक्को थहावंगु दु।

यक्को गुमे याउगु कम्पनीया लगानीकर्तापि आरएमडीसी लघुवित्त, रुरु जलविद्युत, प्रोग्रेसिभ फाइनान्स, फस्र्ट माइक्रोफाइनान्स कम्पनी ख।

स्वास्थ्य तथा जनस्ख्या मन्त्रालयया कथं दकलय् अप्वो येँ ३६४ म्हेसित कोरोना सक्रमित जूगु दु।

अथेहे, मोरङय् १६१, सुनसरीइ १४९, झापाय् १२४, कास्कीइ ११७ म्हेसित कोरोना संक्रमण पुष्टि जूगु दु। अथेतु, यलय् ८९, ख्वय् ६६, चितवन व नुवाकोटय् ३८÷३८ म्ह, रुपन्देहीइ ३४, सुर्खेतय् ३१ म्हेसित कोरोना संक्रमण खनेदुगु दु।

बर्दिया व कैलालीइ १४÷१४ म्ह, नवलपरासी पुर्व व दाङय् १३÷१३ म्ह नाप मकवानपुरय् १० म्हेसित कोरोना संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।