पर्वतया थीथी थासय् चलः वना न्याम्ह सीउगु दु सा स्वम्ह बेपत्ता जुउगु दु। मदिक्क वाः वंया च्वंगुलि कुस्मा नगरपालिका स्वम्ह दुर्लुङय् न्याम्ह ल्हांगुलि निम्ह सीना च्वंगु अवस्थाय् लुगु दु।

चलः वया छखा छेँया हे न्याम्ह मध्ये १५ दँ दुम्ह विमला पौडेल व ११ दँ दुम्ह विनिता पौडेलया शव पिकागु खः। उगु छेँया स्वम्ह आः न वेपत्ता जुयाच्वंगुलि मालेगु ज्या जुयाच्वंगु दु धका जिल्ला प्रहरी कार्यालयया प्रहरी नायव उपरीक्षक शिवराज बुढाथोकीं जानकारी बिउगु दु।

अथेहे कुश्मा नगरपालिका ११ पकुवा चलखं ल्हाना निम्ह सीगु दु। ३५ दँ दुम्ह दुर्गा पौडेल व वया काय् ६ दँ दुम्ह गणेश पौडेल सीउगु दु धका प्रहरी नायव उपरीक्षक बुढाथोकीं जानकारी बिउगु दु।

अथेतु मोदी गाउँपालिका ५ अम्बोटय् चलः वया ५० दँ दुम्ह ठुलीमाया थापा न मदुगु दु।

येँ महानगरपालिका वडा नं. १९ या वडा अध्यक्ष शशिलाल श्रेष्ठ ६४ दँय् थौं मन्त।

क्यान्सर ल्वचं पिदित जुयाच्वनादीम्ह वयकः म्हिगः नर्भिक अस्पतालय् यंकूगु खः। उपचार यायेगु झ्वलय् थौं सनिलया ४ः३० निसे ५ बजे दुने मदुगु धका वडा सदस्य मधुसुदन प्रधान लहनान्युजयात जानकारी बियादीगु खः।

वयकः छकः वडा सदस्य नाप स्वकः निकः वडाध्यक्ष जुयादी दुकुम्ह खः। वयकः वंगु स्थानीय निर्वाचनय् न वडाध्यक्षय् निर्वाचित जुयादीगु खः। वंगु २६ क्वःगु महानगर दिवसय् न वयकः सम्मानीत जुयादीगु खः।

वयकः जहान नाप छम्ह काय् व स्वम्ह म्ह्याय् दी।

स्वास्थ्य तथा जनसंख्या मन्त्रालयया वंगु २४ घण्टाय् थप स्वनिगलय् ७९३ म्हेसित कोरोना संक्रमित पुष्टि जुगु दु।

थौं येँ जक ५४१ म्हेसित कोरोना सक्रमित पुष्टि जुगु दु अथेहे, यलय् १५२ म्ह व ख्वपय् १०० म्हेसित कोरोना संक्रमित पुष्टि जुगु दु।

झापाय् १२६, मोरङय् ११२, कास्कीइ १०५, सुनसरीइ ६४, चितवनय् ६०, रुपन्देहीइ ४१ व काभ्रेय् २८ म्हेसित कोरोना संक्रमित जूगु दु।

वंगु २४ घण्टाया दुने देयन्यक थप २००४ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १० हजार ६५८ म्हेसित पीसीआर परीक्षण यागुलि १६१९ म्ह व ३ हजार ९९२ म्हेसित एन्टिजेन परीक्षणय् ३८५ म्ह याना २००४ म्ह कोरोना संक्रमण पुष्टि जुगु दु।

वंगु २४ घण्टाय् कोरोना संक्रमणमुक्त जूपि १८४६  थ्यंगु दु सा १६ म्ह सीउगु दु। आःतक कोरोना भाइरसया सक्रिय संक्रमितपि ३३ हजार ९४६ म्ह दु सा उकि मध्ये ३१ हजार ६१९ म्ह होम आइसोलेसनय् व २३२७ म्ह संस्थागत आइसोलेसनय् च्वना च्वंगु दु।