नारायणी अस्पतालय् हैजा सङ्क्रमि ६४म्ह बिरामीपाखे वासः याकाच्वंगु दु। अस्पतालया प्रवक्ता डा उदयनारायण सिंहया कथं उमिगु अवस्था सामान्य दु।

उगु अस्पतालय् थ्वहे भदौ ६ निसें ११ गतेतक २२६ म्ह हैजा बिरामी वःगुलिइ १६२ म्ह वासः याकाः छेँय् लिहांवने धुंकूगु वय्कलं धयादिल। खुम्हेसिया सघन उपचार कक्षय् तयाः वासः यानाच्वंगु दु।

बुधवाः सनिलय् तक ११० म्हेसिया ‘कोलेरा आरडिटी’ याःगुली ४८ म्हेसित हैजा सङ्क्रमण पुष्टि जूगु दु। आरडिटी पोजिटिभ मध्यय् १५ म्हेसिया नमूना ‘कल्चर’या निंतिं प्रादेशिक जनस्वास्थ्य प्रयोगशाला छ्वःगुली १२ म्हेसिके ‘भिब्रिओ कोलेरा’ खनेदूगु खः। 

प्रधानमन्त्री केपी शर्मा ओलीपाखे जुइत्यंगु चीन भ्रमणया झ्वलय् चीनया राष्ट्रपति व भारतया प्रधानमन्त्रीनापं नापलाइगु झ्वलय् नेपाःया लिपुलेकया विषय चीन–भारत दथुइ जूगु सहमतिबारे खँ ल्ह्वनीगु धाःगु दु।

मन्त्रिपरिषदया निर्णय सार्वजनिक यायेत म्हिगः ग्वसाः ग्वःगु पत्रकार सम्मेलनय् सरकारया प्रवक्ता लिसें सञ्चार नापं सुचना प्रविधिमन्त्री पृथ्वीसुब्बा गुरुङं साङ्घाई ग्वाहालि सङ्गठन (एसइओ) शिखर सम्मेलनय् ब्वति कायेया निंतिं चीन झायेगु झ्वलय् उगु विषय प्रधानमन्त्रीं जःला खःला देय् दथुइ जूगु सहमतिबारे खँ ल्ह्वःनेगु धका धयादिल।

प्रधानमन्त्री ओलीं थ्वहे भदौ १४ निसें १८ गतेतक चीनया भ्रमण यायेया निंतिं क्वःछिनादी धुंकूगु दु। सञ्चार लिसें सुचना प्रविधिमन्त्री गुरुङं धयादिल, “भारत व चीनया विदेशमन्त्री दथुइ लिपुलेकया विषय जूगु सहमति नेपाःया सार्वभौमिकताया विरुद्धय् दु। साङ्घाई फोरमया झ्वलय् जःला खःला शीर्ष नेतृत्व दथुइ जुइगु उच्चस्तरीय नापलायेगु झ्वलय् थ्व विषय खँल्हाबल्हा जुइ।”

भ्रमणया झ्वलय् प्रधानमन्त्री ओली व भारतया प्रधानमन्त्री नरेन्द्र मोदीया दथुइ ‘साइडलाइन’ खँल्हाबल्हाया निंतिं निगूलिं देय्पाखें तयारी जुयाच्वंगु वय्कःया धापू दु। मन्त्री गुरुङं भारत व चीनया विदेशमन्त्री दथुइ नेपाःया लिपुलेक जुयाः व्यापारिक लँपु छ्यलेगु सन्दर्भय् जूगु सहमतिबारे नेपाः सरकारया पाखें थ्वस्वया न्ह्यवं हे परराष्ट्र मन्त्रालयपाखें कूटनीतिक नोट जारी याये धुनागु धयादिल।

थ्वहे दथुइ, वय्कलं सरकारं न्हूगु व तःधंगु योजना थपे मयायेगु व याये फइगु योजनाजक नीति लिसें ज्याझ्वः व बजेटय् दुथ्याकेगु नीतियात कडा कथं नालाकायेगु धयादिल । कुहांवनाच्वंगु अर्थतन्त्र आःया सरकारया नीति व ज्यां यानाः थःगु लँपुइ लिहांवःगु धयादिसें वय्कलं अन्तरमन्त्रालय समन्वयया हुनिं तःगतिं जुइ मफयाच्वंगु विकास पूर्वाधारयात समन्वय यानाः न्ह्याकेगु प्रतिबद्धता प्वंकादिल।

मन्त्रालयया ज्यायात व्यवस्थित यायेत नापं उकी अःखः लिच्वः मलायेमा धकाः मन्त्रीया विदेश भ्रमणय् कडाइ यानागु लिसें मन्त्री व सचिव छगू हे इलय् भ्रमणय् वंके मबीगु व्यवस्या यानागु वय्कलं धयादिल।

नेपालय् च्वंगु अमेरिकी दूतावासं नेपाल प्रहरीया केन्द्रीय विधिविज्ञान प्रयोगशाला सामाखुशीयात ‘डिएनए’पाखें याइगु परीक्षण व ड्रग परीक्षणया निंतिं छ्यलीगु आधुनिक उपकरण व ‘डिएनए’ परीक्षणय् छ्यलीगु सफ्टवेयर ग्वाहालि याःगु दु।

बुधवाः नेपाल प्रहरीया महानिरीक्षक दीपक थापाया उपस्थितिइ नेपाःया निंतिं अमेरिकाया राजदूत डिएनआर थमसनं नेपाल प्रहरी केन्द्रीय विधिविज्ञान प्रयोगशाला, सामाखुशीइ म्हिगः छगू ज्याझ्वः दथुइ उगु प्रविधि लःल्हाःगु खः। प्रयोगशालाय् जुइगु परीक्षणयात वैज्ञानिक व वस्तुनिष्ठ दयेकेत अमेरिकाया दूतावासपाखें ‘कम्बाइन्ड डिएनए इन्डेक्स सिस्टम (डिएनए सफ्टवेयर)’ व ‘ड्रग डिटेक्सन इन्स्ट्रमेन्ट’ लःल्हाःगु खः।

ज्याझ्वलय् प्रहरी महानिरीक्षक थापां आधुनिक उपकरणत व प्रविधिं केन्द्रीय विधिविज्ञान प्रयोगशालाया क्षमता तब्यानाः वनीगु धयादिसें प्रयोगशालां बिइगु सेवायात अझं याकनं सुथांलाक जुइगु नापनापं वैज्ञानिक कथं मान्य व भःदूगु दसिनापं दइगु विश्वास प्वंकादिल। उगु प्रणालीया सुविधां ‘फोरेन्सिक डिएनए’ विश्लेषण क्षमतायात अन्तरराष्ट्रिय मापदण्डय् यंकेत लिसें नेपाःया मुक्कं फौजदारी न्याय प्रणाली सुदृढ दयेकेगु धयादिसें थ्व उपकरणं लागूवासःया स्क्रिनिङय् क्षमता तब्यानावनीगु वय्कलं धयादिल।

प्रहरी महानिरीक्षक थापां अमेरिकाया दूतावासं केन्द्रीय विधिविज्ञान प्रयोगशालाया क्षमता तब्याकेगु लिसें विकासया निंतिं न्हापाया दँय् थीथी न्वाखँ, तालिम व उपकरणनापं बियावयाच्वंगु व थुकिं यानाः अन्तरराष्ट्रिय मापदण्ड कथं क्षमतावान् लिसें दक्ष फोरेन्सिक विज्ञत उत्पादन यायेत ग्वाहालि जूगु धयादिल।

आधुनिक प्रविधिया एकीकरणं नेपाल प्रहरीया संस्थागत क्षमतायात सुदृढ दयेकीगु नापं कानुन कार्यान्वयन लिसें शान्ति सुरक्षा सुनिश्चित यायेत महत्वपूर्ण योगदान जुइगु विश्वास वय्कलं प्वंकादिल। ज्याझ्वलय् नेपाःया निंतिं अमेरिकाया राजदूत थमसनं लःल्हानादीगु आधुनिक प्रविधिं नेपाल प्रहरीया केन्द्रीय विधिविज्ञान प्रयोगशालाया क्षमता तब्यानावनीगु विश्वास प्वंकादिसें अपराधया अनुसन्धान लिसें तनाच्वंपिं मनूया म्हसिकाय् महत्वपूर्ण योगदान जुइगु धयादिल।

थौ शेयरबजाः सामान्य थहावंगु दु। शेयर बजाः परिसूचक नेप्से थौ ४ दशमलव ८३ ल्याखं थहावना २ हजार ७ सय ६६.०९ विन्दुइ थ्यःगु दु।

थौ लगानी, उत्पादन, लघुवित्त व निर्जिवन बीमा बाहेक दक्को समूहया शेयर थहावःगु दु सा अप्पो मेमेगु समूहया शेयर १ प्रतिशत स्वया अप्पो थहावंगु दु।

थौ बिकास हाइड्रोपावर कम्पनीया शेयर झन्डै १० प्रतिशतं थहावःगु दु। नेप्से थहावंसा कारोबार रकम कुहावःगु दु। म्हिगः ५ अर्ब ७५ करोड रुपैयाँया शेयर कारोवार जुगुलि थौ ४ अर्ब १८ करोड ५३ लाख रुपैयाँया शेयर कारोवार जुगु दु।

उपप्रधानमन्त्री नापं सहरी विकासमन्त्री प्रकाशमान सिंहं राज्य सञ्चालनया थी थी तहय् मिसा प्रतिनिधित्व स्थापित यायेत नेपाली कांग्रेसया नेत्री मङ्गलादेवी सिंहया महत्त्वपूर्ण योगदान दूगु धयादीगु दु।

नेपाल महिला सङ्घया संस्थापक नापं नेपाःया मिसा आन्दोलनया नेत्री मङ्गलादेवी सिंहया २९ क्वःगु स्मृति दिवसया झ्वलय् थौं शोभा भगवतीइ च्वंगु सिंहया झ्वाताय् माल्यार्पण यासें वय्कलं मिसा अधिकारया निंतिं वय्कःया भूमिका अतुलनीय जूगु धयादिल।

उपप्रधानमन्त्री सिंहं मिसातय् हक, अधिकारया निंतिं सः थनीम्ह मिसा नेत्री सिंह लिसें मिसातय् सङ्घर्षया लिच्वः कथं आःया संविधानय् समावेशी, समानुपातिक प्रतिनिधित्व व नीतिगत तहय् मिसा प्रतिनिधित्व सुनिश्चित जूगु धयादिल। उगु झ्वलय् मङ्गलादेवी फाउन्डेसनया नायः सृजना सिंहं मङ्गलादेवी सिंह नेपाःया मिसातय् निंतिं प्रेरणाया स्रोत खः धकाः धयादिल।

मिसातय्त भुतुलिं पिहाँवयाः थःगु हक, अधिकारया निंतिं ल्वायेत २००४ साल साउन २४ गते मङ्गलादेवी सिंहया नायःसुइ महिला सङ्घ स्थापना जूगु खः।