विश्व स्वास्थ्य संगठनं हलियक थीथी देशय् पिहावंगु कोरोना भाइरसया न्हुगु भेरियन्टयात बिस्क बिस्क हे नां बिगु दु।

विश्व स्वास्थ्य संगठनं बेलायतय् पिहावंगु  भेरियन्टयात ‘अल्फा’, ब्राजिलय् खनेदुगु भेरियन्टयात ‘गामा’, दक्षिण अफ्रिकाय खनेदुगु भेरियन्टयात ‘बेटा’, भारतय् खनेदुगु भेरियन्ट B.1.617.2) यात ‘डेल्टा’ नां बिगु दु।

भारतय् मेगु भेरियन्ट (B.1.617.1) यात ‘कप्पा’ नां बिगु दु। भारतय् पिहावंगु ( B.1.617.2)) व ( B.1.617.1) भेरियन्ट नेपालय् पुष्टि जुगु खः। अथेहे नेपालय् खनेदुगु भेरियन्टयात न डेल्टा व कप्पा धायेमाः धका शुक्रराज ट्रपिकल तथा सरुवा रोग अस्पतालया निर्देशकं धागु दु।

तसक संक्रामक माने यानातःगु भारतय् पिहावंगु ‘डेल्टा’ भेरियन्ट हलियक ५० गु स्वया अप्वो देशय् फैलै जुइ धुकुगु दु। थ्व स्या न्ह्यः गन देशय् पिहावंगु, उगु देशया नामं भेरियन्टयात म्हसिका वयाच्वंगु खः। भारतं ‘भारतीय भेरियन्ट’ धागुलि आपत्ती न यागु खः। भारतया सन्चार मन्त्रालयं ‘भारतीय भेरियन्ट’ च्वंगु दक्को पोष्ट हटे यायेत सामाजिक सन्जाल कम्पनीयात निर्देशन हे बिगु दु।

२४ घण्टाय् दुने स्वनिगः दुने १ हजार २६३ म्हेसित कोरोना संक्रमण पुष्टि जुगु दु।

स्वास्थ्य मन्त्रालयया कथं थौं येँ जक ८९० म्हेसित कोरोना पुष्टि जुगु दु । अथेहे ख्वपय् १२१ म्ह व यलय् २५२ म्हेसित कोरोना संक्रमित जुगु दु।

थौं सोमवाः देयन्यक थप ४ हजार ७६२ म्ह कोरोना संक्रमण जुगु खः।

लिपागु २४ घण्टाग् थप ४७६२ म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं १५ हजार ५५ म्हेसिगु पीसीआर व २४२५ एन्टिजेन परीक्षणय् ४७६२ म्हेसित संक्रमण पुष्टि जुगु खः।

संक्रमणया कारण ११४ म्ह सीगु खः । अथेहे थौं ६ हजार ४९१ म्ह संक्रमणमुक्त जुगु दु।

चीन सरकारं अनुदानय् बिइ त्यंगु खोप कायेगु लागि नेपाल वायुसेवा निगमया वाइडबडी विमान थौं बेइजिङपाखे वने त्यंगु दु ।

ए ३३० विमान थौं चान्ह्यः ११ बजे बेइजिङपाखे विमानं मंगलवाः खोप कया वगु धका निगमं जानकारी बिगु दु ।  चीन सरकारं अनुदान बिइ त्यंगु १० लाख डोज खोप फयाफतले छक्वल हयत्यंगु धका परराष्ट्र मन्त्रालयं धागु दु।

चीनं थ्व स्वया न्ह्यः नेपालयात ८ लाख डोज भेरोसेल खोप अनुदानय् बिगु दु।

चीनया स्वशासित क्षेत्र तिब्बत सरकारं आइतवाः नेपालयात ८ सय अक्सिजन सिलन्डिर, २ सय आईसीयू बेड, ५ भेन्टिलेटर, १० कन्सन्ट्रेटर, १५ सय एन्टिजेन किट तातोपानी नाकाय् हस्तान्तरण यागु खः।

शिक्षा मन्त्रालयं माध्यमिक शिक्षा परीक्षा (एसईई) आन्तरिक मूल्यांक विधिं यायेगु प्रस्ताव मन्त्रिपरिषदय् यंकेगु निर्णय याःगु दु ।

सोमबाः च्वंगु मन्त्रालय्या मुँज्यां एसईई परीक्षा आन्तरिक मूल्यांकन विधि कथं यायेगु प्रस्ताव मन्त्रिपरियादय् छ्वयेगु निर्णय जूगु शिक्षामन्त्रीया प्रेस संयोजक ईश्वरराज ढकालं न्ह्यथनादिल । मन्त्रालयया मूँज्यां वंगु दँय् जूगु विधि आन्तरिक मूल्यांक विधिकथं हे यायेत प्रस्ताव छ्वयेगु निर्णय जूगु संयोजक ढकालं धयादिल ।

वंंगु दँय् ब्वनेकुया प्रधानाध्यापक, कक्ष शिक्षक व अनुभवी शिक्षक याना स्वम्ह दुजःपिनिगु मूल्यांकन समिति निस्वना न्हापांगु त्रैमासिकया १०गू प्रतिशत, निगूगु त्रैमासिकया ३०गू प्रतिशत व शैक्षिक सत्रया अन्त्यतक्क क्वजिउगु दक्वः विषयवस्तु मूल्यांकन जूगु खः । मूल्यांकन विवरण दयेकेत राष्ट्रिय परीक्षा बोर्डं एसईई कक्षा १० या मूल्यांकन, नतिजा प्रकाशन लिसें प्रमाणीकरण कार्यविधि, २०७७ जारी याःगु खः ।

गुकिइ मूल्यांकन समितिं राष्ट्रिय परीक्षा बोर्डं तोके याःपिं स्यनामिपिनिगु प्राप्ताङ्क शिक्षा विकास तथा समन्वय इृकाईतय्सं उगु विवरण राष्ट्रिय परीक्षा बोर्ड छ्वःगु खः । समितिं छ्वयाहःगु विद्यार्थीया प्राप्तांकया लिधंसाय् बोर्डं परीक्षाफल तयार याना प्रमाणपत्र न्ह्यब्वःगु खः ।