बुंगद्यःया रथयात्रा थुगुसी प्रतीकात्मक रुपं क्वचायेकीगु जूगु दु ।

बुंगःद्यःया रथयात थ्व हे वइगु जेठ १ गते प्रतीकात्मक रुपं सालाः रथयात्रा क्वचायेकीगु खः ।

थौं जूगु सरोकारवालाया मुँज्यां कोरोना महामारीयात ध्यानय् तया म्ह्वः ल्याखय् जक उपस्थित जुयाः स्वास्थ्य सुरक्षाया मापदण्डये च्वना प्रतीकात्मक रुपं जेठ १ गते रथ सालेगु निर्णय जूगु दु ।

यलया सहायक प्रमुख जिल्ला अधिकारी ललितकुमार बस्नेतं कोभिड–१९ संक्रमणया अप्वयाच्वंगु जोखिमयात बिचाः यासें थज्याःगु निर्णय जूगु जानकारी बियादिगु खः।

थगुने बुंगद्यःया रथयात्राय् ताः ई अन्यौल जूबलय् जूगु विवादं उग्र रुप काःबलय् झडप तकं जूगु खः ।

नेपाःया पुलागु सामुदायिक अस्पताल क्षत्रपाटी निःशुल्क चिकित्सालयं कोभिड उपचार निःशुल्क याइगु जुगु दु ।

याकन हे दातापिनिगु ग्वाहालिं चिकित्सालय दुने कोभिड उपचार केन्द्र दयका निःशुल्क उपचार यायत्यंगु दु । आईसियु नाप ३५ वेडया कोभिड विरामीपिनिगु उपचार शुरु यायेत्यंगु दु ।

चिकित्सालयया अध्यक्ष डा. मनोजमान श्रेष्ठं ५० बेड क्षमताया चिकित्सालययात कोभिड डेडीकेटेड अस्पताल रुपं संचालन यायेत्यनागु दु धका धयादीगु दु ।

दाता नाप खँ मिले जुइवं छन्हु निन्हुया दुने हे कोभिड विरामीपिनिगु निःशुल्क उपचार याये त्यनागु दु धका धयादीगु दु ।

येँया धापासी च्वंगु ग्रीन सिटी अस्पतालय् अक्सिजन अभाव जुया कोभिड–१९ या न्हुपि बिरामी भर्ना कायफइ मखु धका घोषणा यागु दु ।

अस्पतालं बुधवाः छगु विज्ञप्ति जारी यासे अक्सिजन आपूर्तिइ समस्या वंगु धासे अस्पतालं न्हुगु भर्ना काये फइमखु धका व उपचार यानाच्वपि बिरामीपिन्त जक छु न इलय् स्थानन्तरण याये मालेफइ धका न धागु दु ।

आः आईसीयू १० व हाई केयर युनिटय् ३० म्ह संक्रमितपिनिगु उपचार जुयाच्वंगु दु धका अस्पतालं धागु दु ।

न्हि २५० सिलिण्डर अक्सिजन आवश्यक जुगु व्यवस्थापन यायेत तसक थाकुगु दु धका अस्पतालं धागु दु ।

आः अक्सिजन मौज्दात छु घण्टा जक दु धासे छु न इलय तःधगु दुर्घटना जुइफु धका अस्पतालं धागु दु ।

 वंगु २४ घण्टाया दुने स्कनिगलय् ३९२४ म्हेसित कोरोना संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं थौं येँ जक ३ हजार २५० म्हेसित कोरोना सक्रमित जूगु दु।

अथेहे ख्वपय् २२६ म्ह व यलय् ४४८ म्हेसित कोरोना संक्रमित जूगु दु ।

अथेहे थौं बुधवाः जक ९ हजार ३०५ म्हेसित कोरोना संक्रमितपि थपेजूगु दु।

दु सा अथेहे १६८ म्ह मदुगु धका मन्त्रालयं धागु दु ।