विपक्षी गठबन्धनया सांसदपिन्स संसद पुनर्स्थापना यायेत व नेपाली कांग्रेसया सभापति शेरबहादुर देउवायात प्रधानमन्त्री नियुक्त यायेत माग यासे सर्वोच्च अदालतय् रिट दायर यागु दु।

उकिया लागि नेतापि अदालत वंगु दु। रिट दायर यागु स्वंगु माग तःगु दु।

१. संसद विघटन गर्न सिफारिस यागु मन्त्रिपरिषदया निर्णय खारेज, २. संसद अधिवेशनया तिथि क्वछिइ मागु, ३. संविधानया धारा ७६(५) कथं शेरबहादुर देउवायात प्रधानमन्त्री नियुक्त याये मागु परमादेश थुपि स्वंगु माग तःगु खः।

चाइनीज संस्था चाइना फाउन्डेसन फर पभर्टी एलेभिएसनं येँ महानगरपालिका १७ वडा ज्याकुथिं क्षेत्रपाटीइ संचालन यानाच्वंगु आइसोलेसनयात अक्सिजन सिलिण्डरनाप स्वास्थ्य सामग्रीत ग्वाहालि याःगु दु ।

आइसोलेसन फाउन्डेसनया कन्ट्रि डाइरेक्टर झाउ छि याङं सामग्रीत येँ महानगरया १७ वडाध्यक्ष नवीन मानन्धरयात उगु सामग्री लःल्हागु खः । फाउन्डेसनं प्रति सिलिण्डर ४० लिटर क्षमताया २० अक्सिजन सिलिण्डर नापं, निसः पाः थान पिपिई, सच्छिगु फेसशिल्ड, द्वःछिगु मास्क व निगः निसंक्रमण मेशीन ब्यूगु खः ।

सामग्री लःल्हानाकासें वडाध्यक्ष मानन्धरं आः देशय् महामारीया अवस्थाय् चाइना फाउन्डेसनया थुगु ग्वाहालिं थःपिन्त तःधंगु हःपाः बिगु दु धका धयादिगु खः ।

‘महामारीयात नियन्त्रणय् कायेत मंकाः कुतः न्ह्याकेमाः, झी दक्वं जानाः जक थुकियात नियन्त्रणय् कायेफइ । जःलाखला देय् चाइनां झीत ब्यूगु थुगु ग्वाहालिं महामारी नियन्त्रणय् अझ सशक्त ढङ्गं न्ह्याःवनेत जिमित तःधंगु हःपाः चूलाःगु दु’ मानन्धरं धयादिल ।

फाउन्डेसनया नेपाल निर्देशक झाउ छि याङं नेपालय् कोभिडया निगूगु लहर वयाच्वंबलय् थःपिन्त नं चिन्तित दयेकूगु व महामारी नियन्त्रणया लागिं चीधंगु ग्वाहालि यायेत स्वयागु धयादिल ।‘थन चिकित्सकतयसं संक्रमितया जीवन रक्षा यायेत थाकुयाच्वंगु धयाच्वंबलय्, अक्सिजनया अभाव जुयाच्वंगु खँत ताःबलय् जिपिं चिन्तित जूगु दु, विश्व महामारी नियन्त्रणय् कायेत अन्तरदेशीय मंकाः कुतः नं न्ह्याकेमाः’ झाउया धापू खः ।

फाउन्डेसनं थ्वयां न्ह्यः नं येँया थीथी वडाय् ल्हाः सिलेगु स्टेशन दयेकेगु लिसें चीमि परिवारया विद्यार्थीतयत नसा ज्वलं ग्वाहालि याःगु दु ।

कोरोना संक्रमणं वीरगञ्जय् थप न्याम्ह सी धुकुगु दु ।

वीरगञ्जया नारायणी अस्पतालय् उपचार याना च्वपि न्याम्ह कोरोना संक्रमितपि मदुगु खः ।

मदुपि पर्सा व बाराया निम्ह निम्ह व सर्लाहीइ च्वम्ह छम्ह मदुगु खः। वीरगञ्ज–३२ चोर्नीया ३५ दँ दुम्ह मिजंम्ह कोरोना संक्रमणं मदुगु खः । वैशाख ३ गते अस्पताल भर्ना जूम्ह उगु हे दि एन्टिजेन परीक्षण रिपोर्ट पोजेटिभ वंगु खः। कोभिड निमोनियां ग्रसि जूम्ह वयागु उपचारया झ्वलय् थौं सोमवाः सुथय् ५ बजे मदुगु खः। नारायणी अस्पतालय् हे पर्साया बिन्दबासिनी गाउँपालिका– २ बहुअर्वाभाठाया ७० दँ दुम्ह मिजं मदुगु दु ।

जेठ ६ गते पीसीआर परीक्षण यागु इलय् कोरोना संक्रमण पुष्टि जूगु खः। बाराया कलैया उपमहानगरपालिका– ३ गंगापुर च्वम्ह ६० दँ दुम्ह मिजंम्ह वैशाख ३० गते यागुलि पीसीआर परीक्षण रिपोर्ट पोजेटिभ वंगु खः। कोभिड निमोनिया ग्रसित जुम्ह थौं सुथय् १० बजे मदुगु खः।

बारा जिल्ला छेँ दुम्ह ४० दँ दुम्ह मिजंम्ह कोरोना संक्रमणया कारण मदुगु खः । बैशाख २७ गते पीसीआर परीक्षणय् कोरोना संक्रमण पुष्टि जुगु खः । सर्लाहीया सोल्टीबजारय् ५२ दँ दुम्ह मिजंम्ह कोरोना सक्रमण जुया जेठ ३ गते भर्ना जुगु खः। थौं सुथय् ६ः४५ बजे मदुगु धका नारायणी अस्पतालं धागु दु ।

साहित्यकार डा. बानिरा गिरी ७५ दँय् म्हिगः आइतवाः चान्ह्यः मन्त ।

हृदयघातया कारण येँया बानेश्वरय् च्वंगु सिभिल अस्पतालय् म्हि चान्ह्यः १० बजे गिरी मदुगु धका परिवारपाखे धागु दु। मदुम्ह गिरी स्वदँ निसे अल्जाइमर्सपाखे पीडितम्ह खः।

वयकः नेपाली साहित्यय् विद्यावारिधियाम्ह न्हापाम्ह मिसाम्ह खः । डा. गिरीया ‘एउटा एउटा ज्यूँदो जंगबहादुर’ व ‘जीवनथाय् मरु’ कवितासंग्रह नाप स्वंगू उपन्यास ‘निर्बन्ध’, ‘कारागार’, व ‘शब्दातीत शान्तन’ प्रकाशित जूइ धुकुगु दु।

‘शब्दातीत शान्तन’ न वयकलं २०५६ सालय् साझा पुरस्कार कयादीगु खः। डा. गिरीया जहाना नाप छम्ह काय् व छम्ह म्ह्याय् दु।

विपक्षी दलपिनिगु गठबन्धनं संसद विघटनविरुद्ध सर्वोच्च अदालतय् दायर याइगु रिटय् हस्ताक्षर यायेत नेकपा एमालया माधवकुमार नेपाल पक्षया सांसदपि सिंहदरबारय् वंगु दु।

विपक्षी दलपिनिगु गठबन्धनं संसद विघटनविरुद्ध थौं सर्वोच्च अदालतय् दायर याइगु रिट तयार जुइंव नेपाल पक्षया सांसदपि सिंहदरबारय् वंगु खः।

थौं हस्ताक्षर यापि माधव नेपाल, जिवनराम श्रेष्ठ, निरादेवी जैरु, लक्ष्मी चौधरी, बिरोध खतिवडा, सोमप्रसाद पाण्डे, रामकुमारी झाक्री, लक्ष्मी चौधरी, झपट रावल, सोमप्रसाद पाण्डे लगायतपि खः।