कोविडया संक्रमण विरुद्ध ल्वायेगु लागि येँ महानगरपालिकां बैशाख ३१ गते छन्हु हे न्ह्यगू अस्पतालनाप सहयोग सम्झौता यागु दु । थ्व स्वया न्ह्यः वंगु बैशाख २४ गते सम्झौता याना त्रिभुवन विश्वविद्यालय शिक्षण अस्पतालयात २५ गते १० भेन्टिलेटर उपलब्ध यागु खः । अथेहे बैशाख २७ गते नरदेवी आयुर्वेदिक अस्पतालनाप अक्सिजन नाप एचडीयु (हाइ डिफिसेन्सि युनिट) सेवा व आइसोलेसन केन्द्र सञ्चालन सम्झौता यागु खः।

उगु सम्झौता येँ महानगरया प्रमुख विद्यासुन्दर शाक्यया रोहवरय् महानगरपाखे जनस्वास्थ्य विभागया प्रमुख हरिबहादुर कुँवरं व अस्पतालपाखे सम्बन्धित अधिकारीपिन्स यागु खः।  बैशाख २८ गते महानगरं सरकारी व सामुदायिक अस्पतालया प्रमुख नाप प्रतिनिधिपिन्स सःता कोविड संक्रमणविरुद्ध महानगरपाखे छु ग्वाहा िमाः धका न्यंगु खः । वया लिपा अस्पतालं थःगु क्षमता अप्वोकेत मागु उपकरण व व्यवस्थापनया लागि माःगु ग्वाहालि माग यागु खः ।अस्पतालया माग कथं सम्झौता यागु खः ।

सम्झौतालिपा प्रतिक्रिया बियादीसे महानगरया प्रमुख विद्यासुन्दर शाक्यं धयादीगु दु, ‘आः चि चि धःगु युनिटय् आइसोलेसन वा उपचारया मेमेगु प्रणाली विकास यक्को स्रोत व साधन खर्च जुइ । व धइगु उपचारया लागि लिपागु थाय् मखु । अन सूयात जटिल समस्या वलकि अस्पताल हे यकेमाः । उकि जिमिसं भौतिक संरचना, विशेषज्ञ जनशक्ति व प्रणाली दुगु सामुदायिक व सरकारी अस्पतालय् क्षमता अप्वोकगु निर्णय यानागु खः । उकिइ महामारी विरुद्ध ल्वाय्त प्रभावकारी जुइ धका जिमिस बिचाः यानागु खः। थुगु सहकार्य थुकिइा निति हे खः ।’ थुगु इलय् आत्मबल थःकायेमाः धक धयादीगु दु।

सम्झौता लिपा उपप्रमुख हरिप्रभा खड्गी श्रेष्ठं, थुगु अस्पताल नाप सहकार्यपाखे विरामीपिन्त फाइदा जुगु आशा यानागु दु धका धयादीगु दु ।

सम्झौता जुगु अस्पतालमध्ये वीरेन्द्र सैनिक अस्पताल सामाखुशीइ राधा स्वामी सत्संग ब्यासया भवनय् महानगरपालिकाया नामं अक्सिजन सहित आईसोलेसन केन्द्र सञ्चालन याइगु जुगु दु। जेठ १ गतेनिसे खुला तक सम्झौताबमोजिम ज्या जुइ । न्हापागु किस्तास्वरुप २ करोड रुपैयाँ उपलब्ध याइ । वया लिपा अनुदान खर्च फाँटवारीया आधारित जुइ।सम्झौताय् अस्पतालपाखे सहायक रथी कमाण्डान्ट डा. अरुण शर्मा हस्ताक्षर यानादीगु दु ।

महानगरं छत्रपाटी निःशुल्क चिकित्सालययात ३५ वेडया निति येँ महानगरया कोविड अस्पतालया रुपं सञ्चालन याइ। थुकिया निति पूर्वाधार विकासया लागि करीव ३० लाख रुपैयाँ व ३५ बेडया कोविड विशेष अस्पतालयागु समग्र व्यवस्थापन व मागु जनशक्तिया लागि महानगरं मासिक करीव ४८ लाख रुपैयाँ बिइ । थुगु सम्झौता कोविडया महामारीया विषय महानगरं मेगु निर्णय मजूतय् या लागि खः । सम्झौता बमोजिम अस्पतालं खरिद याइगु स्वगू भेन्टिलेटरया लागि विल कथं रकम महानगरं अनुदान स्वरुप उपलबध याइ । सम्झौताय् अस्पतालपाखे अध्यक्ष डा. मनोजमान श्रेष्ठं हस्ताक्षर यानादीगु खः ।

सम्झौता जेठ ७ गतेनिसे लागु जुइ । अथेहे चिकित्सा विज्ञान राष्ट्रिय प्रतिष्ठान वीर अस्पतालय् १५ भेन्टिलेटर व ५० मोनिटर खरिद यायेत महानगरं अनुदान स्वरुप उपलब्ध यागु दु । निजामति कर्मचारी अस्पतालय् महानगरं कन्टिन्युअस पोजेटिभ एअर प्रेसर थेरापी मेसिन (सी प्याप) १० व वाइलेवल पोजेटिभ एअरवे प्रेसर मेसिन (वी—प्याप) १० खरिद यायेत ग्वाहालि यागु दु । येँ महानगरं महेन्द्र नारायण निधि मेमोरियल अस्पताल, बसुन्धरा, हेल्पिङ ह्याण्ड्स सामुदायिक अस्पताल, चावहिल व जनस्वास्थ्य सरोकार ट्रष्ट काठमाडौँ मोडल अस्पताल, बागबजारयात निगः निगः भेन्टिलेटर मेसिन खरिद यायेत आर्थिक अनुदान बिगु दु ।

महानगरं बिगु अनुदान अस्पतालं न्हि न्हि गुलि सेवा बियागु धका विवरण महानगरयात छ्वय माः । अथेहे खर्च व लेखा परीक्षण प्रचलित कानुन कथं अधिकारबमोजिम जुइ । लेखा परीक्षणया प्रतिवेदन महानगरयात बुझे यायेमाः ।

बुगंद्यःया रथ थौं न्हिनय् सालिइगु जुगु दु। कोभिड–१९ या निक्वःगु लहरया कारण जारी जुयाच्वुंगु निषेधज्ञा याना रथयात सांकेतिक रुप जक सालेय् त्यंगु खः।

परम्परा कथं रथ पुच्वंनिसे गाःबहालय् यकिइगु खः । तर, महामारीया कारणं सिमित मनूत व बाजापिनिगु उपस्थितइ आः दुगु रथ छु भचा जक सालेत्यंगु खः। अथेहे बुगंद्यः ५ गते जक बुङमती यकिइगु जुगु दु ।

जात्रायात लक्षित याना जिल्ला प्रशासन कार्यालय ललितपुरं बुगंद्यः व चाकुवाः द्यःया रथ दुगु थासय् थौं शनिवाः लागू जुइ कथं ५ गते बुधवाः तक न्याम्ह स्वया अप्वो मनूत भेला जुइ मदगु कथं निषेधित क्षेत्र तोके यागु दु।

गुठी संस्थान ललितपुर शाखाया प्रमुख खिमा वलीें बुङमतीइ द्यः बिज्याके न्ह्यः बुगंद्यः व चाकुबा द्यःयात दक्को विधि विधान पूरा याइ धका धागु दु ।

बुगंद्यःयात बुङमती यकिइगु न्ह्यःया साइत सुथय् ६ बजे जुया ५० मिनेट निसे ७ बजे जुया ४ मिनेट दुने दु धका वयकलं धयादीगु दु ।

बुगंद्यःयात वैष्णवीपिनिगु विष्णु, शैवपिनिगु शिव, शाक्तपिनिगु शक्ति, सौर पिनिगु सूर्य, ब्राह्मणपिनिगु लोकेश्वर व बौद्धपिनिगु करुणामययो जात्रा वंगु दँय् न सांकेतिक रुप जक सागू खः ।

परराष्ट्र मन्त्रालयं स्वदँ निसे खाली जुयाच्वंगु दक्षिण कोरिया, श्रीलंका नाप अस्ट्रेलिया व मेमेगुे ११ गु देशय् राजदूत नियुक्तिया सिफारिस यागु दु ।

शुक्रवाः जक पुनर्नियुक्त परराष्ट्रमन्त्री प्रदीप ज्ञवालीं छवाः न्ह्यःयागु मन्त्रिपरिषदं राजदूतपिनिगु नां सिफारिस यागु जानकारी बियादीसे प्रस्तावित नां संसदीय सुनुवाइ प्रक्रियाया लागि शुक्रवाः संसद् सचिवालय छ्वयागु जानकारी बियादीगु दु । परराष्ट्र सेवापाखे सहसचिव निर्मलराज काफ्ले अस्ट्रिया व जीवनप्रकाश श्रेष्ठ इजिप्टया लागि राजदूत सिफारिस यागु दु।

तत्कालीन विराटनगर नगरपालिकाया पूर्वमेयर नाप महेन्द्र मोरङ क्याम्पस राजनीतिशास्त्रया पूर्वप्राध्यापक रमेशचन्द्र पौडेल श्रीलंकाया लागि राजदूत सिफारिस यागु दु । त्रिभुवन विश्वविद्यालय कीर्तिपुरया राजनीतिशास्त्र विभागया पूर्वप्रमुख कृष्णचन्द्र शर्मायात दक्षिण कोरियाया लागि राजदूत सिफारिस यागु दु ।

अथेहे अस्ट्रेलियाया लागि राजदूत सुम्निमा तुलाधरया नां प्रस्तावित यागु दु । वयकः बाल कल्याणकारी संस्था सिविन नेपालया कार्यकारी संयोजक खः। अथेहे रुसया लागि रुसी भाषाया ज्ञाता जंगबहादुर (जंगब) चौहान प्रस्तावितयात जुयादीगु दु ।

अथेतु, झापाली कम्युनिस्ट राजनीतिइ संलग्न पुलाम्ह नेता नारायणप्रसाद संग्रौला म्यान्मार व एमाले पार्टीसम्बद्ध पूर्वमन्त्री युवराज कार्की बहराइनया लागि राजदूत सिफारिस यागु दु । प्राध्यापक संग्रौला येँया सहिद रामनाथ बहुमुखी क्याम्पसया पूर्वप्रमुख नाप पद्मकन्या, महेन्द्ररत्न क्याम्पसनाप राजनीतिशास्त्रका प्राध्यापक खः ।

अथेहे, ब्राजिलय् कुलप्रसाद नेपाल व डेनमार्कय् सुमित्रा सुवेदीया नां प्रस्तावित जुगु दु। नेपाल पाल्पाया पूर्वसांसद सुवेदीया विस्तृत म्हसिका धासा खुले जुगु मदुनि। नेकपा एमालेसम्बद्ध मुस्लिम संगठनया अध्यक्ष तक जुयादीइ धुकुम्ह मेराज मुसलमान साउदी अरेबिया राजदूतय् प्रस्तावित जुयादीगु दु। वंगु वाःय् जक अस्ट्रेलियाया राजदूत महेशराज दाहालयात  कार्यकाल क्वचाइगु दँत्या ल्यःगु दुसा लित सःतूगु खः।

कार्यकाल पूरा क्वचाय धुकुगुसा टोकियोस्थित राजदूत प्रतिभा राणा व मस्कटस्थित शर्मिला पराजुली ढकालयात मेगु निर्णय मजुतले कार्यकाल थप यागु दु ।

वरिष्ठ संस्कृतविद् डा साफल्य अमात्य कोरोना भाइरसया संक्रमणं मन्त।

वय्कः म्हिगः येँया वीर अस्पतालय् कोरोना भाइरसया संक्रमणं मदुगु खः।

ओमबहालय्  विसं १९९९ सालय् जन्म जुयादिम्ह वय्कः पुरातत्व विभागया पूर्वमहानिर्देशक जुयादिइ धुुकुम्ह खः।

वय्कलं बागमती सभ्यता सफु न च्वयादीगु खः।

मजिपाः लाखे, मरूसतः, बुंगद्यः, बागमती सभ्यता, टोखा संस्कृतिलिसें स्वागू यक्व सफू, ज्यापौ च्वयादिगु दु।

वंगु २४ घण्टाया दुने स्वनिगलय् ३ हजार ३४९ म्हेसित कोरोना संक्रमण पुष्टि जूगु दु।

स्वास्थ्य मन्त्रालयया कथ येँ जक २  हजार ४५८ म्हेसित कोरोना पुष्टि जुगु दु ।

अथेहे ख्वपय् ३३५ म्ह व यलय् ५५६ म्हेसित कोरोना संक्रमित जूगु दु। द

यन्यक थप ८५२० म्हेसित कोरोना संक्रमण पुष्टि जूगु दु सा २०३ म्हेसिगु ज्यान वंगु दु।