Display Style:
Column Style
कालीकामाई गाउँपालिकाया अध्यक्ष नथुनीप्रसाद कुशवाहा मन्त
लहानान्युज | चौलागा चतुर्थी ११४१,बैसाख १७ शुक्रवाः
पर्साया कालीकामाई गाउँपालिकाया अध्यक्ष नथुनीप्रसाद कुशवाहा मन्त ।
छु दिं निसे सेँखं चागु व ज्वरो वया छेँ हे उपचार यानाच्वम्ह अध्यक्ष कुशवाह थौं सुथय् २ः३० बजे मदुगु धका उपाध्यक्ष राजेश कुमार चौरसिया न जानकारी बिगु दु ।
दाङय् थौं सुथये ६ बजेनिसे लकडाउन
लहानान्युज | चौलागा चतुर्थी ११४१,बैसाख १७ शुक्रवाः
दाङय् थौं सुथसिया ६ बजेनिसे लकडाउन सुरु यागु दु ।
वंगु मंगलवाः निसे घोराहीलय् जुगु सर्वदलीय बैठकं थौंनिसे वइगु २५ गते सनिलय् ६ बज तक जिल्लायकं लकडाउन यायेगु निर्णय यागु दु ।
दाङय् लकडाउनया प्रभावं अनया बजाः, यातायात दक्को बन्द जुगु दु। लकडाउनया इलय् खाद्यान्न पसः धासा सुथय् ६ बजे निसे ८ बजे तक सञ्चालन याये दइ ।
वैशाख २५ गते लिपा अवस्था स्वया थप निर्णय यायेगु जुइ धका प्रमुख जिल्ला अधिकारीं धागु दु।
राष्ट्रियसभा उपनिर्वाचनय् न्यागु राजनीतिक दल दर्ता
लहानान्युज | चौलागा तृतिया ११४१,बैसाख १६ बिहीवाः
बागमती प्रदेशय् खाली जुगु राष्ट्रियसभा सदस्य उपनिर्वाचनय् न्यागु राजनीतिक दलं भाग कागु दु।
उपनिर्वाचनया लागि नेपाल मजदुर किसान पार्टी, नेपाल कम्युनिष्ट पार्टी (एमाले), नेपाली काँग्रेस, राष्ट्रिय प्रजातन्त्र पार्टी व नेपाल कम्युनिष्ट पार्टी (माओवादी केन्द्र)पिन्स आयोगय् दल दर्ता यागु दु धका आयोगया प्रवक्ता राजकुमार श्रेष्ठं जानकारी बिगु दु। उपनिर्वाचनया लागि एमालेयात सूर्य चिं ल्याः १, कांग्रेसयात सिमा चिं झ्वः ल्याः २, माओवादी केन्द्रयात गोलाकार दुने हँसिया हथौडा चिं व झ्वः ल्याः ३, राप्रपायात हलो चिं व झ्वः ल्याः ४ नाप नेमकिपायात मादल चिं झ्वः नाप ल्याः ५ मतपत्रय् समावेश यागु दु।
आः वइगु जेठ ६ गते बिहीवाः जुइगु वाग्मती प्रदेशय् खाली जुगु राष्ट्रियसभा सदस्य उपनिर्वाचनया लागि राजनीतिक दलसम्बन्धी ऐन, २०७३ या दफा ४८ या उपदफा ९३० बमोजिम नेपाल राजपत्रय् प्रकाशन जुगु व दल दर्ता जुगु राजनीतिक दलयात निर्वाचन चिं निर्धारण यासे आयोगं निर्णय यागु दु ।
३४८ मतदाता कायम उपनिर्वाचनया लागि प्रदेशसभा सदस्य ११० व गाउँपालिकाया अध्यक्ष, उपाध्यक्ष नाप नगरपालिकाया प्रमुख, उपप्रमुख २३८ याना ३४८ मतदाता कायम जुगु दु। आयोगया कथं, स्वीकृत जुगु मतदाता नामावली थ्व हे वैशाख २१ गते सुथय् ११ बजे निर्वाचन अधिकृतया कार्यालय, हेटौँडाय् प्रकाशन याइगु व प्रकाशित मतदाता नामावली उगु हे कथं उगु हे दिं सुथय् ११ बजेनिसे बहनि ५ बजे तक नां समावेश जुइत छुटे जुपि मनू तयेस थःगु नां समावेश यायेगु निति दरखास्त बिइगु व्यवस्था यागु दु ।
थप येँ ११२७ म्ह कोरोना सक्रमित
लहानान्युज | चौलागा तृतिया ११४१,बैसाख १६ बिहीवाः
स्वनिगः दुने वंगु २४ घण्टाया दुने थप १५६१ म्हेसित कोरोना संक्रमण पुष्टि जुगु दु।
स्वास्थ्य मन्त्रालयया कथं थौं येँ जक ११२७ म्हेसित कोरोना सक्रमण जुगु दु। अथेहे ख्वपय् १८२ म्ह व यलय् २५२ म्हेसित कोरोना संक्रमित जुगु दु ।
थौं बिहीवाः जक वंगु २४ घण्टाया दुने ४ हजार ९२८ म्हेसित कोरोना संक्रमण पुष्टि जुगु दु ।
अथेहे थौं ३५ म्ह सी गु दु धका स्वास्थ्य मन्त्रालयं धाःगु दु ।
थप ४९२९ म्ह कोरोना संक्रमण पुष्टि, ३५म्ह मन्त
लहानान्युज | चौलागा तृतिया ११४१,बैसाख १६ बिहीवाः
नेपालय् कोरोना भाइसरस संक्रमणं थौं छन्हू हे ३५म्ह सीगु दु । स्वास्थ्य तथा जनसंख्या मन्त्रालयं पित बिउगु विवरणकथं लिपांगु २४घौ दुने ३५म्ह सीगु खः । थ्वः आःतकया हे दकले अप्वः मृत्युदर खः ।
थ्वयांन्ह्यः वंगु दँय् छन्हूं ३२म्हतक्क सीगु खः । थ्वलिसें नेपालय् कोरोनाया हुनिं सीपिनिगु ल्याः ३द्वः, २सः व ४६म्ह थ्यंगु दु ।
थुगु ईलय् १२द्वः ५सः व ९७म्हेसि पीसीआर व ९सः व ६३म्ह एन्टीजेन परीक्षण याबले ४द्वः ९सः व २८म्हसित संक्रमित पुष्टि जूगु दु । आः नेपालय् संक्रमित जूपिनिु ल्या ३गू लखः १७द्वः ५सः व ३०म्ह थ्यंगु दु ।
नेपालय् सक्रिय संक्रमितया ल्याः ३४द्वः सच्छि व १७म्ह थ्यंगु दु । गुकिइ ३सः व ३७म्ह आईसीयूलय् व सच्छि व ७म्ह भेन्टिलेटरय् वासः जुयाच्वंगु दु ।
थौं देययंक ८सः व ८८म्ह संक्रमित जुपिं ल्वय् लना डिस्चार्ज जूगु दु । थ्वलिसें आःतक्क २गू लखः ८०द्वः सच्छि व ६७म्ह संक्रमणमुक्त जूगु दु । देययंक ५९म्ह मनुत क्वारेन्टाइनय् दूगु स्वास्थ्य मन्त्रालयं न्ह्यथंगु दु ।
