खानेपानी तथा सरसफाइ मन्त्री मणिचन्द्र थापायात कोभिड–१९ या सङ्क्रमण जुगु दु ।

वयकःयात पीसीआर परीक्षण यागु इलय् थौं शुक्रवाः सुथय् सङ्क्रमण पुष्टि जुगु दु धका वयकःया स्वकीय सचिव राजेन्द्र गौतमं जानकारी बिगु दु ।

मन्त्री थापाया म्ह्याय् उष्णता श्रेष्ठ थापायात न सङ्क्रमण जुगु खःसा थौं वयकःयात बिहीवाः स्वाब सङ्कलन यागु खः। वयकःया म्ह्याय् प्यन्हु जक सङ्क्रमण जुगु खः ।

मन्त्री नाप झीम्ह सचिवालय ज्यायाइपिन्त पीसीआर परीक्षण यागुलि सुयात न सङ्क्रमण खने मदुगु खः ।

सङ्क्रमण पुष्टि जुइवं मन्त्री थापा आः यलय् मन्त्री निवास पुल्चोकय् आराम याना च्वंगु धका स्वकीय सचिवं जानकारी बिगु दु ।

कोरोना भाइरस (कोभिड–१९) संक्रमणं कास्कीया पोखराय् उपचाररत निम्ह सीउगु दु ।

गण्डकी प्रदेश कोरोना नियन्त्रण तथा रोकथाम कार्यक्रमया प्रवक्ता डा. विनोद विन्दु शर्माया कथं पोखरा महानगरपालिका–६ या ८२ दँ दुम्ह मिसा व स्याङ्जा अर्जुनचौपारी गाउँपालिका–५ या ६२ दँ दुम्ह मिजंम्ह बिहीवाः चान्ह्य उपचारया झ्वलय् मदुगु खः ।

८२ दँ दुम्ह मिसाम्ह पोखरा चरक मेमोरियल अस्पतालय् बिहीवाः चान्ह्य मदुगु खः। वयात वैशाख १५ गते कोरोना संक्रमण पुष्टि जुगु खः ।

अथेहे स्याङ्जाया ६२ दँ दुम्ह मिजंम्ह पोखरा मणिपाल शिक्षण अस्पतालय् बिहीवाः चान्ह्यया १२ः४५ बजे मदुगु धका धागु खः । वयात वैशाख ५ गते संक्रमण पुष्टि जुगु खः ।

लुँया भाः थौं गुसः क्वहा वंगु दु ।

लुँ तोलां ९ सय रुपैयाँ क्वहा वया थौं तोलाया ८९ हजार ९ सय रुपैयाँ तोके यागु दु धका नेपाल सुनचाँदी व्यवसायी महासङ्घं धागु दु।

म्हिगः लुँ तोलां ९० हजार ८ सय रुपैयाँ थ्यंगु दु। अथेहे वहः नीतका क्वहा वगु दु।

म्हिगः तोलां १३ सय १५ रुपैयाँ कारोबार जुगु वहः थौं तोलाया १२ सय ९५ रुपैयाँ कारोबार जुगु दु धका महासङ्घ धागु दु।

वीरगञ्जया नारायणी अस्पतालया प्रयोगशालाय् २८८ म्हेसिगु नमुना परीक्षण यागुलि १७५ म्हेसित कोरोना संक्रमण पुष्टि जुगु दु ।

संक्रमित मध्ये  १७५ मिजं व ४४ म्ह मिसापि खः ।

अस्पतालया कथं परीक्षणया लागि बिहीवा यागु नमुना संकलनय् ६०.७६ प्रतिशत सक्रमण खनेदुगु खः ।

संक्रमितपि पर्साया १३१ म्ह, बाराया ३४ म्ह, रौतहटया स्वम्ह, सर्लाहीया न्याम्ह, महोत्तरी व दाङया छम्ह छम्हेसित संक्रमण खनेदुगु धका नारायणी अस्पतालं धागु दु ।